జెస్సీ TO ఆరాధ్య... సమంత@14

నాగ చైతన్య హీరోగా నటించిన ఏమాయ చేశావే సినిమాలో జెస్సీగా నటించడం ద్వారా తెలుగు ప్రేక్షకులకు హీరోయిన్ గా పరిచయం అయిన సమంత సుదీర్ఘమైన సినీ కెరీర్‌ లో ఎన్నో అద్భుతమైన విజయాలను సొంతం చేసుకుంది. ఈ ప్రయాణంలో ఆమె ఎన్నో అరుదైన రికార్డులను సొంతం చేసుకుంది.

రెగ్యులర్‌ కమర్షియల్‌ హీరోయిన్ పాత్రలతో పాటు ఆకట్టుకునే లేడీ ఓరియంటెడ్‌ పాత్రలను కూడా చేయడం ద్వారా సమంతకు మంచి గుర్తింపు లభించింది. నటిగా తనను తాను నిరూపించుకునేందుకు పలు ఛాలెంజింగ్ రోల్స్ ను చేయడం జరిగింది. మొత్తంగా ఈ 14 ఏళ్లలో సమంత చాలా దూరం వచ్చేసింది.

జెస్సీగా సింపుల్ గా సినీ కెరీర్ ను ప్రారంభించిన సమంత యశోద, శాకుంతలం అంటూ లేడీ ఓరియంటెడ్‌ చిత్రాలకు కేరాఫ్‌ అడ్రస్ గా మారింది. ఇక విజయ్ దేవరకొండతో ఖుషి సినిమాలో ఆరాధ్యగా నటించి మెప్పించింది. మొత్తంగా ఆకట్టుకునే అందం తో మంచి నటనతో దాదాపు దశాబ్దంనర సినీ కెరీర్ లో పలు విజయాలను సొంతం చేసుకుంది.

గత ఏడాది కాలంగా సమంత సినిమాల షూటింగ్స్ కు దూరంగా ఉంటున్న విషయం తెల్సిందే. వరుసగా అనారోగ్య సమస్యలతో పాటు, అస్సలు విశ్రాంతి లేక పోవడం వల్ల సమంత ఇబ్బందులు ఎదుర్కొంది. అందుకే ఏడాది పాటు పూర్తిగా విశ్రాంతి తీసుకోవాలనే ఉద్దేశ్యంతో సమంత బ్రేక్‌ తీసుకున్నట్లుగా సమాచారం అందుతోంది.

బ్రేక్ నుంచి తిరిగి వచ్చిన సమంత త్వరలోనే వరుసగా సినిమాలు చేస్తూ బిజీగా మారబోతుంది. ఇదే ఏడాదిలో సమంత నటించిన సిటాడెల్ వెబ్‌ సిరీస్ ప్రేక్షకుల ముందుకు రాబోతుంది. ఇదే ఏడాది చివరి వరకు ఆమె నుంచి ఏదో ఒక భాషలో సినిమా కూడా వచ్చే అవకాశాలు ఉన్నాయని ఆమె సన్నిహితులు చెబుతున్నారు.