సాయికృష్ణ కేసు.. సుప్రీంకోర్టులో అనూహ్య పరిణామం

ఏపీలో చర్చనీయాంశంగా మారిన గాదె సాయికృష్ణ కేసులో సుప్రీంకోర్టు విచారణ కీలక దశకు చేరుకుంది. బుధవారం విచారణ సందర్భంగా కేసు తీవ్రతపై ధర్మాసనం ప్రశ్నలు లేవనెత్తగా.. గురువారం జరిగిన తదుపరి విచారణలో ఇప్పటికే హైకోర్టులో ఈ అంశంపై విచారణ కొనసాగుతున్న విషయాన్ని ప్రస్తావించింది.

హైకోర్టు తీర్పు రిజర్వ్ చేసిన నేపథ్యంలో.. అక్కడి ప్రక్రియ పూర్తికాకముందే సుప్రీంకోర్టు జోక్యం చేసుకోవాల్సిన అవసరం ఏమిటన్న అంశాన్ని ధర్మాసనం ప్రశ్నించినట్లు న్యాయవాదులు తెలిపారు. పిటిషనర్‌గా ఉన్న వైసీపీ ఎంపీ గురుమూర్తి ఈ కేసును సుప్రీంకోర్టు వరకు తీసుకురావడానికి గల కారణాలపైనా ధర్మాసనం ప్రశ్నలు సంధించినట్లు సమాచారం.

కేసులో సాయికృష్ణ కుటుంబ సభ్యుల తరఫున కాకుండా ఎంపీ గురుమూర్తి పిటిషన్ దాఖలు చేయడంపైనా ధర్మాసనం ప్రస్తావన చేసినట్లు తెలుస్తోంది. అదే సమయంలో పోలీసులు, సంబంధిత న్యాయ వ్యవస్థలపై విశ్వాసం ఉంచాలని సూచించినట్లు న్యాయవాదులు పేర్కొన్నారు.

గతంలో సాయికృష్ణ కేసులో విజయవాడ సీపీ, డీజీపీ, ఇతర పోలీసు అధికారులపై ఎఫ్‌ఐఆర్ నమోదు చేయాలని కోరుతూ గురుమూర్తి విజయవాడ కోర్టును ఆశ్రయించారు. ఆ పిటిషన్‌పై అనుకూల నిర్ణయం రాకపోవడంతో హైకోర్టును, అనంతరం సుప్రీంకోర్టును ఆశ్రయించారు.

బుధవారం విచారణలో కేసు తీవ్రతపై సుప్రీంకోర్టు చేసిన వ్యాఖ్యల నేపథ్యంలో ఆసక్తి నెలకొనగా.. గురువారం హైకోర్టులో ఇప్పటికే విచారణ కొనసాగుతున్న అంశాన్ని ధర్మాసనం పరిగణనలోకి తీసుకుంది. తదుపరి విచారణను అక్టోబర్ 26కు వాయిదా వేసింది.

ఇక సాయికృష్ణ కేసులో హైకోర్టు తీర్పు, తదుపరి న్యాయపరమైన పరిణామాలు కీలకంగా మారాయి.