‘శమంతకమణి’ చేయకూడదనుకున్నా-నారా రోహిత్

టాలీవుడ్లో ఇద్దరు హీరోలు కలిసి నటించడమే అరుదు. అలాంటిది ‘శమంతకమణి’లో ఏకంగా నలుగురు యువ కథానాయకులు కలిసి నటించారు. ఆ కలయిక జనాల్లో ఆసక్తి రేకెత్తించింది. దీని టీజర్.. ట్రైలర్ కూడా సినిమా మీద అంచనాలు పెంచాయి. మంచి అంచనాల మధ్య ఈ శుక్రవారమే విడుదల కాబోతున్న ‘శమంతకమణి’.. అంచనాలకు తగ్గట్లు ఉంటే టాలీవుడ్లో సరికొత్త ట్రెండుకు శ్రీకారం చుట్టడం ఖాయం. ఐతే ఇంత మంచి బజ్ తెచ్చుకున్న సినిమాలో అసలు నటించొద్దని అనుకున్నాడట నారా రోహిత్. అందుకు కారణం తనకు ఈ చిత్రంలో పోలీస్ క్యారెక్టర్ ఆఫర్ చేయడమేనట.

ఇప్పటికే తాను మూడు సినిమాల్లో పోలీస్ పాత్రల్లో నటించానని.. మళ్లీ పోలీస్ క్యారెక్టర్ అంటే మొనాటనీ వచ్చేస్తుందన్న ఉద్దేశంతో ‘శమంతకమణి’ చేయొద్దని అనుకున్నానని రోహిత్ తెలిపాడు. ఐతే ఈ కథ విన్నాక తాను కాదని అనలేకపోయానని చెప్పాడు. వాస్తవానికి తాను చేసిన పాత్ర ముందు నాగశౌర్య దగ్గరికి వెళ్లిందని.. కానీ అతను చేయలేక తనకు రెఫర్ చేశాడని.. ఈ విషయంలో అతడికి థ్యాంక్స్ చెప్పాలని రోహిత్ అన్నాడు. ఈ సినిమాతో తనకు సందీప్ కిషన్.. ఆది.. సుధీర్ బాబుల రూపంలో ముగ్గురు మంచి మిత్రులు దొరికారని.. శ్రీరామ్ ఆదిత్య ఈ చిత్రాన్ని చాలా బాగా డీల్ చేశాడని రోహిత్ తెలిపాడు. నిర్మాత భవ్య ఆనంద్ ప్రసాద్ కు ‘శమంతకమణి’ పైసా వసూల్ సినిమా కావాలని.. తర్వాత సెప్టెంబరులో ‘పైసా వసూల్’ కూడా మంచి విజయాన్ని అందించాలని రోహిత్ ఆకాంక్షించాడు.