యువ మహిళా మంత్రిపై సోషల్ మీడియా ట్రోలింగ్.. వైరల్ వీడియో వెనుక నిజానిజాలివే!
తమిళనాడు రాజకీయాల్లో యంగ్ లీడర్లకు ప్రాధాన్యత పెరిగిన నేపథ్యంలో విజయ్ నాయకత్వంలోని ప్రభుత్వంలో పరిశ్రమల శాఖ మంత్రిగా బాధ్యతలు చేపట్టిన యువ నాయకురాలు కీర్తన ఇటీవల తీవ్రమైన సోషల్ మీడియా ట్రోలింగ్ను ఎదుర్కొంటున్నారు.
తమిళనాడు రాజకీయాల్లో యంగ్ లీడర్లకు ప్రాధాన్యత పెరిగిన నేపథ్యంలో విజయ్ నాయకత్వంలోని ప్రభుత్వంలో పరిశ్రమల శాఖ మంత్రిగా బాధ్యతలు చేపట్టిన యువ నాయకురాలు కీర్తన ఇటీవల తీవ్రమైన సోషల్ మీడియా ట్రోలింగ్ను ఎదుర్కొంటున్నారు. రాజకీయ రంగంలోకి వచ్చిన అతితక్కువ కాలంలోనే ఆమెను లక్ష్యంగా చేసుకుంటూ ప్రత్యర్థులు నెట్టింట ప్రచారం చేస్తుండటం రాజకీయ వర్గాల్లో చర్చనీయాంశంగా మారింది.
వైరల్ వీడియో వివాదం: అసలు ఏం జరిగింది?
ఇటీవల సోషల్ మీడియాలో ఒక వీడియో హల్చల్ చేసింది. అందులో ఒక మహిళ నల్లటి బాడీకాన్ దుస్తులు ధరించి అత్యంత ఖరీదైన విలాసవంతమైన కారు నుంచి దిగుతున్నట్లు ఉంది. ఈ వీడియోలోని మహిళ తమిళనాడు పరిశ్రమల శాఖ మంత్రి కీర్తన అని.. ఆమె విదేశాల్లో విలాసవంతమైన జీవితాన్ని గడుపుతోందంటూ కొందరు వ్యాఖ్యలతో షేర్ చేశారు. ఈ వీడియో క్షణాల్లో వైరల్గా మారి.. కీర్తన వ్యక్తిగత జీవితంపై ట్రోల్స్కు దారితీసింది.
మంత్రి కీర్తన తీవ్ర స్పందన
ఈ ప్రచారంపై మంత్రి కీర్తన వెంటనే స్పందించారు. ఆ వీడియోలో ఉన్నది తాను కాదని ఆమె స్పష్టంగా వెల్లడించారు. అంతేకాకుండా తనపై జరుగుతున్న దుష్ప్రచారాన్ని ఖండిస్తూ సమాజంలో మహిళల పట్ల ఉన్న దృక్పథాన్ని ప్రశ్నించారు. “వీడియోలో ఉన్నది నేను కాదు. ఒకవేళ నేనే అయినా అందులో తప్పేముంది?” అని ఆమె ప్రశ్నించారు. ఒక మహిళ వేసుకునే దుస్తులు, ఆమె రూపం లేదా సంతోషాన్ని బట్టి సమాజం ఎందుకు తీర్పు ఇవ్వాలని నిలదీశారు. ప్రభుత్వం అనుసరిస్తున్న విధానాలు, పాలనా తీరు లేదా పనితీరుపై విమర్శలు చేయలేకనే రాజకీయ ప్రత్యర్థులు ఇలాంటి కల్పిత కథనాలు, వ్యక్తిగత దాడికి దిగుతున్నారని ఆమె మండిపడ్డారు.
రాజకీయాల్లో మహిళలపై వ్యక్తిగత దాడి ఎంతవరకు సమంజసం?
సోషల్ మీడియా యుగంలో రాజకీయ నాయకులపై విమర్శలు సర్వసాధారణమయ్యాయి. అయితే విధానపరమైన అంశాలను పక్కనపెట్టి మహిళా ప్రజాప్రతినిధుల దుస్తులు.. వ్యక్తిగత జీవనశైలిని లక్ష్యంగా చేసుకోవడం ప్రజాస్వామ్యానికి మంచిది కాదనే అభిప్రాయాలు వ్యక్తమవుతున్నాయి.
ఈ సంఘటన కేవలం కీర్తనకు సంబంధించినది మాత్రమే కాదు.. సోషల్ మీడియాలో ఎలాంటి నిజానిజాలు ధృవీకరించుకోకుండా వార్తలను వ్యాప్తి చేయడం ఎంత ప్రమాదకరమో మరోసారి స్పష్టం చేసింది. రాజకీయాల్లో ఆరోగ్యకరమైన చర్చలు, విధానపరమైన విమర్శలు మాత్రమే ప్రాతిపదిక కావాలని, వ్యక్తిగత జీవితాలను రాజకీయ ప్రయోజనాల కోసం వాడుకోవడం ఆపాలని విశ్లేషకులు అభిప్రాయపడుతున్నారు.