మంత్రి కొడుకు చెప్పుతో కొడతానంటున్నాడు

మర్యాదలు రోజురోజుకీ తగ్గిపోతున్నాయి. తమలోని ఆవేశాన్ని.. ఆగ్రహాన్ని.. చిరాకును ప్రదర్శించేందుకు పెద్ద పెద్ద మాటల్ని అనేందుకు ఎవరూ వెనుకాడటం లేదు. ఎవరికి నచ్చినట్లుగా వారుగా మాట్లాడేస్తున్నారు. ఎంత మాట పడితే అంత మాట అనేందుకు ఏ మాత్రం వెనుకాడటం లేదు. తాజాగా ఒక మంత్రిగారి అబ్బాయి ఎంతగా నోరు పారేసుకున్నారో చూస్తే అవాక్కు అవ్వాల్సిందే.

రాజకీయాలన్నాక విమర్శలు.. ప్రతివిమర్శలు మామూలే. అయితే గడచిన కొద్ది కాలంగా పెరుగుతున్న అసహనం రోజురోజుకీ పెరిగి పెద్దది అవుతోంది. తమను ఎవరూ ఏమీ అనకూడదన్నట్లుగా ఫీలవుతున్నారు. ఎవరైనా విమర్శిస్తే వారిపై ప్రతి విమర్శలు చేయటం మానేసి తిట్ల పురాణం అందుకోవటం లేదంటే దాడులకు దిగుతామని బెదిరించేందుకు సైతం వెనుకాడటం లేదు. తాజాగా అలాంటి ఘనకార్యాన్నే ప్రదర్శించారు మధ్యప్రదేశ్ రాష్ట్ర అటవీశాఖామంత్రి గౌరిశంకర్ షేజ్వార్ కుమారుడు ముదిత్.

ప్రధాని మోడీ మీద తమకున్నఅభిమానాన్ని ప్రదర్శించే క్రమంలో ఆయన హద్దులు దాటేశారు. దేశంలో నల్లధనానికి చెక్ పెట్టేందుకు మోడీ తీసుకున్న చర్యల్ని విపరీతంగా పొగిడేసిన అతగాడు.. ఇకపై ఎవరైనా అచ్చేదిన్ ఎక్కడా అని ప్రశ్నిస్తే ఊరుకునేది లేదన్నాడు. పెద్దనోట్ల రద్దుతో బ్లాక్ మనీకి మోడీ అడ్డుకట్ట వేశారని.. దీంతో అచ్చేదిన్ వచ్చేసినట్లేనని వ్యాఖ్యానించారు. ఇకపై ఎవరైనా సరే అచ్చేదిన్ ఎక్కడా అని ప్రశ్నిస్తే వారిని చెప్పుతో కొడతానని హెచ్చరించటం గమనార్హం. తాను చేసిన వ్యాఖ్య నచ్చితే తనకు లైక్ కొట్టొచ్చని.. లేకుంటే తన పేజీని అన్ లైక్ చేయొచ్చంటూ ఓపెన్ ఆఫర్ ఇచ్చేయటం చూస్తే.. అతగాడి తీరు ఏమిటో ఇప్పటికే మీకు అర్థమై ఉంటుంది.

Like Us on Facebook : https://www.facebook.com/Tupakidotcom/