సింపుల్‌ గా ఉన్నా.. కమల్‌ ఇరగదీశాడు

కమల్ హాసన్ సినిమాలకు ప్రత్యేకమైన అభిమానులు ఉంటారు. కేవలం ఈ మహానటుడి నటనను చూసేందుకే కోట్లాది మంది ఎదురుచూస్తుంటారు. కమల్ లేటెస్ట్ మూవీ తూంగావనం. ఓ సింపుల్ థ్రిల్లర్ స్టోరీతో ప్రేక్షకుల ముందుకు వచ్చాడు కమల్ హాసన్. పేరుకు తగ్గట్టే చీకటి వ్యాపారమైన డ్రగ్ మాఫియా చుట్టూ అల్లుకున్న కథ అయినా.. కేవలం ఒక రాత్రి గడిచిన సంఘటనలతో సినిమా పూర్తయిపోవడం.. తూంగావనం స్పెషాలిటీ.

తొలిరోజు ఈ సినిమా గురించి బయటకొస్తున్న టాక్‌ ఇలా ఉంది... నార్కోటిక్స్ డిపార్ట్ మెంట్ లో పనిచేసే అధికారి అయిన కమల్ హాసన్ కొడుకుని కిడ్నాప్ చేస్తారు. తమ శాఖ స్వాధీన పరిచిన ఓ డ్రగ్స్ బ్యాగ్ ను ఓ పబ్బు నిర్వహించే పెద్ద మనిషికి అందచేయాలనే షరతు విధిస్తారు. కొడుకును కాపాడుకోవడం కోసం.. తన ఉద్యోగబాధ్యతలను తాకట్టు పెట్టాల్సిన పరిస్థితి. ఇలాంటప్పుడు ఆ అధికారి ఏం చేశాడు, కొడుకుని ఎలా కాపాడుకున్నాడన్నదే తూంగావనం స్టోరీ. కథ సింపుల్ గానే ఉన్నా.. తెరకెక్కించిన విధానం అద్భుతంగా ఉందనే ప్రశంసలు వస్తున్నాయి.

ముఖ్యంగా ఫస్టాఫ్ ని థ్రిల్లింగ్ గా తీయడం విశేషం. సెకండాఫ్ లో కొంచెం పట్టు సడలిందని అనిపించినా.. ఓవరాల్ గా ప్రేక్షకులను ఆకట్టుకునే సినిమానే. మరోసారి తన మార్క్ నటనతో కమల్ ఆకట్టుకున్నాడు. త్రిష రోల్ కూడా బాగుంది. చీకటి రాజ్యం పేరుతో తెలుగులో డబ్ అయిన ఈ చిత్రం.. టాలీవుడ్ లో 10 రోజులు ఆలస్యంగా అంటే నవంబర్ 20న రిలీజ్ కానుంది.