ఆ రెండిటి కలయికే ఆచార్య: కొరటాల శివ

వందశాతం సక్సెస్ రేట్ ఉన్న కొరటాల శివ కొత్త సినిమా చేస్తున్నారంటే ఆ ప్రాజెక్టుపై ఆటోమేటిక్ గా భారీ అంచనాలు ఉంటాయి. ఇక ఆయన మెగాస్టార్ చిరంజీవితో సినిమా చేస్తున్నారంటే చెప్పేదేముంది? అంచనాలు ఆకాశాన్ని తాకుతాయి. ప్రస్తుతం కొరటాల శివ - మెగాస్టార్ చిరంజీవి కాంబినేషన్లో తెరకెక్కుతున్న సినిమా 'ఆచార్య' అందుకే క్రేజీ ప్రాజెక్టుగా మారింది. ఈ సినిమా షూటింగ్ ఇప్పటికే 40% పూర్తయింది. కరోనా క్రైసిస్ కారణంగా షూటింగ్ వాయిదా పడింది. లాక్ డౌన్ విరమణ తర్వాత ఎప్పుడు షూటింగులకు అనుమతి లభిస్తుందో అప్పుడు వెంటనే 'ఆచార్య' మళ్లీ పట్టాలెక్కుతుంది.

ఇదిలా ఉంటే రీసెంట్ గా ఒక ఇంటర్వ్యూలో ఈ సినిమా గురించి దర్శకుడు కొరటాల శివ ఆసక్తికరమైన విషయం వెల్లడించారు. ఈ సినిమా ఎలా ఉంటుందని ప్రశ్నిస్తే ఈ సినిమా తన పంథా అయిన సామాజిక అంశాలతో కూడా ఎంటర్టైన్మెంట్.. చిరంజీవి గారి మాస్ ఇమేజ్ ను కలిస్తే ఎలా ఉంటుందో అలా ఉంటుందని చెప్పారు. మెగాస్టార్ కోసం ఒక పవర్ఫుల్ పాత్రను డిజైన్ చేశానని.. ఆ పాత్ర ప్రేక్షకులపై తప్పకుండా ప్రభావం చూపిస్తుందని తెలిపారు.

ఈ సినిమాలో చిరంజీవి ప్రొఫెసర్ గా మారిన నక్సలైట్ పాత్రలో నటిస్తున్నారనే ఊహాగానాలు ఉన్నాయి. చిరంజీవి తనయుడు రామ్ చరణ్ మరో కీలక పాత్రలో నటిస్తున్నాడు. చిరంజీవి సరసన ఈ చిత్రంలో కాజల్ అగర్వాల్ హీరోయిన్ గా నటిస్తోంది. ఈ సినిమాను మ్యాట్నీ ఎంటర్టైన్మెంట్స్.. కొణిదెల ప్రొడక్షన్స్ బ్యానర్లు సంయక్తంగా నిర్మిస్తున్నారు.