పాక్​ కెప్టెన్​ బాబర్​కు షాక్​..! రూ. 45 లక్షలు భరణం ఇవ్వాలంటూ కోర్టుకెక్కిన యువతి..!

పాక్​ క్రికెట్​ జట్టు కెప్టెన్​ బాబర్​ ఆజమ్​ పై కొంతకాలంగా ఓ యువతి ఆరోపణలు చేస్తున్న విషయం తెలిసిందే. అయితే ఆమె తాజాగా కోర్టుకెక్కింది. తాను కేసు ఉపసంహరించుకోవాలంటే బాబర్​ రూ. 45 లక్షలు భరణం చెల్లించాలంటూ ఆమె డిమాండ్​ చేసింది. బాబర్​ తనను మోసం చేశాడని.. లైంగికంగా వాడుకున్నాడని హమీజా అనే యువతి కొంతకాలం క్రితం పోలీసులకు ఫిర్యాదు చేసిన విషయం తెలిసిందే. బాబర్​ తనను గర్భవతిని చేశాడని కూడా ఆమె ఫిర్యాదులో పేర్కొన్నారు.

మరోవైపు కేసు ఉపసంహరించుకోవాలంటూ బాబర్​ మనుషులు బెదిరించారని కూడా సదరు యువతి గతంలో మీడియాతో చెప్పారు. అయితే ఈ విషయం పాకిస్థాన్​తో పాటు ప్రపంచవ్యాప్తంగా సంచలనంగా మారింది. ప్రస్తుతం యువతి కోర్టులో పిటిషన్​ వేయడంతో మరోసారి ఈ ఘటన వెలుగుచూసింది. బాబర్‌ ఆజమ్‌పై కేసును విత్​డ్రా చేసుకోవాలంటే రూ.45 లక్షలు భరణంగా ఇవ్వాలంటూ హమీజా ముక్తర్ డిమాండ్ చేస్తున్నారు. ఆ మేరకు ఆమె కోర్టులో పిటిషన్‌ కూడా దాఖలు చేశారు.

హమీజా పిటిషన్‌పై గురువారం పాక్ సెషన్స్‌ కోర్టు విచారణ చేపట్టింది. హమీజ్​ బాబర్​పై తప్పుడు ఆరోపణలు చేస్తున్నారని.. ఆమెకు ఒక్కరూపాయి కూడా ఇవ్వాల్సిన అవసరం లేదని బాబర్​ తరఫు న్యాయవాదులు కోర్టుకు చెప్పారు. గతంలో హమీజా ఏమన్నదంటే.. ‘బాబర్​ నేను స్కూల్​ ఫ్రెండ్స్​. అతడు క్రికెటర్​ కాకముందే నేను ఎంతో ఆర్థికసాయం చేశాను. 2010లో నన్ను పెళ్లిచేసుకుంటానని బాబర్​ మాటిచ్చాడు. నేను అతడితో సహజీవనం చేశాను. గర్భవతిని కూడా అయ్యాను.

కానీ బాబర్​ స్టార్​ క్రికెటర్​ అయ్యాక నన్ను మరిచిపోయినట్టు నటిస్తున్నాడు. నన్ను దూరం పెడతున్నాడు. నాకు పోలీసులు కూడా సాయం చేయడం లేదు. బాబర్​ వైపే మాట్లాడుతున్నారు’ అంటూ గతంలో ఆమె ఆరోపణలు చేశారు.