35 ఏళ్లలోపు మహిళల్లో సగం మందికి సె*క్స్ అనుభవమే లేదు!

సాంకేతికంగా, ఆర్థికంగా ప్రపంచ దేశాల్లో అగ్రగామిగా దూసుకుపోతున్న జపాన్ సమాజంలో ఊహించని మార్పులు చోటుచేసుకుంటున్నాయి. అక్కడి యువత ఆధునిక జీవనశైలికి అలవాటు పడి, వ్యక్తిగత బంధాలకు పూర్తిగా దూరమవుతోంది. తాజాగా జరిపిన ఒక సామాజిక సర్వేలో అత్యంత షాకింగ్ విషయాలు వెలుగులోకి వచ్చాయి. 35 ఏళ్లలోపు వయసున్న అవివాహిత జపనీస్ మహిళల్లో దాదాపు 50 శాతం మందికి ఇప్పటివరకు ఎలాంటి లైంగిక అనుభవం లేదని ఈ సర్వే తేల్చింది. ప్రేమ, పెళ్లి, శృంగారం వంటి విషయాలపై కొత్త తరం ఆలోచనలు ఎంత వేగంగా మారిపోతున్నాయో చెప్పడానికి ఈ గణాంకాలే నిదర్శనం.

యువతలో పెరుగుతున్న ఒంటరి జీవనం

ఈ సర్వే ప్రకారం.. 18 నుంచి 34 ఏళ్ల మధ్య వయస్సు గల అవివాహిత మహిళల్లో సగానికి పైగా మంది సె*క్స్‌కు దూరంగా జీవిస్తున్నారు. ఆశ్చర్యకరమైన విషయం ఏంటంటే కేవలం మహిళల్లోనే కాదు.. ఇదే వయసున్న పురుషుల్లో కూడా దాదాపు ఇలాంటి ధోరణే కనిపిస్తోందని నిపుణులు చెబుతున్నారు. భాగస్వామితో కలిసి జీవించడం కంటే ఒంటరిగా గడపడానికే ఈ తరం యువత ఎక్కువగా మొగ్గు చూపుతోంది.

బంధాలకు దూరం కావడానికి ముఖ్య కారణాలు..

సామాజిక శాస్త్రవేత్తల విశ్లేషణ ప్రకారం, జపనీస్ యువత బంధాలకు, పెళ్లిళ్లకు దూరం కావడానికి వెనుక బలమైన సామాజిక-ఆర్థిక కారణాలు ఉన్నాయి. జపాన్‌లో వర్క్ కల్చర్ చాలా కఠినంగా ఉంటుంది. కెరీర్, విద్యపైనే పూర్తి దృష్టి పెట్టడం వల్ల వ్యక్తిగత జీవితానికి సమయం దొరకడం లేదు. పెరుగుతున్న జీవన వ్యయం, ఆర్థిక భద్రత లేకపోవడం వల్ల కుటుంబ బాధ్యతలను మోయడానికి యువత భయపడుతోంది. సాంప్రదాయ వివాహ వ్యవస్థ నియమాలకు లోబడి ఉండటం కంటే.. తమ వ్యక్తిగత స్వేచ్ఛకు, లక్ష్యాలకే నేటి తరం ప్రాధాన్యత ఇస్తోంది. కొందరికి ప్రేమపై ఆసక్తి లేకపోతే.. మరికొందరికి తమ ఆలోచనలకు సరిపోయే సరైన భాగస్వామి దొరకకపోవడం కూడా ఒక కారణం.

దేశ భవిష్యత్తుకు పెద్ద ముప్పు!

జపాన్ ఇప్పటికే తగ్గుతున్న జననాల రేటు వేగంగా పెరుగుతున్న వృద్ధుల జనాభా వంటి తీవ్రమైన జనాభా సంక్షోభాన్ని ఎదుర్కొంటోంది. ఇప్పుడు యువతలో పెళ్లిళ్లు, శృంగారంపై ఆసక్తి తగ్గిపోవడం ఆ దేశ భవిష్యత్తును మరింత ప్రమాదంలోకి నెడుతోంది. కొత్త తరం పిల్లలు పుట్టకపోతే రాబోయే రోజుల్లో వర్కింగ్ పాపులేషన్ తగ్గిపోయి, దేశ ఆర్థిక వ్యవస్థ కుప్పకూలే ప్రమాదం ఉందని నిపుణులు హెచ్చరిస్తున్నారు.

ప్రభుత్వ ప్రయత్నాలు విఫలం

యువతను పెళ్లిళ్లు, పిల్లల వైపు ప్రోత్సహించేందుకు జపాన్ ప్రభుత్వం భారీగా నగదు పారితోషికాలు, రాయితీలు వంటి పలు ప్రోత్సాహక పథకాలను అమలు చేస్తోంది. అయినప్పటికీ యువత ఆలోచనా విధానంలో మాత్రం ఆశించిన మార్పు రావడం లేదు.

ఆధునికత పెరిగేకొద్దీ మనుషుల మధ్య బంధాలు, కుటుంబ వ్యవస్థ ఎంత బలహీనపడుతున్నాయో చెప్పడానికి ఆధునిక జపాన్ సమాజమే ఒక స్పష్టమైన ఉదాహరణ. సాంకేతికతతో ప్రపంచాన్ని శాసిస్తున్న దేశం, మానవ సంబంధాల విషయంలో మాత్రం ఒంటరితనంతో కొట్టుమిట్టాడుతోంది.