ఏపీ టు హైదరాబాద్ : తిరుగుప్రయాణం నరకం

సంక్రాంతి సెలవులు ముగియడంతో నగరవాసులు తిరిగి హైదరాబాద్ బాట పట్టారు. పల్లెల్లో పండగ జరుపుకుని తిరుగు ప్రయాణమైన జనంతో జాతీయ రహదారులు కిక్కిరిసిపోయాయి. ముఖ్యంగా విజయవాడ-హైదరాబాద్ హైవేపై వాహనాల రద్దీ రికార్డు స్థాయిలో పెరగడంతో కిలోమీటర్ల మేర ట్రాఫిక్ జామ్ ఏర్పడింది. ఈ క్రమంలో ప్రయాణికులు ఎదుర్కొంటున్న ఇబ్బందులు.. పోలీసులు చేపట్టిన చర్యలు ట్రాఫిక్ రద్దీని తగ్గించలేకపోతున్నాయి..

కనుమ పండగ ముగియడంతో భాగ్యనగరవాసులు తిరుగు ప్రయాణమయ్యారు. సంక్రాంతి సంబరాల కోసం సొంతూళ్లకు వెళ్లిన లక్షలాది మంది ఒక్కసారిగా హైదరాబాద్ వైపు కదలడంతో జాతీయ రహదారులు వాహన సముద్రాన్ని తలపిస్తున్నాయి. ముఖ్యంగా విజయవాడ–హైదరాబాద్ జాతీయ రహదారి (NH-65) మరియు అద్దంకి–నార్కట్‌పల్లి రహదారులపై రద్దీ అదుపు తప్పింది.

స్తంభించిన రహదారులు.. నత్తనడకన వాహనాలు

విజయవాడ వైపు నుంచి వచ్చే వాహనాలతో గుంటుపల్లి, ఇబ్రహీంపట్నం రింగ్ రోడ్డు ప్రాంతాలు పూర్తిగా స్తంభించిపోయాయి. కేవలం 5 కిలోమీటర్ల దూరం ప్రయాణించడానికి వాహనదారులకు దాదాపు గంటన్నర సమయం పట్టిందంటే పరిస్థితి ఎంత తీవ్రంగా ఉందో అర్థం చేసుకోవచ్చు. పొందుగుల బ్రిడ్జి, దామరచర్ల, మిర్యాలగూడ, చిట్యాల, చౌటుప్పల్ వంటి ప్రధాన కూడళ్ల వద్ద కార్లు, బస్సులు కిలోమీటర్ల మేర బారులు తీరాయి. పంతంగి, కొర్లపహాడ్ , కీసర టోల్‌ప్లాజాల వద్ద ఫాస్టాగ్ స్కానింగ్‌లో సాంకేతిక ఆలస్యం కావడంతో వాహనాలు గంటల తరబడి వేచి చూడాల్సి వచ్చింది. కీసర టోల్‌ప్లాజా వద్ద ఒక్క రోజే దాదాపు 20 వేల వాహనాలు రాకపోకలు సాగించినట్లు అధికారులు వెల్లడించారు.

రంగంలోకి పోలీసులు: భారీగా దారి మళ్లింపులు

ట్రాఫిక్ ఉధృతిని గమనించిన పోలీసులు అప్రమత్తమై పలు చోట్ల వాహనాలను దారి మళ్లించారు. రోడ్డు విస్తరణ పనులు జరుగుతున్న నేపథ్యంలో వాహనదారులకు ఇబ్బంది కలగకుండా ప్రత్యామ్నాయ మార్గాలను సూచించారు. విజయవాడ నుంచి వచ్చే వాహనాలను కోదాడ వద్దే మళ్లిస్తున్నారు. భారీ వాహనాలను కోదాడ , హుజూర్‌నగర్‌ , మిర్యాలగూడ మార్గంలో పంపిస్తున్నారు. అద్దంకి నార్కట్‌పల్లి రోడ్డుపై వచ్చే వాహనాలను మిర్యాలగూడ వద్ద మళ్లిస్తున్నారు. మిర్యాలగూడ , హాలియా , మల్లేపల్లి మీదుగా హైదరాబాద్‌కు మళ్లిస్తున్నారు. పరిస్థితిని బట్టి చిట్యాల నుంచి భువనగిరి వైపు మళ్లిస్తున్నారు. డ్రోన్‌లు, సీసీ కెమెరాలతో ట్రాఫిక్ పరిస్థితిని నిరంతరం పర్యవేక్షిస్తున్నారు..

గంటన్నరలో 5 కిలోమీటర్లు

గుంటుపల్లి నుంచి ఇబ్రహీంపట్నం రింగ్‌ కూడలి వరకు కేవలం 5 కిలోమీటర్ల దూరాన్ని దాటేందుకు గంటన్నర సమయం పట్టింది. రింగ్‌ కూడలిలో హైదరాబాద్‌ వైపు వెళ్లేవారు, మైలవరం–తిరువూరు వైపు మలుపు తిరిగేవారు కలవడంతో రద్దీ ఉధృతమైంది. గొల్లపూడి నుంచి నందిగామ వరకు సరైన సర్వీస్‌ రోడ్లు లేకపోవడంతో ప్రయాణికులు తీవ్ర ఇబ్బందులు ఎదుర్కొన్నారు.

కీసర, నందిగామలోనూ అదే పరిస్థితి

కంచికచర్ల మండలం కీసర టోల్‌ప్లాజా వద్ద ఉదయం 8 నుంచి రాత్రి 8 గంటల వరకు సుమారు 20 వేల వాహనాలు రాకపోకలు సాగించినట్లు అధికారులు తెలిపారు. ఎనిమిది కౌంటర్లు తెరిచినా ఫాస్టాగ్‌ స్కానింగ్ ఆలస్యం వల్ల వాహనాలు బారులు తీరాయి. నందిగామ వై జంక్షన్‌ వద్ద సర్వీస్‌ రోడ్డు మీదుగా వాహనాలు వెళ్లడంతో ఆలస్యం తప్పలేదు. రద్దీ ఎక్కువైన సమయంలో ఫ్లైఓవర్‌పై కార్లకే అనుమతి ఇచ్చారు.

పోలీసుల కట్టుదిట్టమైన చర్యలు

సాయంత్రం 5 నుంచి రాత్రి 7 గంటల మధ్య ట్రాఫిక్ అత్యధికంగా ఉండటంతో కృష్ణా, గుంటూరు జిల్లాల నుంచి వచ్చే భారీ వాహనాల రాకపోకలను తాత్కాలికంగా నిలిపివేశారు. ఉన్నతాధికారులు నుంచి క్షేత్రస్థాయి సిబ్బంది వరకు రంగంలోకి దిగి ట్రాఫిక్‌ను క్రమబద్ధీకరించారు. అవసరమైన చోట స్టాపర్లు, వేగ నియంత్రికలు ఏర్పాటు చేసి వాహనాలు సాఫీగా సాగేలా చర్యలు చేపట్టారు.

సంక్రాంతి సంబరాల అనంతరం తిరుగు ప్రయాణాల ప్రభావంతో విజయవాడ–హైదరాబాద్ జాతీయ రహదారిపై రద్దీ తారాస్థాయికి చేరింది. పోలీసుల సమన్వయ చర్యలతో పరిస్థితి క్రమంగా అదుపులోకి వస్తున్నట్లు అధికారులు తెలిపారు.