అమెరికా కొత్త నిబంధనలు: భారతీయులకు కఠిన సవాలు

డొనాల్డ్‌ ట్రంప్‌ ప్రభుత్వం మరోసారి వైట్‌ హౌస్‌లో అధికారాన్ని చేపట్టిన తర్వాత, అమెరికన్ కార్మికులను రక్షించడం, వలసదారుల ప్రవాహాన్ని నియంత్రించడం లక్ష్యంగా కఠినమైన ఇమ్మిగ్రేషన్‌ విధానాలను అమలు చేస్తోంది. కేవలం రెండు నెలల వ్యవధిలో ప్రకటించిన మూడు కీలక నిబంధనలు అమెరికాలో స్థిరపడాలని చూస్తున్న భారతీయ విద్యార్థులు, నిపుణులు.. గ్రీన్‌ కార్డ్ హోల్డర్లపై తీవ్ర ప్రభావం చూపనున్నాయి. ఈ చర్యలు అమెరికాలో భారతీయ వలసదారులకు ఎదురైన కఠినమైన దశల్లో ఒకటిగా నిలుస్తున్నాయి.

ఉద్యోగ అనుమతి పత్రాల (EADs) ఆటో-రీన్యువల్‌ రద్దు

అక్టోబర్‌ 30, 2025 నుండి అమల్లోకి వచ్చే ఈ నిబంధన, ఎంప్లాయ్‌మెంట్‌ ఆథరైజేషన్‌ డాక్యుమెంట్స్‌ (EADs) యొక్క ఆటోమేటిక్ రీన్యువల్‌ను రద్దు చేస్తుంది. ఇకపై, ప్రతి రీన్యువల్‌ దరఖాస్తుకు కొత్తగా బ్యాక్‌గ్రౌండ్‌ చెక్ తప్పనిసరి. దీని ద్వారా H-1B వీసా హోల్డర్ల జీవిత భాగస్వాములు (H-4), అలాగే ప్రాక్టికల్ ట్రైనింగ్‌లో ఉన్న OPT విద్యార్థులు భారీగా ప్రభావితమవుతారు. సాధారణంగా ఈ రీన్యువల్‌ ప్రక్రియకు 7 నుండి 10 నెలలు పడుతుండటంతో, నిర్ణీత గడువులోగా పత్రం రాకపోతే వీరు ఉద్యోగాలు కోల్పోయే ప్రమాదం ఉందని నిపుణులు ఆందోళన వ్యక్తం చేస్తున్నారు.

H-1B వీసా ఫీజు పెంపు: ఐటీ కంపెనీలకు భారంగా

సెప్టెంబర్‌ 19న ట్రంప్‌ ప్రభుత్వం తీసుకున్న మరో సంచలన నిర్ణయం కొత్త H-1B వీసా దరఖాస్తులపై సంవత్సరానికి $100,000 (సుమారు ₹88 లక్షలు) భారీ ఫీజు విధించడం. USCIS ప్రకారం, ఈ భారీ ఫీజు దేశం బయట నుండి కొత్తగా వీసా పొందే అభ్యర్థులకు మాత్రమే వర్తిస్తుంది. అమెరికాలోనే స్టేటస్ మార్చుకునే (ఉదాహరణకు, F-1 నుండి H-1B) వారికి ఇది వర్తించదు.

వాల్‌మార్ట్‌ వంటి పెద్ద సంస్థలు ఇప్పటికే తమ H-1B నియామకాలను నిలిపివేయగా, ఈ చర్య భారతీయ ఐటీ కంపెనీలు, టెక్ సంస్థలపై గణనీయమైన ఆర్థిక భారాన్ని మోపుతుంది. అమెరికన్ కార్మికులను భర్తీ చేయడానికి కొన్ని సంస్థలు వలసదారులను ఉపయోగిస్తున్నాయనే ఆరోపణల నేపథ్యంలో ఈ నిర్ణయం వచ్చింది.

పౌరసత్వ పరీక్షలు కఠినతరం

మరో కీలక మార్పుగా, అక్టోబర్‌ 20, 2025 నుండి గ్రీన్‌ కార్డ్‌ హోల్డర్ల పౌరసత్వ పరీక్షలు మరింత కఠినతరం కానున్నాయి. పౌరసత్వం కోసం దరఖాస్తు చేసుకునే అభ్యర్థులు మొత్తం 128 ప్రశ్నల పూల్‌ నుంచి అడిగే 20 ప్రశ్నలకు సమాధానం చెప్పాలి. అందులో కనీసం 12 సరైన సమాధానాలు ఇవ్వాలి.

ఈ పరీక్షలో రెండుసార్లు విఫలమైతే పౌరసత్వం నిరాకరించబడుతుంది. 65 ఏళ్లకు పైబడిన, 20 ఏళ్లు అమెరికాలో నివసించిన వారికి మాత్రం కొంత సరళమైన పరీక్ష ఉంటుంది. అదనంగా, పౌరసత్వం మంజూరు చేసే ముందు “నైతిక ప్రమాణాలు ” అనే అంశాన్ని కూడా కఠినంగా పరిశీలించనున్నారు.

అదనపు సరిహద్దు భద్రతా నిబంధనలు

ఈ ప్రధాన మార్పులతో పాటు, గ్రీన్‌ కార్డ్‌ హోల్డర్లు సహా అన్ని విదేశీయులు అమెరికా ప్రవేశం లేదా బయలుదేరే సమయంలో ఫోటో తీసుకోవడం తప్పనిసరి చేసే కొత్త సరిహద్దు భద్రతా నిబంధనలు కూడా అమలులోకి వచ్చాయి.

ఉద్యోగ అనుమతి పత్రాల రీన్యువల్‌ నిలిపివేయడం నుండి వీసా ఖర్చులు పెరగడం, పౌరసత్వ పరీక్షలు కఠినతరం కావడం వరకు ఈ చర్యలు ట్రంప్‌ ప్రభుత్వ వలస వ్యతిరేక వైఖరిని స్పష్టంగా ప్రతిబింబిస్తున్నాయి. మొత్తం మీద, అమెరికాలో ఉన్న భారతీయ విద్యార్థులు, ఉద్యోగులు, వారి కుటుంబాల కోసం వీసా పొందడం, ఉద్యోగం కొనసాగించడం, లేదా పౌరసత్వం సాధించడం అనే ప్రక్రియ మరింత కష్టమైన దశగా మారనుంది.