బీప్ సాంగ్ దెబ్బ.. అతణ్ని పీకేశారు

హీరో ధనుష్, మ్యూజిక్ డైరెక్టర్ అనిరుధ్ ల మధ్య ఉన్న స్నేహం గురించి కోలీవుడ్లో అందరికీ తెలుసు. రజినీకాంత్ భార్య మేనల్లుడైన అనిరుధ్ ను సంగీత దర్శకుడిగా పరిచయం చేసింది ధనుషే. వాళ్లిద్దరి కాంబినేషన్లో 3, వేల ఇల్ల పట్టాధారి (రఘువరన్ బీటెక్), తంగ మగన్ (నవ మన్మథుడు) లాంటి పెద్ద మ్యూజికల్ హిట్స్ వచ్చాయి. దీని తర్వాత అనిరుధ్ తో డబుల్ హ్యాట్రిక్ కు శ్రీకారం చుట్టే ఉద్దేశంతో తన కొత్త సినిమా ‘కోడి’లోనూ మ్యూజిక్ డైరెక్టర్ గా ఛాన్స్ ఇచ్చాడు ధనుష్. కానీ ‘బీప్ సాంగ్’ గొడవ పుణ్యమా అని అనిరుధ్ ను ఈ చిత్రం నుంచి తప్పించక తప్పలేదు ధనుష్. ముందు అనిరుధ్ ను మ్యూజిక్ డైరెక్టర్ గా అనౌన్స్ చేసిన ధనుష్.. అనూహ్యంగా అతణ్ని తప్పించి సంతోష్ నారాయణ్ ను ఎంచుకున్నాడు.

శింబు రాసి, ఆలపించిన ‘బీప్ సాంగ్’కు బాణీలు కట్టింది అనిరుధే. ఇందులో అనిరుధ్ తప్పేమీ లేదని శింబు చెప్పినా.. దానికి బాణీలు కట్టాడు కాబట్టి అతణ్ని కూడా ఈ కేసులో నిందితుడిగా చేర్చారు. అసలీ పాట బయటికి రావడానికి అనిరుధే కారణమన్న అభిప్రాయాలు కూడా ఉన్నాయి. శింబు సరదాగా ఆ పాటను తనకు పంపితే.. అతనో హీరోకు పంపించడం.. ఆ తర్వాత అది వాట్సాప్ లోకి రావడం.. పెద్ద గొడవ చెలరేగడం.. ఈ పరిణామాలన్నీ చోటు చేసుకున్నాయి. ‘బీప్ సాంగ్’ గొడవ తర్వాత తమిళనాట శింబు అన్నా.. అనిరుధ్ అన్నా మహిళలు మండి పడుతున్న నేపథ్యంలో ధనుష్ కూడా జాగ్రత్త పడ్డాడు. అనిరుధ్ వల్ల తన సినిమాకు ఎక్కడ ఇబ్బంది వస్తుందో అని తమ స్నేహాన్ని కూడా పక్కనబెట్టేసి అతడి స్థానంలో సంతోష్ ను ఎంచుకున్నాడు. మొత్తానికి ‘బీప్ సాంగ్’ పుణ్యమా అని అనిరుధ్ కు పెద్ద దెబ్బే పడింది. మున్ముందు అతను ఇంకెన్ని దెబ్బలు తింటాడో?