కమెడియన్ తో సినిమా తీయబోతున్న 'సూపర్ స్టార్' డైరెక్టర్...!

కోలీవుడ్ లో విభిన్నమైన విలక్షణమైన చిత్రాలను తెరకెక్కిస్తూ తనకంటూ ప్రత్యేకమైన గుర్తింపు తెచ్చుకున్న డైరెక్టర్ పా.రంజిత్. 'అట్టకత్తి' సినిమాతో దర్శకుడిగా పరిచయమైన పా.రంజిత్ తర్వాత కార్తీ హీరోగా రూపొందించిన 'మద్రాస్' సినిమాతో క్రేజీ డైరెక్టర్ గా మారిపోయాడు. సామాజిక అంశాలు.. దళితులు.. అణగారిన వర్గాలకు జరుగుతోన్న అన్యాయాలపై కమర్షియల్ అంశాలతో సినిమాలు తీస్తూ హిట్స్ అందుకుంటున్నాడు పా రంజిత్. అలాంటి కథా వస్తువుతోనే తలైవా సూపర్ స్టార్ రజినీకాంత్ ను మెప్పించగలిగారు.. ఆయనతో వెంటవెంటనే రెండు సినిమాలు చేయగలిగారు. రజినీకాంత్ హీరోగా వచ్చిన ‘కబాలి’ ‘కాలా’ సినిమాలకు దర్శకత్వం వహించిన పా రంజిత్ దేశవ్యాప్తంగా గుర్తింపు తెచ్చుకున్నారు. ఈ రెండు సినిమాల్లోనూ పేదలు.. అణగారిన వర్గాల ప్రజలు.. తనను నమ్ముకున్న వారి కోసం పోరాడే నాయకుడి పాత్రల్లో హీరో పాత్రధారి కనిపించారు. అందుకే ప్రస్తుతం ఇండస్ట్రీలో ఉన్న దర్శకుల్లో సూపర్ స్టార్ రజినీకాంత్‌ కు ఇష్టమైన డైరెక్టర్స్ లో ఒకడిగా పా. రంజిత్ నిలిచాడు.

అయితే రంజిత్ కేవలం దర్శకుడిగానే కాకుండా నిర్మాతగా మారి సినిమాలను ప్రొడ్యూస్ చేస్తూ వస్తున్నాడు. 'నీలం ప్రొడక్షన్స్' అనే నిర్మాణ సంస్థను ఏర్పాటు చేసి కథాబలం ఉన్న సినిమాలను తీస్తూ వస్తున్నాడు. ఈ క్రమంలోనే ఖాదిర్ - ఆనందీ హీరోహీరోయిన్లుగా 'పరియేరుమ్ పెరుమాళ్' సినిమా తీసి సూపర్ హిట్ అందుకున్నాడు. ఈ సినిమా ఎన్నో అవార్డులతో పాటు రివార్డులను కూడా తెచ్చిపెట్టింది. ఆ తర్వాత 'గుండు' అనే సినిమా నిర్మించి సక్సెస్ ఫుల్ ప్రొడ్యూసర్ అనిపించుకున్నాడు. ప్రస్తుతం తమిళ హీరో ఆర్యతో ఒక సినిమా చేస్తున్న పా.రంజిత్.. తన అసిస్టెంట్ ని డైరెక్టర్ గా పరిచయం చేస్తూ ఒక సినిమా నిర్మించబోతున్నాడని సమాచారం. ఈ సినిమాలో తమిళ స్టార్ కమెడియన్ యోగిబాబు ప్రధాన పాత్రలో నటించబోతున్నారట. దీనికి సంబందించిన అధికారిక ప్రకటన రావాల్సి ఉంది. యోగిబాబు ప్రస్తుతం కోలీవుడ్ లో బిజీ కమెడియన్ గా కొనసాగుతున్నాడు. కేవలం అతన్ని దృష్టిలో పెట్టుకొనే క్యారెక్టర్స్ క్రియేట్ చేస్తుంటారు దర్శకులు. 'కోకిల' అనే సినిమాలో నయనతారని లవ్ చేసే వ్యక్తిగా కనిపించి అలరించాడు. మరి ఇప్పుడు మరోసారి కీలక పాత్రలో నటించి ప్రేక్షకులను అలరిస్తాడో చూడాలి.