'సెబాస్టియన్ P.C.524' టీజర్: రేచీకటితో బాధపడే పోలీసోడి కథ..!

'SR కల్యాణమండపం' తో కమర్షియల్ సక్సెస్ అందుకున్న యంగ్ హీరో కిరణ్ అబ్బవరం నటించిన లేటెస్ట్ మూవీ ''సెబాస్టియన్ పి.సి. 524''. బాలాజీ సయ్యపురెడ్డి దర్శకత్వంలో తెరకెక్కిన ఈ సినిమాలో నమ్రతా దారేకర్ - కోమలి ప్రసాద్ హీరోయిన్లుగా నటించారు. ఇప్పటికే అన్ని కార్యక్రమాలు పూర్తి చేసుకున్న ఈ చిత్రం విడుదలకు సిద్ధమైంది. ఫిబ్రవరి 25వ తేదీన తెలుగు తమిళ భాషలలో ఈ సినిమా థియేటర్లలోకి రానుంది.

ఇప్పటికే ''సెబాస్టియన్ P.C. 524'' మూవీ నుంచి వచ్చిన ప్రచార చిత్రాలకు మంచి రెస్పాన్స్ వచ్చింది. ఈ నేపథ్యంలో ప్రమోషన్స్‌ లో భాగంగా చిత్ర టీజర్ ని ఈరోజు శనివారం మేకర్స్ రిలీజ్ చేసారు. రేచీకటితో బాధపడే పోలీసు కానిస్టేబుల్‌ గా కిరణ్ అబ్బవరం ఇందులో కనిపిస్తున్నారు. 'నీకు రేచీకటి అన్న విషయం ఎవ్వరికీ తెలియనివ్వద్దు అయ్యా' అని హీరో తల్లి చెప్పడంతో ఈ టీజర్ ప్రారంభమవుతుంది.

మదనపల్లె అనే ప్రాంతంలో కానిస్టేబుల్ గా పనిచేసే సెబాస్టియన్.. తనకున్న నైట్ బ్లైండ్నెస్ లోపాన్ని ఎవరికీ తెలియకుండా దాచిపెట్టి ఎలాంటి ఇబ్బందులను ఎదుర్కొన్నాడనే కథాంశంతో ఈ కామెడీ థ్రిల్లర్ ని తెరకెక్కించినట్లు తెలుస్తోంది. నైట్ డ్యూటీ చేస్తున్నప్పుడు ఎలాంటి కేసు రాకూడదని కోరుకునే సెబాస్టియన్.. ఓ రాత్రి సమయంలో జరిగిన మర్డర్ మిస్టరీని చేధించాల్సి వచ్చిందని టీజర్ ని బట్టి అర్థం అవుతుంది.

మొత్తం మీద 'సెబాస్టియన్ P.C. 524' టీజర్ ఆద్యంతం అలరిస్తూనే ఉత్కంఠకు గురి చేస్తూ సాగింది. రేచీకటి ఉన్న యువకుడిగా కిర‌ణ్ అబ్బ‌వ‌రం మంచి ఈజ్ తో నటించాడు. దేవుడి బిడ్డలు రావని ఫాస్టర్ చెప్తుంటే.. 'అంటే నేను దేవుని బిడ్డను కాదన్నమాట' అని కిరణ్ చెప్పే డైలాగ్ అలరిస్తోంది. రోహిణి - సూర్య - ఆదర్శ్ బాలకృష్ణ - శ్రీకాంత్ అయ్యంగార్ తదితరులు ఇతర పాత్రల్లో కనిపిస్తున్నారు. జిబ్రాన్ అందించిన బ్యాగ్రౌండ్ స్కోర్ - రాజ్ కె.నల్లి సినిమాటోగ్రఫీ దీనికి అదనపు ఆకర్షణగా నిలిచింది. విప్లవ్ ఈ సినిమాకు ఎడిటింగ్ వర్క్ చేసారు.

ఎలైట్ ఎంటర్‌టైన్‌మెంట్స్ సమర్పణలో జ్యోవిత సినిమాస్ పతాకంపై ప్రమోద్-రాజు లు సంయుక్తంగా నిర్మించారు. సిద్దారెడ్డి - జయచంద్రా రెడ్డి సహ నిర్మాతలుగా వ్యవహరించారు. వరుస సినిమాతో బిజీగా ఉన్న కిరణ్ అబ్బ‌వ‌రం.. పెద్ద సినిమాలకు పోటీగా రిలీజ్ చేస్తున్న 'సెబాస్టియన్ P.C. 524' తో ఎలాంటి విజయాన్ని అందుకుంటారో చూడాలి.