హీరోల్లో మార్పు.. కథల్లో వాస్తవికత..

టాలీవుడ్ ను కథల కొరత వేధిస్తోంది. ఒక మంచి కథ తయారు కావడానికి సంవత్సరంకు పైగా పడుతోంది. అది తెరకెక్కించాలంటే కనీసం సంవత్సరంన్నర నుంచి రెండేళ్లు పడుతుంది. ఇలా కథల కోసం ప్రస్తుతం హీరోల అన్వేషణ సాగుతోంది.

కొత్తదనం కోసం దర్శకులు - రచయితలు తీవ్రంగా ఆలోచిస్తున్నారు. ఈ క్రమంలోనే తాజాగా వాస్తవిక కథలు ప్రాధాన్యం పెరిగింది. బయోపిక్ లా కాలం నడుస్తోంది. ఇటీవల అర్జున్ రెడ్డి లాంటి బ్లాక్ బస్టర్ హిట్ ఇచ్చిన సందీప్ రెడ్డి వంగ ఆ చిత్ర కథను ఓ వాస్తవ మెడికల్ స్టూడెంట్ జీవితాన్నే స్ఫూర్తిగా తీసుకొని రాశారు. కానీ అందులోని బోల్డ్ నెస్ వివాదాస్పదమైంది. నిజానికి మెడికల్ స్టూడెంట్స్ ఫీల్డ్ లో అంతకంటే దారుణంగా వ్యవహరిస్తారు. ర్యాంగింగ్ - రోమాన్స్ అంతకుమించే ఉంటుంది. సందీప్ వంగా కొంచెం వాస్తవికతతో సినిమా తీయడంతో విమర్శకులు నోరుపారేసుకున్నారు. కానీ యువత - మెడికల్ స్టూండెంట్స్ మాత్రం దానికి కనెక్ట్ అయ్యారంటే అది వారి జీవితాల్లో జరుగుతున్న సహజమైన సంఘటనల ఆధారంగా తెరకెక్కించడమే..

నిజానికి వాస్తవిక కథలు హిట్ బాగా అవుతుంటాయి. కానీ అదే సమయంలో ఆ వాస్తవికతను బోల్డ్ నెస్ అని సంప్రదాయవాదులు సినిమాపై విమర్శలు చేస్తారు. అడ్డుకుంటున్నారు. సహజసిద్ధమైన కథలే ఎక్కువ హిట్ అవుతాయని ఎన్నో సార్లు నిరూపితమైంది.

అందుకే ఈ మధ్య మన హీరోలు ఒకేసారి 100 మంది గాల్లోనే కొట్టేసేలా స్టంట్లు చేయడం లేదు. ఆ మూసధోరణితో చేస్తే సినిమా ఫ్లాప్ పక్కా అని వారికి తెలుసు. అందుకే కొంచెం నేచురాలిటీకి దగ్గరగా కథలు రెడీ చేయమంటున్నారు. అందుకే కాస్త టైం పడుతోంది. ప్రస్తుతం టాలీవుడ్ ను వేధిస్తున్న ఈ కథల సమస్యకు పరిష్కారం రచయితలు - దర్శకుల చేతుల్లోనే ఉంది. కొన్ని స్ఫూర్తినిచ్చే వాస్తవిక కథల జీవితాలను తరిచిచూస్తే అందులో ఎన్నో కథలు కనపడతాయి. వాటిని వెతికి తీర్చిదిద్దడమే వారి చేతుల్లో ఉంది. చూడాలి.. మరి దర్శకులు - రచయితలు మారుతారో లేదో..