ఒకే యువకుడిని పెళ్లి చేసుకున్న ముగ్గురు అక్కాచెల్లెల్లు.. ఇలా ట్విస్ట్ ఇచ్చారు

ఉత్తరప్రదేశ్‌లోని అమ్రోహా జిల్లాలో ఇటీవల వెలుగుచూసిన ఒక విచిత్ర వివాహ ఘటన దేశవ్యాప్తంగా తీవ్ర సంచలనం సృష్టిస్తోంది. ఒకే కుటుంబానికి చెందిన ముగ్గురు అక్కాచెల్లెళ్లు ఒకే యువకుడిని వివాహం చేసుకోవడం.. ఈ వార్త సోషల్ మీడియాలో విపరీతంగా వైరల్ కావడంతో నెటిజన్ల నుంచి పెద్ద ఎత్తున విమర్శలు వెల్లువెత్తాయి. తమ వివాహంపై వస్తున్న ట్రోలింగ్, ఆరోపణలపై సదరు ముగ్గురు సోదరీమణులు తీవ్రంగా స్పందిస్తూ ఒక వీడియో సందేశాన్ని విడుదల చేశారు.

మేం సంతోషంగా ఉన్నాం.. మమ్మల్ని వదిలేయండి

సోషల్ మీడియా వేదికగా విమర్శలు గుప్పిస్తున్న వారికి ఆ ముగ్గురు యువతులు ఘాటుగా సమాధానమిచ్చారు. తమ నిర్ణయాన్ని సమర్థించుకుంటూ వీడియోలో మాట్లాడారు. "మేం ఎలాంటి తప్పు చేయలేదు. మా సొంత ఇష్టంతోనే ఈ పెళ్లి చేసుకున్నాం. మేమంతా ఒకే ఇంట్లో ఎంతో సంతోషంగా జీవిస్తున్నాం." అని స్పష్టం చేశారు. పెళ్లి చేసుకున్న వారిలో ఒకరు మైనర్ అనే విమర్శలపై స్పందిస్తూ "మా గ్రామంలో మాకంటే చిన్న వయసున్న వారికి కూడా పెళ్లిళ్లు అయ్యాయి. కావాలనే మాపై దుష్ప్రచారం చేస్తున్నారు" అని మండిపడ్డారు. తమ వ్యక్తిగత జీవితంలో ఇతరులు జోక్యం చేసుకోవద్దని, తమను ప్రశాంతంగా బ్రతకనివ్వాలని కోరారు.

ఆత్మహత్య హెచ్చరిక

తమపై జరుగుతున్న నిరంతర వేధింపులు, తీవ్ర మానసిక ఒత్తిడికి గురిచేస్తున్నాయని ఆవేదన వ్యక్తం చేశారు. "ఇలాగే మమ్మల్ని, మా భర్తను వేధిస్తూ ఉంటే మేం నలుగురం కలిసి ఆత్మహత్య చేసుకుంటాం. దానికి మమ్మల్ని విమర్శిస్తున్న వారే పూర్తి బాధ్యత వహించాల్సి ఉంటుంది" అని ఘాటుగా హెచ్చరించారు.

చట్టపరమైన, సామాజిక కోణాలు

ఈ ఘటన కేవలం సామాజికంగానే కాకుండా చట్టపరంగా కూడా పలు కీలక ప్రశ్నలను లేవనెత్తుతోంది. భారతీయ వివాహ చట్టాల ప్రకారం ఏకకాలంలో ఒకరి కంటే ఎక్కువ మందిని పెళ్లి చేసుకోవడం చెల్లుబాటు కాదు. దీనికితోడు వివాహం చేసుకున్న వారిలో ఒకరు మైనర్ అనే వార్తలు రావడంతో స్థానిక యంత్రాంగం, పోలీసులు ఈ వ్యవహారంపై దృష్టి సారించినట్లు తెలుస్తోంది.

అమ్మాయిల వయస్సుకు సంబంధించిన ఆధారాలు, బాల్యవివాహ నిషేధ చట్టం ఉల్లంఘన జరిగిందా లేదా అనే కోణంలో అధికారులు ప్రాథమిక విచారణ జరిపే అవకాశముంది. ప్రస్తుతం ఈ ముగ్గురు సోదరీమణుల వీడియో నెట్టింట మరోసారి కొత్త చర్చకు దారితీసింది.