తలైవి బయోపిక్ ఐదు బాషలలో రానుందా..?

ఒక సినీతారగా - ఒక పార్టీ అధినేత్రిగా - ఒక ముఖ్యమంత్రిగా - ఓ ఐరన్ లేడీగా.. జయలలిత చరిత్ర ఎంతో గొప్పది. ఆమె జీవితంలో రక్తికట్టించే మలుపులు - అనూహ్య సంఘటనలు ఎన్నో ఉన్నాయి. అందుకే బయోపిక్ లు రూపొందించే దర్శక నిర్మాతలకు ఇప్పుడామె పెద్ద అసెట్ అయింది. ఇప్పుడామె జీవితాన్నే కథాంశంగా బయోపిక్ రూపొందిస్తున్నారు. తెలుగు - తమిళం - కన్నడ భాషల్లో 140 పైగా సినిమాల్లో కథానాయికగా విభిన్న పాత్రలు పోషించారు జయలలిత. తాజాగా కంగనా రనౌత్ ప్రధాన పాత్రలో విజయ్ దర్శకత్వంలో జయలలిత బయోపిక్ తెరకెక్కుతోంది. ఈ సినిమాకు 'తలైవి' అనే పేరు ఖరారు చేశారు. అంతేకాదు దానికి సంబంధించిన ఫస్ట్ లుక్ ను రిలీజ్ చేస్తే మంచి రెస్పాన్స్ వచ్చింది.

'మణికర్ణిక' వంటి హిస్టారికల్ మూవీ తర్వాత రనౌత్ నటిస్తోన్న బయోపిక్ ఇదే. ఈ సినిమాకు రాజమౌళి తండ్రి విజయేంద్ర ప్రసాద్‌ తో పాటు 'డర్టీ పిక్చర్' కథా రచయిత రజత్ అరోరా కథా సహకారం అందిస్తున్నారు. ఈ సినిమాను విబ్రీ మీడియా పతాకంపై విష్ణు వర్థన్ ఇందూరి నిర్మిస్తున్నారు. జయలలిత జీవితంలోని ప్రధాన ఘట్టాలైన అన్ని అంశాలు ఈ సినిమాలో ఉంటాయట. పదహారేళ్ల వయసు నుండి ఆరు పదుల వయసు వరకూ మొత్తం నాలుగు గెటప్ లలో కంగనా కనిపించనుందట. తెలుగు - తమిళ హిందీ బాషలలో రూపొందుతున్న ఈ సినిమాపై కన్నడ - మలయాళం ఇండస్ట్రీలలో కూడా పాజిటివ్ గా ఉన్నట్లు సమాచారం. కాబట్టి వంద కోట్లు పెట్టినా ఈజీగా రికవరీ అవుతాయని నిర్మాతలు భావిస్తున్నారట.

ఇదిలా ఉండగా ఈ సినిమాకోసం కంగనా తమిళం కూడా నేర్చుకుంటుందట. తాజా సమాచారం ప్రకారం.. కంగనా మేకప్ కోసం హాలీవుడ్ టెక్నీషియన్లను నియమించారట. అయితే కంగనా తలైవి లుక్ లో కనిపించలేదని విమర్శలు రావడంతో చిత్రబృందం కంగనా మేకప్ విషయంలో మరిన్ని జాగ్రత్తలు తీసుకుంటుంది. పైగా కరోనా కారణంగా మేకప్ టెక్నీషియన్స్ మారే అవకాశం కూడా ఉన్నట్లు తెలుస్తోంది. హాలీవుడ్ టెక్నీషియన్స్ బదులు ఇక్కడి టెక్నీషియన్స్ నే నియమించనున్నట్లు తెలుస్తుంది. చూడాలి మరి కంగనా తలైవిగా ఎలా అలరించనుందో..!