వెంటాడుతున్న ప్రకృతి.. 2 రోజుల్లో 25 మంది మృతి

ఉత్తరప్రదేశ్‌ రాష్ట్రాన్ని ప్రకృతి సృష్టించిన విపత్తు వణికిస్తోంది. వర్షాకాలం మొదలవగానే ఆకాశం నుంచి పిడుగులు పడడం ప్రారంభమైంది. గత రెండు రోజుల్లోనే 25 మంది పిడుగుపాటుతో ప్రాణాలు కోల్పోవడం తీవ్ర ఆందోళన కలిగిస్తోంది. మృతుల్లో ఎనిమిది మంది మహిళలు, ఏడుగురు చిన్నారులు ఉన్నారు. ముఖ్యంగా ప్రయాగ్‌రాజ్‌, జౌన్‌పూర్‌ జిల్లాల్లో ఎక్కువ మంది మృతి చెందారు. ప్రయాగ్‌రాజ్‌లోని సోన్‌వర్స హల్లాబోల్‌ గ్రామంలో ఒక్క కుటుంబానికి చెందిన నలుగురు మృత్యువాత పడటం హృదయవిదారక ఘటనగా మారింది.

-రైతులకు, కూలీలకు పెరిగిన ముప్పు

వర్షాకాలం అంటే రైతులకు పనుల సీజన్. పొలాల్లో పనిచేస్తూ లేదా చెట్లు, దొడ్డిల కింద నిలబడుతూ పిడుగుపాటుకు గురవుతున్నారు. పిడుగులు ఎక్కువగా చెట్లు, వ్యవసాయ పొలాల్లో పడటంతో వ్యవసాయ కార్మికులు అత్యధికంగా బలయ్యే పరిస్థితి ఏర్పడుతోంది.

- సీఎం యోగి ఆదిత్యనాథ్ స్పందన

ఈ విషాద ఘటనపై ముఖ్యమంత్రి యోగి ఆదిత్యనాథ్ తీవ్ర దిగ్భ్రాంతి వ్యక్తం చేశారు. బాధిత ప్రాంతాల్లో తక్షణ సర్వే నిర్వహించి నష్టాన్ని అంచనా వేయాలని అధికారులకు ఆదేశాలు జారీ చేశారు. మృతుల కుటుంబాలకు తగిన పరిహారం వెంటనే అందించాలనీ, గాయపడినవారికి మెరుగైన వైద్య సౌకర్యాలు కల్పించాలనీ సూచించారు.

-గత అనుభవాలు.. నిపుణుల హెచ్చరికలు

పిడుగుపాటు ఘటనలు ఉత్తరప్రదేశ్‌లో కొత్తకాదు. 2017 నుంచి 2022 మధ్య జూన్‌, జూలై నెలల్లో 58.8 శాతం పిడుగుపాటు మరణాలు నమోదయ్యాయని జర్నల్ ఆఫ్ ఎర్త్ సిస్టమ్ సైన్స్ తెలిపింది. వాతావరణ మార్పులు, వాతావరణ అస్థిరత వల్ల ఇటువంటి ఘటనలు మరింత పెరుగుతున్నాయని నిపుణులు చెబుతున్నారు.

ఒడిశా, ఆంధ్రప్రదేశ్‌ రాష్ట్రాల్లో విజయవంతంగా అమలు చేస్తున్న ముందస్తు హెచ్చరికల వ్యవస్థను ఉత్తరప్రదేశ్‌ కూడా అనుసరించాల్సిన అవసరం ఉందని సూచిస్తున్నారు. గ్రామీణ ప్రాంతాల్లో ప్రజలకు అవగాహన కల్పించడం, ప్రత్యేక ఆశ్రయ కేంద్రాలు ఏర్పాటు చేయడం ద్వారా ఈ ప్రమాదాన్ని తగ్గించవచ్చని నిపుణుల అభిప్రాయం.

ఉత్తరప్రదేశ్‌లోని తాజా ఘటనలు వాతావరణ హెచ్చరికల అమలు లోపాలను బయటపెట్టాయి. ప్రభుత్వ తక్షణ చర్యలు, నష్ట పరిహారం సానుకూలమైనప్పటికీ దీర్ఘకాలికంగా వాతావరణ విపత్తుల నిర్వహణ సామర్థ్యాన్ని మెరుగుపరచాల్సిన అవసరం ఉంది. గ్రామీణ ప్రజల్లో అవగాహన పెంపొందించడంతో పాటు టెక్నాలజీ ఆధారిత హెచ్చరికలు, సురక్షిత ఆశ్రయ స్థలాల ఏర్పాటుతో మానవ నష్టాన్ని నివారించవచ్చు.