మామగారి సినిమాలో మరోసారి సమంతా!

అక్కినేని నాగార్జున తన నెక్స్ట్ సినిమాను రాహుల్ రవీంద్రన్ దర్శకత్వంలో చేసేందుకు రెడీ అవుతున్నాడు.  2002 లో రిలీజై సూపర్ హిట్ అయిన 'మన్మధుడు' కు సీక్వెల్ గా ఈ సినిమా తెరకెక్కనుంది.  ఈ చిత్రానికి సంబంధించి తాజాగా ఒక ఇంట్రెస్టింగ్ అప్డేట్ బయటకు వచ్చింది. ఈ సినిమాలో సమంతా ఒక కీలకపాత్రలో నటిస్తోందట.

నాగార్జున తన కోడలమ్మ సమంతా తో కలిసి స్క్రీన్ షేర్ చేసుకోవడం ఇది మొదటి సారి కాదు. గతంలో 'మనం' లోనూ.. 'రాజుగారి గది 2' లోనూ నాగార్జున.. సమంతా కలిసి నటించారు. ఈ సినిమాలో సమంతా పాత్ర నాలుగైదు నిముషాలు మాత్రమే ఉంటుందట కానీ చాలా కీలకమైన పాత్ర అని.. కథను మలుపు తిప్పుతుందని అంటున్నారు.  అక్కినేని మామ కోడలు ఇద్దరూ కలిసి మరోసారి తమ ఛార్మింగ్ స్క్రీన్ ప్రెజెన్స్ తో ప్రేక్షకులను మెప్పిస్తారన్నమాట.

ఈ సినిమా రెగ్యులర్ షూటింగ్ ను మార్చ్ 15 నుండి ప్రారంభించేందుకు సన్నాహాలు చేస్తున్నారట.  'మన్మధుడు' సినిమాను గతంలో నిర్మించిన నాగార్జున ఈ సీక్వెల్ ను కూడా అన్నపూర్ణ స్టూడియోస్ బ్యానర్ పైనే నిర్మిస్తున్నారు. నాగార్జున కెరీర్లో ఒక క్లాసిక్ గా నిలిచిన సూపర్ హిట్ సీక్వెల్ కావడంతో ఈ చిత్రంపై కూడా ప్రేక్షకుల్లో భారీ ఆసక్తి వ్యక్తం అవుతోంది.