'క్రేజీ అంకుల్స్‌' నుంచి 'అనుకున్నదొక్కటి అయినది ఒక్కటీ' సాంగ్..!

బుల్లితెర బ్యూటీ యాంకర్, 'బిగ్ బాస్' ఫేమ్ శ్రీముఖి ప్రధాన పాత్రలో రూపొందిన తాజా చిత్రం ''క్రేజీ అంకుల్స్‌''. ఇందులో సింగర్ మనో (నాగూర్ బాబు) - రాజారవీంద్ర - భరణి - పోసాని కృష్ణ మురళి ఇతర ప్రధాన పాత్రల్లో నటించారు. ఇ.సత్తిబాబు ఈ చిత్రానికి దర్శకత్వం వహించారు. కిరణ్ తలసిల సమర్పణలో గుడ్‌ సినిమా గ్రూప్‌ మరియు బొడ్డు అశోక్ సంయుక్తంగా ఈ చిత్రాన్ని నిర్మించారు. ఆగస్ట్ 19న ఈ చిత్రాన్ని ప్రేక్షకుల ముందుకు తీసుకొస్తున్నారు. ఈ నేపథ్యంలో ఇటీవల విడుదలైన ట్రైలర్ మంచి రెస్పాన్స్ తెచ్చుకుంది. ఈ క్రమంలో తాజాగా సినిమాలోని 'అనుకున్నదొక్కటి అయినది ఒక్కటీ' అనే సాంగ్ ని రిలీజ్ చేశారు.

'అనుకున్నదొక్కటి అయినది ఒక్కటీ.. ఆడదాని కోసం ఆడపడితే తందానాకు అయ్యింది..' అంటూ సాగిన ఈ పాట అలరిస్తోంది. భోలే శవాలి దీనికి ట్యూన్ సమకూర్చడమే కాకుండా స్వయంగా ఆలపించారు. ఈ సాంగ్ కు ఆనంద్ గుర్రం సాహిత్యం అందించారు. ఇరవైల్లో చెయ్యని అల్లర్లు యాభైల్లో చేయాలని క్రేజీ అంకుల్స్.. ఒక అమ్మాయి ప్రేమ కోసం పడే పాట్లని ఇందులో చూపించారు. ఈ చిత్రానికి పి. బాల్ రెడ్డి సినిమాటోగ్రఫీ అందించగా.. నాగేశ్వర్ రెడ్డి ఎడిటింగ్ వర్క్ చేశారు. 'క్రేజీ అంకుల్స్' మూవీకి డార్లింగ్ స్వామి స్టోరీ మరియు డైలాగ్స్ అందించారు. ఈ చిత్రంలో, గిరిధర్‌ - అదుర్స్‌ రఘు - హేమ తదితరులు ఇతర పాత్రలో నటించారు. ఈ నెల 19న థియేటర్లలోకి వస్తున్న ఈ చిత్రం ఎలాంటి విజయాన్ని అందుకుంటుందో చూడాలి.