అమెరికా ఉద్యోగ మార్కెట్ ఢమాల్..యువ ఉద్యోగుల బతుకు దుర్భరం

అమెరికా ఉద్యోగ మార్కెట్ క్రమంగా చల్లబడుతున్న నేపథ్యంలో, దాని ప్రభావం అత్యధికంగా యువ ఉద్యోగులపై పడుతోంది. వేతన వృద్ధి మందగించడం, కొత్త అవకాశాలు క్షీణించడం వంటి పరిణామాలు కొత్తగా ఉద్యోగాల్లోకి అడుగుపెడుతున్న యువతకు సవాళ్లు విసురుతున్నాయి.

జెపీఎంఆర్గన్‌ చేస్‌ ఇన్‌స్టిట్యూట్‌ విడుదల చేసిన తాజా గణాంకాలు ఈ పరిస్థితికి అద్దం పడుతున్నాయి. 25 నుండి 29 ఏళ్ల మధ్య వయస్సు కలిగిన ఉద్యోగుల వార్షిక ఆదాయ వృద్ధి సెప్టెంబర్ నాటికి కేవలం 5.2 శాతంగా నమోదైంది. ఇది 'గ్రేట్ రిసెషన్' తర్వాత నమోదైన అత్యల్ప వృద్ధి రేటుగా పరిగణించబడుతోంది.

* అవకాశాలు ఎందుకు తగ్గుతున్నాయి?

పోస్ట్-పాండమిక్ కాలంలో ప్రతిభావంతులను ఆకర్షించడానికి కంపెనీలు పోటీగా వేతనాలు పెంచాయి. అయితే, ప్రస్తుతం ఆర్థిక అనిశ్చితి కారణంగా ఉద్యోగ ఖాళీలు తగ్గడంతో ఆ పరిస్థితి పూర్తిగా మారిపోయింది. దీని వల్ల యువ ఉద్యోగులు అధిక వేతనాల కోసం ఉద్యోగం మార్చుకునే అవకాశాలు గణనీయంగా తగ్గిపోయాయి.

దీనికి తోడు ఆర్టిఫిషియల్ ఇంటెలిజెన్స్‌ (AI) ఈ మార్పులో ప్రధాన పాత్ర పోషిస్తోంది. కస్టమర్ సర్వీస్‌, డేటా ఎంట్రీ, కంటెంట్‌ క్రియేషన్ వంటి రంగాల్లో ఆటోమేషన్ పెరగడం వల్ల, కొత్త గ్రాడ్యుయేట్‌లకు లభించే ఎంట్రీ లెవల్ జాబ్స్ సంఖ్య గణనీయంగా తగ్గిపోయింది.

ఒక లేబర్ మార్కెట్ విశ్లేషకుడు ఈ పరిస్థితిపై స్పందిస్తూ "ఎంట్రీ లెవల్ ఉద్యోగాలు ఎప్పుడూ కెరీర్‌ అభివృద్ధికి మొదటి మెట్టుగా ఉండేవి. కానీ ఇప్పుడు మందగించిన నియామకాలు, ఆటోమేషన్ ఆ తలుపును మూసేస్తున్నాయి" అని ఆందోళన వ్యక్తం చేశారు.

* దీర్ఘకాలిక ప్రభావం

ఈ సమస్య కేవలం వేతనాలకే పరిమితం కాలేదు. తక్కువ ఆదాయ వృద్ధి, నెమ్మదించిన కెరీర్‌ పురోగతి కారణంగా యువ అమెరికన్లు ఇల్లు కొనుగోలు చేయడం, కుటుంబం ఏర్పాటు చేయడం వంటి ముఖ్యమైన జీవన లక్ష్యాలను చేరుకోవడానికి ఎక్కువ కాలం ఎదురుచూడాల్సి వస్తుంది.

మొత్తం ఉద్యోగ మార్కెట్‌లో వేతన వృద్ధి కొంత మందగించినప్పటికీ, యువ ఉద్యోగులపై దాని ప్రభావం అత్యధికంగా ఉందని ఆర్థిక నిపుణులు హెచ్చరిస్తున్నారు.

దీనిని బట్టి, నేటి కొత్త తరం కఠినమైన, పోటీభరితమైన, అసమానమైన ఉద్యోగ ప్రపంచాన్ని ఎదుర్కొంటుందని, ఈ గణాంకాలు దానికి అద్దం పడుతున్నాయని నిపుణులు సూచిస్తున్నారు.