ప్రేమమ్ రీమేక్.. నాగ్, వెంకీ ఏం చేస్తారు?

ఈ ఏడాది మలయాళంలో బిగ్గెస్ట్ బ్లాక్ బస్టర్ గా నిలిచిన సినిమా ‘ప్రేమమ్’. ఈ చిత్రాన్ని తెలుగులో నాగచైతన్య కథానాయకుడిగా రీమేక్ చేస్తున్న సంగతి తెలిసిందే. చైతూ మామూలుగానే లవ్ స్టోరీలకు ఫేమస్. ఇది మంచి ఫీల్ గుడ్ లవ్ స్టోరీ కావడంతో ఈ ప్రాజెక్టుకు ముందే మంచి క్రేజ్ వచ్చేసింది. చందూ మొండేటి లాంటి టాలెంటెడ్ డైరెక్టర్ ఈ సినిమాకు దర్శకత్వం వహిస్తుండటం, రాధాకృష్ణ లాంటి ఫేమస్ ప్రొడ్యూసర్ సినిమాను నిర్మిస్తుండటంతో ఇంకా షూటింగ్ కూడా మొదలవకముందే పాజిటివ్ బజ్ నెలకొంది ఈ మూవీ మీద. దీనికి తోడు నాగార్జున - వెంకటేష్ లాంటి సీనియర్ స్టార్ హీరోలు ఇందులో ముఖ్య పాత్రలు పోషిస్తుండటం మరింత ఆసక్తి కలిగించేదే.

ఇంతకీ నాగార్జున - వెంకటేష్ ఇందులో ఎలాంటి పాత్రలు పోషిస్తారా అని జనాలు ఆసక్తితో ఉన్నారు. విశ్వసనీయ సమాచారం ప్రకారం ఇందులో నాగార్జున చైతూకి తండ్రిగా నటిస్తాడట. సినిమాలో ఓ సన్నివేశంలో చైతూ అండ్ గ్యాంగ్ పోకిరి వేషాలపై సీరియస్ అయిన ప్రిన్సిపాల్ వాళ్ల తండ్రుల్ని పిలుస్తాడు. ఆ సందర్భంగా హీరో తండ్రి వచ్చి ప్రిన్సిపాల్ కే ఝలక్ ఇస్తాడు. ఇది కేవలం ఐదు నిమిషాల సన్నివేశమే. ఈ సీన్ లోనే నాగ్ సందడి చేయబోతున్నాడు. ఇక వెంకీది హీరో ఫస్ట్ లవర్ కి తండ్రి పాత్ర అంటున్నారు. తన కూతురి వెంట పడే అబ్బాయిల్ని చితకబాదడం ఈ పాత్ర నైజం. నాగ్ - వెంకీలు పోషించబోయే పాత్రలు రెండూ ఒరిజినల్ లో బాగా హైలైట్ అయ్యాయి. చందూ మొండేటి ఆ పాత్రల్ని మరింత ఆసక్తికరంగా తీర్చిదిద్దాడట.