హైటెక్ దొంగతనం.. కొత్త జ్యువెలరీ షోరూమ్ను టార్గెట్ చేసిన యూట్యూబర్!
| తమిళనాడులోని మదురైలో తనిష్క్ జ్యువెలరీ షోరూమ్లో రూ.15 కోట్ల విలువైన 11 కిలోల బంగారం చోరీ జరిగింది. యూట్యూబర్ నిశాంత్ కస్టమర్లా రెక్కీ నిర్వహించి, నిర్మాణంలో ఉన్న లిఫ్ట్ మార్గం ద్వారా షోరూమ్లోకి చొరబడి చోరీకి పాల్పడ్డాడు. సీసీటీవీ, కాల్ రికార్డుల ఆధారంగా అతని తండ్రి సురేష్, ఇన్ఫ్లుయెన్సర్ మీనాక్షిని పోలీసులు అరెస్ట్ చేశారు. వారి నుంచి 5 కిలోల బంగారం స్వాధీనం చేసుకోగా, నిశాంత్ పరారీలో ఉన్నాడు.
సినిమాల్లో చూపించే థ్రిల్లింగ్ హైటెక్ దొంగతనాలను తలపించేలా తమిళనాడులో ఒక షాకింగ్ ఘటన జరిగింది. జనానికి వినోదం పంచాల్సిన ఒక యూట్యూబర్, ఏకంగా 15 కోట్ల రూపాయల విలువైన బంగారాన్ని దోచుకుని పోలీసులకే సవాల్ విసిరాడు. అంతేకాదు, ఒక పాపులర్ సోషల్ మీడియా ఇన్ఫ్లుయెన్సర్ కూడా ఈ చోరీ ప్లాన్లో భాగస్వామి కావడం ఇప్పుడు సంచలనంగా మారింది. అసలు ఈ మాస్టర్ ప్లాన్ ఎలా వేశారు? పోలీసులకు ఎలా దొరికిపోయారు? అనే ఆసక్తికర విషయాలు ఇప్పుడు చూద్దాం..
కస్టమర్లా రెక్కీ.. పక్కా స్కెచ్:
తమిళనాడులోని మదురై బైపాస్ రోడ్డులో కొత్తగా ఓపెన్ అయిన తనిష్క్ జ్యువెలరీ షోరూమ్ను నిశాంత్ అనే యూట్యూబర్ టార్గెట్ చేశాడు. చోరీకి ముందు సాధారణ కస్టమర్లా షోరూమ్కు చాలాసార్లు వెళ్లి వచ్చాడు. అక్కడ బంగారు నగలు ఎక్కడ పెడుతున్నారు, సెక్యూరిటీ ఏర్పాట్లు ఎలా ఉన్నాయి అనే విషయాలన్నీ జాగ్రత్తగా గమనించి, తన దొంగతనానికి పక్కాగా స్కెచ్ వేశాడు.
నిర్మాణంలో ఉన్న లిఫ్ట్ ద్వారా ఎంట్రీ:
వేసుకున్న ప్లాన్ ప్రకారం గత వారం నిశాంత్ రంగంలోకి దిగాడు. ఆ బిల్డింగ్లో ఇంకా పని పూర్తికాని ఒక లిఫ్ట్ మార్గం గుండా లోపలికి దూరాడు. ఎవరికీ ఏమాత్రం అనుమానం రాకుండా షోరూమ్లోకి చొరబడి, సుమారు 11 కిలోల బంగారాన్ని ఎత్తుకెళ్లాడు. ఇక మార్కెట్లో దీని విలువ దాదాపు 15 కోట్ల రూపాయల వరకు ఉంటుందని అంచనా.
పట్టించిన టాటూ, కాల్ రికార్డులు:
ఉదయం షోరూమ్ సిబ్బంది దొంగతనం జరిగినట్లు గుర్తించి పోలీసులకు ఫిర్యాదు చేశారు. వెంటనే రంగంలోకి దిగిన పోలీసులు నాలుగు ప్రత్యేక బృందాలను ఏర్పాటు చేసి వేట మొదలుపెట్టారు. సీసీటీవీ ఫుటేజీలో నిందితుడి చేతిపై కనిపించిన ఒక టాటూ, కాల్ డేటా పోలీసులకు పెద్ద క్లూ ఇచ్చాయి. ఇక వీటి సాయంతో కేవలం మూడు రోజుల్లోనే ఈ కేసు చిక్కుముడిని విప్పేశారు.
ఇన్ఫ్లుయెన్సర్, తండ్రి అరెస్ట్.. పరారీలో నిశాంత్:
కాల్ రికార్డుల ఆధారంగా మీనాక్షి అనే ఫేమస్ సోషల్ మీడియా ఇన్ఫ్లుయెన్సర్ను, నిశాంత్ తండ్రి సురేష్ను పోలీసులు అరెస్ట్ చేశారు. ఈ చోరీ కుట్రలో మీనాక్షి కీలక పాత్ర పోషించిందని విచారణలో తేలింది. ఇక దోచుకున్న బంగారంతో నిశాంత్ తప్పించుకోవడానికి అతని తండ్రి సహాయం చేశాడు. ఇక వీరిద్దరి దగ్గర నుంచి పోలీసులు 5 కిలోల బంగారాన్ని స్వాధీనం చేసుకున్నారు.
ప్రస్తుతం ప్రధాన నిందితుడు నిశాంత్ తన ఫోన్ స్విచ్ ఆఫ్ చేసుకుని పరారీలో ఉన్నాడు. అతను దొరికితే మిగిలిన 6 కిలోల బంగారం కూడా దొరుకుతుందని పోలీసులు గాలిస్తున్నారు. ఇక సోషల్ మీడియాలో మంచి ఫాలోయింగ్ ఉన్న వాళ్లు ఇలా ఈజీ మనీ కోసం నేరాల బాట పట్టడం నిజంగా బాధాకరం..