9 నెలల్లోనే రెట్టింపైన వివేక్ రామస్వామి సంపద.. ఏం జరిగింది?

భారతీయ మూలాలున్న అమెరికన్‌ వ్యాపారవేత్త, రాజకీయ నాయకుడు వివేక్‌ రామస్వామి మరోసారి అంతర్జాతీయంగా వార్తల్లో నిలిచారు. కేవలం తొమ్మిది నెలల స్వల్ప వ్యవధిలోనే ఆయన నికర సంపదలో భారీ పెరుగుదల నమోదైంది. ఆయన సంపద ఏకంగా 1.8 బిలియన్‌ డాలర్లకు చేరినట్లు ఫోర్బ్స్ ప్రకటించింది. ఇది దాదాపు 80% పెరుగుదల కావడం విశేషం.

* ఫోర్బ్స్ నివేదికలో భారీ 'జంప్'

మార్చి నెలలో ఫోర్బ్స్ అంచనాల ప్రకారం.. రామస్వామి నికర సంపద 1 బిలియన్‌ డాలర్లుగా ఉండటంతో ఆయనకు ప్రపంచ బిలియనీర్ల జాబితాలో చోటు దక్కలేదు. అయితే తాజాగా విడుదలైన వివరాల ప్రకారం.. ఆయన సంపద రెట్టింపుకు పైగా పెరిగి $1.8 బిలియన్‌ డాలర్లకు చేరింది. ఈ అసాధారణ వృద్ధి అమెరికన్ రాజకీయాలు, ఎన్నికల నేపథ్యంలో ప్రత్యేకంగా చర్చనీయాంశమైంది.

* ఫార్మా రంగం నుంచి బిలియనీర్‌ వరకూ...

39 ఏళ్ల యువ వ్యాపారవేత్తగా అమెరికా రంగంలో వివేక్ రామస్వామి వేగంగా గుర్తింపు పొందారు. ఆయన తన కెరీర్‌ను ప్రముఖ ఫార్మాస్యూటికల్ హెడ్జ్ ఫండ్‌ క్యూ.వీటీలో ప్రారంభించారు. అనంతరం 2014లో ఆయన సొంతంగా రోయివెంట్ సైన్సెస్‌ అనే బయోటెక్ కంపెనీని స్థాపించారు. ఆ కంపెనీ కేవలం ఏడాది కాలంలోనే 3 బిలియన్‌ డాలర్ల విలువను సాధించి, రామస్వామి వ్యాపార దార్శనికతను నిరూపించింది.

* రాజకీయాల్లో దూకుడు: ట్రంప్‌తో అనుబంధం

2023లో అమెరికా అధ్యక్ష ఎన్నికల్లో రామస్వామి పోటీ చేసి, ఆపై రేసు నుంచి తప్పుకున్నారు. అనంతరం ఆయన అధ్యక్షుడు డొనాల్డ్ ట్రంప్‌కు బహిరంగంగా మద్దతు తెలిపారు.ట్రంప్ తిరిగి అధికారంలోకి వచ్చిన తర్వాత ప్రత్యేకంగా ఏర్పాటుచేసిన డీఓజీ ప్రత్యేక విభాగంలో రామస్వామికి కీలక పదవిని కేటాయించి ఆయనపై విశ్వాసం వ్యక్తం చేశారు. అయితే ఆ తర్వాత రామస్వామి ఆ బాధ్యతల నుంచి కూడా తప్పుకున్నారు.

* ఒహాయో గవర్నర్ రేసులో కీలకం

ప్రస్తుతం, ఒహాయో రాష్ట్ర గవర్నర్ పదవికి పోటీ చేయనున్నట్లు రామస్వామి అధికారికంగా ప్రకటించారు. ఈ కీలక రేసులో ఆయనకు అధ్యక్షుడు ట్రంప్ బహిరంగ మద్దతు ప్రకటించడం రాజకీయంగా ప్రాధాన్యం సంతరించుకుంది. 2026 నవంబరులో జరగనున్న ఈ ఎన్నికల్లో రామస్వామి కీలక పాత్ర పోషించే అవకాశం కనిపిస్తోంది.

భారతీయ మూలాలున్న ఈ యువ వ్యాపారవేత్త, రాజకీయ నాయకుడి అసాధారణ సంపద వృద్ధి, రాబోయే ఒహాయో గవర్నర్ ఎన్నికల్లో ఆయన పాత్ర.. అమెరికా రాజకీయ, ఆర్థిక వర్గాల్లో ఉత్కంఠను పెంచుతోంది.