15 కోట్ల ఆడియో వేడుక.. చీఫ్ గెస్ట్ ఎవరు?

భారతీయ సినీ చరిత్రలోనే కనీ వినీ ఎరుగని స్థాయిలో ‘2.0’ ఆడియో వేడుకను చేయడానికి రంగం సిద్ధం చేసింది చిత్ర బృందం. ఏకంగా రూ.15 కోట్ల ఖర్చుతో దుబాయ్‌లోని ప్రపంచ ప్రఖ్యాత బుర్జ్ సెంటర్లో ఈ ఆడియో వేడుకను చేయడానికి సన్నాహాలు జరుగుతున్నాయి. సంగీత దర్శకుడు ఎ.ఆర్.రెహమాన్ ఈ వేడుకలో లైవ్ పెర్ఫామెన్స్ ఇవ్వబోతుండటం విశేషం. ఐతే ఇంత భారీ స్థాయిలో చేయబోయే ఈ ఆడియో వేడుకకు ముఖ్య అతిథి ఎవరు అంటూ అందరూ ఆసక్తిగా ఎదురు చూస్తున్నారు. ఈ ప్రశ్నకు జవాబు దొరికింది. లెజెండరీ యాక్టర్ కమల్ హాసన్ ‘2.0’ ఆడియో వేడుకకు చీఫ్ గెస్టుగా హాజరవుతున్నారట. చిత్ర బృందంతో పాటు ప్రత్యేక విమానంలో ఆయన దుబాయి వెళ్లబోతున్నారట. ఈ నెల 27న సాయంత్రం ‘2.0’ ఆడియో వేడుక జరుగుతుంది.

‘భారతీయుడు’ తర్వాత కమల్ హాసన్.. శంకర్‌ తో మరోసారి జత కట్టబోతున్న సంగతి తెలిసిందే. వీళ్లిద్దరూ భారతీయుడు సీక్వెల్ చేయబోతున్నారు. ఈ నేపథ్యంలోనే శంకర్ అడగ్గానే కమల్ ఈ ఆడియో వేడుకకు రావడానికి అంగీకరించారట. దీంతో తమిళ సినీ పరిశ్రమకు రెండు కళ్లు అనదగ్గర రజినీ.. కమల్ లను ఈ భారీ ఆడియో వేడుకలో చూసే అవకాశం అభిమానులకు దక్కబోతోంది. ఆడియో వేడుక తర్వాత వచ్చే నెలలో హైదరాబాద్ వేదికగా ‘2.0’ టీజర్ లాంచ్ చేయబోతుండట విశేషం. డిసెంబర్లో చెన్నైలో ట్రైలర్ లాంచ్ ఉంటుంది. 2018 జనవరి 25న ‘2.0’ ప్రేక్షకుల ముందుకొస్తుంది.