రియల్ మంటల్లో మన భాగ్యనగరం.. మిగతా ఊర్లు చల్లబడినా... ఇక్కడ మాత్రం 'హౌస్'ఫుల్లే

దేశమంతటా రియల్ ఎస్టేట్ మార్కెట్ కాస్త ఆయాసపడుతూ ఊపిరి పీల్చుకుంటుంటే మన హైదరాబాద్ మాత్రం "నా రూటే వేరు" అంటూ ఏకంగా 15 శాతం స్పీడ్‌ పెంచి దూసుకెళ్తోంది. అవును మరి.. ముంబై, బెంగళూరు, ఢిల్లీ లాంటి బడా నగరాలన్నీ "అయ్యో.. ఇళ్లు అమ్మడవుతలేవు మహాప్రభో" అని ఏడుస్తుంటే మనవాళ్లు మాత్రం ఏప్రిల్-జూన్ మధ్యలోనే ఏకంగా 13,196 ఇళ్లకు 'సెలెక్షన్' కొట్టేశారు. ప్రాప్టైగర్ రిపోర్ట్ చెప్తున్న ఈ మాటలు వింటే.. అసలు మనోళ్ల దగ్గర డబ్బులు అంతలా ఉన్నాయా లేక ఉన్న ఆస్తి అంతా పెట్టి ఇక్కడే 'సెటిల్' అయిపోదాం అనుకుంటున్నారా అనేది అర్థం కాక సామాన్యుడికి బుర్ర తిరగడం ఖాయం!

మిగతా నగరాలు తుమ్మితే.. హైదరాబాద్ స్విమ్మింగ్ చేస్తోంది..

దేశంలోని టాప్-8 నగరాల పరిస్థితి చూస్తే ఐసియులో ఉన్నట్టుంది. గతేడాది 97,674 ఇళ్లు అమ్మితే ఈసారి అది కాస్తా 91,729 కి పడిపోయింది. అంటే దాదాపు 6 శాతం డౌన్. బెంగళూరులో సాఫ్ట్‌వేర్ ఉద్యోగాలు ఊడుతున్నాయనో ముంబైలో ఇళ్ల సైజులు డిజిటల్ కెమెరా చిప్‌ అంత చిన్నగా ఉన్నాయనో జనాలు కొనడం తగ్గించేశారు. కానీ హైదరాబాద్ పరిస్థితి వేరు.. గచ్చిబౌలి, కోకాపేట్, నానక్‌రామ్‌గూడ వైపు వెళ్తే చాలు.. అపార్ట్‌మెంట్ల ఎత్తు చూసి మెడ విరిగినా సరే.. కోట్లు గుమ్మరించి ఫ్లాట్లు కొనేస్తున్నారు. ఐటీ, ఫార్మా, ఫైనాన్షియల్ డిస్ట్రిక్ట్ అంటూ రోజుకో కొత్త కంపెనీ రావడం.. "ఇక్కడే ఉంటే బతుకు జటకా బండి సెట్ అవుతుంది" అని ఐఐటీ కుర్రాళ్ల నుంచి ఐఏఎస్ అధికారుల వరకు అందరూ ఇక్కడే వాలిపోవడమే దీనికి కారణం.

వడ్డీలు పెరిగినా.. 'ఆర్టిఫిషియల్ ఇంటెలిజెన్స్' భయపెట్టినా తగ్గేదేలే..

ఒక పక్క పశ్చిమాసియాలో యుద్ధాలు.. ఇంకోపక్క ఏఐ వచ్చి ఉద్యోగాలు ఊడతీస్తుందనే భయాలు.. మరోపక్క ఆకాశాన్ని తాకుతున్న ధరలు.. ఇన్ని నెగెటివ్‌లు ఉన్నా మన కొనుగోలుదారుల ధైర్యాన్ని మెచ్చుకోవాల్సిందే. అసలు అడుగు జాగాని చదరపు అడుగుకు రూ. 10,000 పెట్టి కొంటున్నారంటే.. వీళ్లు ఇళ్లు కొంటున్నారా లేక భవిష్యత్తులో మిస్సవకూడదని 'లగ్జరీ టికెట్' కొంటున్నారా అనేది యక్షప్రశ్న..

ఏది ఏమైనా "మార్కెట్ తగ్గట్లేదు గురూ.. మరింత మెచ్యూర్ అవుతోంది" అని ప్రాప్టైగర్ సిఈఓ గారు కవర్ చేస్తుంటే డెవలపర్లు మాత్రం రాబోయే పండుగల సీజన్ కోసం పెద్ద వలలే వేస్తున్నారు. ప్రత్యేక ఆఫర్లు, ఈజీ ఈఎమ్‌ఐలు అంటూ మళ్లీ మిడిల్ క్లాస్ జేబులకు చిల్లులు పొడిచేందుకు 'ఫెస్టివ్ సేల్స్' రెడీ చేస్తున్నారు. మిగతా నగరాలు నెమ్మదించినా హైదరాబాద్‌లో మాత్రం కాంక్రీట్ అడవి పెరగడం.. ఇళ్ల ధరలు ఆకాశంలో విహరించడం అప్పట్లోనూ ఉంది.. ఇప్పుడూ ఉంది.. భవిష్యత్తులోనూ కొనసాగేలాగే ఉంది.