బాడీ ఉన్నంత మాత్రాన సూపర్ స్టార్ కాలేవు

ఏ ముహుర్తంలో మొదలు పెట్టారో కానీ మిగిలిన సీజన్ల తో పోలిస్తే బిగ్ బాస్ 3లో వివాదాల జోరు ఎక్కువగా కనిపిస్తోంది. ఈ షో ప్రారంభం కావటానికి ముందే.. మా బాస్ ను ఎలా శాటిస్ ఫై చేస్తావంటూ ప్రశ్నించారని పేర్కొంటూ ప్రెస్ మీట్లు పెట్టటమే కాదు.. పోలీసు స్టేషన్ కు వెళ్లి ఫిర్యాదులు ఇవ్వటం తెలిసిందే. ఇలా మొదలైన ఈ సీజన్ లో వివాదాలకు కొదవ ఉండట్లేదు. సీమ యాసలో అన్న మాటకు వరుణ్ ఫైర్ కావటం.. నల్లగా ఉన్నాడని కర్రోడా అంటూ చేసిన వ్యాఖ్యలతో పాటు.. మూడు గొడవలు.. ఆరు తిట్లు అన్నట్లుగా హాట్ హాట్ గా సాగుతోంది హౌస్ మొత్తం.

వైల్డ్ కార్డ్ తో ఎంట్రీ ఇచ్చిన తమన్నా హాట్ టాపిక్ గా మారింది. ఎవరైనా సరే.. తన నోటి ముందు బలాదూర్ అన్నట్లుగా ఆమె వ్యవహరిస్తోంది. ఘాటు వ్యాఖ్యలతో పాటు.. అందరూ తప్పు పట్టేలా దురుసు మాటల్ని సింఫుల్ గా అనేస్తోంది. దూకుడుగా వ్యవహరించటం ద్వారా తనదైన గుర్తింపును సొంతం చేసుకోవటంతో పాటు.. రెబల్ గా వ్యవహరించాలన్న ధోరణిలో కొట్టొచ్చినట్లుగా కనిపిస్తోంది.

డైమండ్ చేజిక్కించుకొని అధికారాన్ని సొంతం చేసుకున్న కింగ్ అలీ రెజాను ఉద్దేశించి తమన్నా చేసిన వ్యాఖ్యలు మంట పుట్టించాయి. అలీ రెజానను అనేసిన మాటలు అవాక్కు అయ్యేలా చేశాయి. బాడీ ఉన్నంత మాత్రాన సూపర్ స్టార్ కాలేరంటూ అలీ రెజాను ఉద్దేశించి తమన్నా చేసిన వ్యాఖ్యలు హౌస్ లో హీట్ పుట్టించాయి. ఇరువురి మధ్య మాటా మాటా పెరగటమే కాదు.. పెద్ద రచ్చే జరిగింది.  అలీ విలన్ అని.. తాను హీరోయిన్ గా తమన్నా అభివర్ణించుకోవటం వరకూ వెళ్లింది.

తన దురుసుతనంతో అలీని ఒక రౌండ్ ఇచ్చుకున్న తమన్నా.. తర్వాత తన టార్గెట్ ను కూల్ అన్షురెడ్డిపై పెట్టింది. అందంగా ఉన్నావు.. సిగ్గు శరం లేకుండా అలీ రెజా పక్కన ఎంత బాగా కూర్చున్నావంటూ చేసిన వ్యాఖ్యలు హౌస్ లో పెను దుమారాన్నే రేపాయి. తమన్నా వ్యాఖ్యల్ని హౌస్ మేట్స్ అందరూ తప్పు పట్టారు. వివాదాస్పద వ్యాఖ్యలతో ఇంటి సభ్యుల్ని ఇరిటేట్ చేయాలన్నట్లుగా తమన్నా లక్ష్యమన్నట్లుగా ఉంది. మొత్తంగా ఈ సీజన్ లో తొలిసారి కెప్టెన్ అవకాశాన్ని వరుణ్ సందేశ్ సొంతం చేసుకున్నారు. దీంతో.. ఈ వారం ఎలిమినేషన్ నుంచి తప్పించుకున్నారని చెప్పొచ్చు.