‘ఫిక్స్‌డ్ టర్మ్ వీసా’.. అమెరికా కొత్త విద్యార్థి వీసాల నిబంధన

అమెరికాలో విదేశీ విద్యార్థులకు నిబంధనలు కఠినతరం చేసేందుకు అమెరికా అధ్యక్షుడు డొనాల్డ్ ట్రంప్ ప్రభుత్వం మరోసారి ప్రయత్నాలు మొదలుపెట్టింది. గతంలో వలసలను నియంత్రించేందుకు తీసుకువచ్చిన అనేక నిర్ణయాల మాదిరిగానే, ఇప్పుడు విద్యార్థి వీసాలపై కూడా కొత్త ఆంక్షలు విధించాలని యోచిస్తోంది. అమెరికా హోంల్యాండ్ సెక్యూరిటీ శాఖ ఇటీవల ఒక కీలక ప్రతిపాదనను ముందుకు తెచ్చింది. దీని ప్రకారం ప్రస్తుతం ఉన్న 'డ్యూరేషన్ ఆఫ్ స్టేటస్' విధానానికి బదులుగా విద్యార్థులకు 'ఫిక్స్‌డ్ టర్మ్ వీసా' విధానాన్ని అమలు చేయాలని ప్రతిపాదించింది.

- ప్రస్తుత విధానం: 'డ్యూరేషన్ ఆఫ్ స్టేటస్'

ప్రస్తుతం అమలులో ఉన్న విధానం ప్రకారం, విద్యార్థులు F-1 వీసాపై అమెరికాకు వెళ్ళిన తర్వాత తమ కోర్సు పూర్తయ్యేంత వరకు చట్టబద్ధంగా అక్కడ ఉండవచ్చు. చదువు ఎంతకాలం సాగినా, కోర్సు పూర్తి అయ్యేంత వరకు వీసా గడువు గురించి ఆందోళన చెందాల్సిన అవసరం లేదు. దీనివల్ల విద్యార్థులు ఎలాంటి ఒత్తిడి లేకుండా తమ చదువుపై దృష్టి పెట్టగలుగుతున్నారు.

-కొత్త ప్రతిపాదనలో మార్పులు: 'ఫిక్స్‌డ్ టర్మ్ వీసా'

కొత్త నిబంధనల ప్రకారం విద్యార్థి వీసాలకు ఒక నిర్దిష్ట గడువు ఉంటుంది. అంటే చదువు కొనసాగుతున్న మధ్యలోనే వీసా గడువు ముగిసిపోవచ్చు. ఈ సందర్భంలో విద్యార్థులు తమ వీసాను మధ్యలోనే పునరుద్ధరించుకోవాల్సి ఉంటుంది. ఈ విధానం వల్ల ముఖ్యంగా పీహెచ్‌డీ (PhD).. పరిశోధన రంగాలలో ఉన్న విద్యార్థులకు తీవ్రమైన ఇబ్బందులు తలెత్తే అవకాశం ఉంది. థీసిస్ సమర్పణలో ఆలస్యం, ల్యాబ్ వర్క్ జాప్యం లేదా ఇతర అనుకోని పరిస్థితుల వల్ల చదువు ఎక్కువ కాలం పడితే, వీసా రెన్యూవల్ తప్పనిసరి అవుతుంది.

- భారతీయ విద్యార్థులపై ప్రభావం

ప్రస్తుతం అమెరికాలో దాదాపు 4.2 లక్షల మంది భారతీయ విద్యార్థులు చదువుకుంటున్నారు. ఈ కొత్త ప్రతిపాదన వారిపై గణనీయమైన ప్రభావం చూపే అవకాశం ఉంది. వీసా పునరుద్ధరణ కోసం అదనపు ఖర్చులు, సమయంతో పాటు, పత్రాల సమర్పణ వంటి ప్రక్రియలు చదువులో అంతరాయం కలిగించవచ్చు. ఇది విద్యార్థులకు ఆర్థికంగానూ భారంగా మారవచ్చు.

- గతంలోనూ జరిగిన ప్రయత్నం

ఇలాంటి ప్రతిపాదనను ట్రంప్ ప్రభుత్వం 2020లోనే తీసుకురావడానికి ప్రయత్నించింది. అప్పుడు విద్యార్థి వీసాలకు గరిష్టంగా 2 నుంచి 4 సంవత్సరాల వరకు మాత్రమే గడువు పెట్టాలని భావించారు. కానీ, విద్యార్థులు మరియు విశ్వవిద్యాలయాల నుంచి వచ్చిన తీవ్ర వ్యతిరేకత కారణంగా ఈ ప్రతిపాదనను ఆపివేయాల్సి వచ్చింది.

- విద్యార్థులు ఏం చేయాలి?

ఈ ప్రతిపాదన ఇంకా తుది నిర్ణయం కానప్పటికీ, విద్యార్థులు ముందుగానే సిద్ధంగా ఉండాలని నిపుణులు సూచిస్తున్నారు. వీసా పునరుద్ధరణ ఖర్చులు.. సమయాన్ని తమ ఆర్థిక ప్రణాళికలో చేర్చుకోవాలి. చదువు ఆలస్యమయ్యే అవకాశాలపై తమ అకాడెమిక్ అడ్వైజర్లతో చర్చించి తగిన సలహాలు తీసుకోవాలి. పబ్లిక్ కామెంట్ ప్రాసెస్ లో పాల్గొని ఈ ప్రతిపాదనపై తమ అభిప్రాయాలను తెలియజేయాలి.

ఈ కఠినమైన వీసా నిబంధనలు అమలులోకి వస్తే అమెరికా విద్యార్థుల గమ్యస్థానంగా కొనసాగుతుందా లేదా ఇతర దేశాల వైపు విద్యార్థులు మొగ్గు చూపుతారా అనేది వేచి చూడాలి.