చిన్నదాని దూకుడు ఓ రేంజ్ లోనే ఉందే!

తెలుగు తెరకి ఈ ఏడాదిలో పరిచయమవుతున్న కథానాయికలలో మీనాక్షి చౌదరి ఒకరు. పిల్లగాళ్లను రెచ్చగొట్టే అందాలు పుష్కలంగా ఉన్న పిల్లనే. 'ఇచ్చట వాహనములు నిలుపరాదు' సినిమా ద్వారా క్రితం ఏడాదిలోనే ఈ అమ్మాయి ప్రేక్షకులను పలకరించవలసి ఉంది. కానీ లాక్ డౌన్ కారణంగా ఈ సినిమా విడుదల తేదీ వాయిదా పడుతూ వస్తోంది. త్వరలోనే ఈ సినిమా విడుదల కానుంది. ఈ సినిమా ఇంకా థియేటర్లను వెతుక్కుంటూ ఉండగానే మీనాక్షి చౌదరి ఏకంగా రవితేజ సినిమాలో ఛాన్స్ కొట్టేసింది.

రవితేజ హీరోగా రమేశ్ వర్మ దర్శకత్వంలో 'ఖిలాడి' సినిమా రూపొందుతోంది. రవితేజ బాడీ లాంగ్వేజ్ కి తగిన కథతో ఈ సినిమా నిర్మితమవుతోంది. 'క్రాక్' వంటి సూపర్ హిట్ తరువాత రవితేజ చేస్తున్న సినిమా కావడంతో,ఈ సినిమాపై భారీ అంచనాలు ఉన్నాయి. ఈ సినిమాలో ఇద్దరు కథానాయికలు ఉండగా, ఒక కథానాయిక కోసం మీనాక్షి చౌదరిని తీసుకున్నారు. చాలా తక్కువ సమయంలోనే ఈ అమ్మాయి రవితేజ సరసన ఛాన్స్ సంపాదించుకోవడం విశేషంగా చెబుతున్నారు.

ఇక ఈ సినిమా కూడా సెట్స్ పై ఉండగానే ఈ పిల్ల మరో ప్రాజెక్టుకి గ్రీన్ సిగ్నల్ ఇచ్చేసింది. క్రితం ఏడాది విష్వక్సేన్ కథానాయకుడిగా 'HIT' సినిమా వచ్చిన సంగతి తెలిసిందే. నాని నిర్మించిన ఈ సినిమాకి శైలేశ్ కొలను దర్శకత్వం వహించాడు. ఓ మాదిరి బడ్జెట్ తో రూపొందిన ఈ సినిమా సక్సెస్ ను సాధించింది. దాంతో ఆ సినిమాకి సీక్వెల్ గా 'HIT 2' సినిమాను నిర్మించడానికి సన్నాహాలు జరుగుతున్నాయి. ఈ సినిమాలో హీరోగా అడివి శేష్ చేయనున్నాడు. ఆయన జోడీగా మీనాక్షి చౌదరిని తీసుకున్నారు. ఈ సినిమా కూడా ఈ ఏడాదిలోనే విడుదల కానుంది. చూస్తుంటే ఈ అమ్మాయి దూకుడు ఒక రేంజ్ లోనే సాగే అవకాశాలు కనిపిస్తున్నాయి కదూ.