క్రేజీ ఫైట్ మాస్ట‌ర్స్ తో లారెన్స్

ర‌జ‌నీకాంత్ న‌టించిన త‌మిళ చిత్రంతో అసిస్టెంట్డ్ డ్యాన్స‌ర్‌గా కెరీర్ ప్రారంభించిన రాఘ‌వ లారెన్స్ క్రేజీ డ్యాన్స్ మాస్ట‌ర్ గా, డైరెక్ట‌ర్‌గా, హీరోగా మంచి పేరు తెచ్చుకున్నాడు. సంగీత ద‌ర్శ‌కుడిగానూ త‌న స‌త్తా చాటి బ‌హుముఖ ప్ర‌తిభ‌ని చాటుకున్నారు. `ముని`తో లారెన్స్ న‌ట ప్ర‌స్థానం ట్రాక్‌లోకి వ‌చ్చేసింది. ఆ త‌రువాత ఈ సిరీస్ చిత్రాలతో బాక్సాఫీస్ వ‌ద్ద కాసుల వర్షం కురిపించి హార‌ర్, థ్రిల్ల‌ర్ చిత్రాల‌కు కేరాఫ్ అడ్ర‌స్ గా నిలిచాడు. డ్యాన్స్ మాస్ట‌ర్ గా ఎంత పేరు తెచ్చుకున్నాడో ద‌ర్శ‌కుడిగా అంత‌కు మించి పేరు సంపాదించుకున్నాడు.

`ముని` సిరీస్ చిత్రాల్లో భాగంగా రూపొందించిన `కాంచ‌న -3` త‌రువాత కొంత గ్యాప్ ఇచ్చారు లారెన్స్. ఆయ‌న నుంచి సినిమా వ‌చ్చి మూడేళ్ల‌వుతోంది. ఇదిలా వుంటే తాజాగా లారెన్స్ రెండు మూడు చిత్రాల్ని బ్యాక్ టు బ్యాక్ రెడీ చేసే ప‌నిలో బిజీ అయిపోయారు. ఇందులో `రుద్ర‌న్‌`, అధిగారం` చిత్రాలు చిత్రీక‌ర‌ణ ద‌శ‌లో వున్నాయి. ఇందులో హాట్ టాపిక్ గా నిలిచిన చిత్రం `దుర్గ‌`. కొన్ని రోజుల క్రితం ఈ మూవీ నుంచి లారెన్స్ కు సంబంధించిన లుక్ ని విడుద‌ల చేశారు.

ఆ లుక్ చూసిన ప్రేక్ష‌కులు ఒక్క‌సారిగా షాక్ కు గుర‌య్యారు. ఏంటిది లారెన్సేనా? అని..అనుమానం వ్య‌క్తం చేశారు కూడా. ముస‌లి అవ‌తారంలో అంత చిత్రంగా వుంది లారెన్స్ లుక్‌. ఈ స్టిల్ చూసిన వాళ్ల‌లో చాలా మంది మ‌ళ్లీ కాంచ‌నకు మ‌రో సీక్వెల్ ని లారెన్స్ రెడీ చేస్తున్నాడ‌ని అంతా అనుకున్నారు. కానీ దీనికి సంబంధించి ఎలాంటి ప్ర‌క‌ట‌న రాలేదు. లారెన్స్ కూడా స్పందించ‌లేదు.

ఇదిలా వుంటే ఈ మూవీకి సంబంధించిన తాజాగా ఓ షాకింగ్ విష‌యం బ‌య‌టికి వ‌చ్చింది. తాజా చిత్రానికి లారెన్స్ ద‌ర్శ‌క‌త్వం చేయ‌డం లేద‌ని, తాను ఆ బాధ్య‌త‌ల్ని మ‌రో ఇద్ద‌రు క్రేజీ ద‌ర్శ‌కుల‌కు అప్ప‌గించార‌ని తెలిసింది. ఆ ఇద్ద‌రూ కోలీవుడ్ క్రేజీ ఫైట్ మాస్ట‌ర్స్ అన్బు - అరివు. విశేషం ఏంటంటే వీరిద్ద‌రు క‌ల‌వ‌ల‌లు. అంతే కాకుండా తెలుగు, త‌మిళ ఇండ‌స్ట్రీల్లో వీరు బాగా పాపుల‌ర్ ఫైట్ మాస్ట‌ర్స్‌. అయితే డైరెక్ష‌న్ మాత్రం కొత్తే. అయినా ఈ ఇద్ద‌రు క‌ల‌వ‌ల సోద‌రుల‌నే లారెన్స్ త‌న తాజా చిత్రానికి డైరెక్ట‌ర్స్ గా ఎంచుకున్నారు.

సూప‌ర్ స్టార్ ర‌జ‌నీకాంత్ న‌టించిన `క‌బాలి` సినిమాతో ఫైట్ మాస్ట‌ర్స్ గా కెరీర్ ప్రారంభించిన వీరు `కెజీఎఫ్‌`తో దేశ వ్యాప్తంగా పాపుల‌ర్ అయ్యారు. ఆ త‌రువాత ప‌లు క్రేజీ చిత్రాల‌కు యాక్ష‌న్ డైరెక్ట‌ర్స్ గా వ‌ర్క్ చేసిన వీరు ప్ర‌స్తుతం `బీస్ట్` మూవీకి వ‌ర్క్ చేస్తున్నారు. ఫైట్ మాస్ట‌ర్స్ గా పేరు తెచ్చుకున్న ఈ ఇద్ద‌రు ట్విన్స్‌ని త‌న థ్రిల్ల‌ర్ మూవీకి లారెన్స్ డైరెక్ట‌ర్స్ గా ఎంచుకోవ‌డం ఆస‌క్తిక‌రంగా మారింది.

ఈ క్రేజీ ఫైట్ మాస్ట‌ర్స్ తో లారెన్స్ ఎలాంటి ఝ‌ల‌క్ ఇవ్వ‌బోతున్నాడు?. ఈ సారి ఏ రేంజ్ లో భ‌య‌పెట్టబోతున్నాడో అని త‌మిళ, తెలుగు ఇండ‌స్ట్రీల్లో హాట్ చ‌ర్చ జ‌రుగుతోంది. లారెన్స్ ఈ ఇద్ద‌రితో ప్ర‌యోగం చేయ‌బోతున్నాడా? లేక ముని సిరీస్ ల‌కు మించి థ్రిల్ల‌ర్ ఎంట‌ర్ టైన‌ర్ తో భ‌య‌పెట్ట‌బోతున్నాడా? అన్న‌ది తెలియాలంటే ఈ మూవీ లేటెస్ట్ అప్ డేట్ వ‌చ్చే వ‌ర‌కు వేచి చూడాల్సిందే.