ఢిల్లీ నుంచి నరుక్కొస్తున్న రాజాసింగ్

తెలంగాణ రాజకీయాల్లో మరో కీలక మలుపు తిరిగింది. గోషామహల్ ఎమ్మెల్యే టి. రాజాసింగ్ బీజేపీకి రాజీనామా చేసి ఢిల్లీ కేంద్రంగా రాజకీయ చర్యలు చేపట్టడం ప్రస్తుతం రాజకీయ వర్గాల్లో హాట్ టాపిక్‌గా మారింది. ఇప్పటికే రాష్ట్ర బీజేపీ నేతలపై తీవ్ర అసంతృప్తితో ఉన్న ఆయన, పార్టీకి రాజీనామా చేసిన విషయం తెలిసిందే. తన రాజీనామా లేఖను మాజీ రాష్ట్ర అధ్యక్షుడు కిషన్ రెడ్డికి అప్పగించారు.

- రాజీనామా వెనుక కారణాలు

రాజాసింగ్ ఇటీవల పార్టీ రాష్ట్ర నాయకత్వంపై తీవ్ర అసహనం వ్యక్తం చేశారు. తనను రాష్ట్ర అధ్యక్ష పదవికి పోటీ చేయకుండా అడ్డుకున్నారని ఆయన ఆరోపించారు. తాను బీజేపీకి తగినంత సేవలు అందించినా, తమను పక్కనపెట్టి మిగతా నేతలకే ప్రాధాన్యత ఇస్తున్నారని గట్టి ఆరోపణలు చేశారు. ముఖ్యంగా కొత్త అధ్యక్షుడి నియామక ప్రక్రియ పట్ల ఆయన అసంతృప్తి వ్యక్తం చేశారు.

-ఢిల్లీ పర్యటనకు ప్రాధాన్యత

రాజీనామా చేసిన అనంతరం ఢిల్లీకి వెళ్లిన రాజాసింగ్, బీజేపీ కేంద్ర నాయకత్వాన్ని కలిసినట్లు సమాచారం. అక్కడ తెలంగాణలో పార్టీ పరిస్థితి, రాష్ట్ర నేతల వ్యవహారం గురించి కేంద్ర నేతల దృష్టికి తీసుకెళ్లినట్టు తెలుస్తోంది. ‘‘నాకు కేంద్ర నాయకత్వంతో ఎలాంటి విభేదాలు లేవు, కానీ రాష్ట్ర స్థాయి నాయకుల తీరు అసహనానికి దారితీసింది’’ అని ఆయన చెప్పినట్టు తెలుస్తోంది. కేంద్రం ఎలాంటి నిర్ణయం తీసుకున్నా తాను అంగీకరించేందుకు సిద్ధంగా ఉన్నట్టు తెలిపారు.

- ఎమ్మెల్యే పదవిపై అనర్హత పిటిషన్..?

ఇదిలా ఉండగా, బీజేపీ రాష్ట్ర నాయకత్వం రాజాసింగ్ ఎమ్మెల్యే పదవిపై అనర్హత వేటు వేయాలనే యోచనలో ఉంది. ఇందుకోసం స్పీకర్ కు లేఖ రాసేందుకు సిద్ధమవుతోంది. పార్టీకి రాజీనామా చేసినందున ఆయన ఎమ్మెల్యే పదవిని కూడా వీడాలని బీజేపీ వర్గాలు అభిప్రాయపడుతున్నాయి.

- రాంచందర్ రావుకు సూచనలు

తాజాగా రాష్ట్ర బీజేపీ అధ్యక్షుడు రాంచందర్ రావుకు రాజాసింగ్ కీలక సూచనలు చేశారు. ‘‘మీరు డమ్మీ అధ్యక్షుడి అనే ట్యాగ్‌ను తొలగించుకోవాలంటే ఇప్పుడే అవకాశం. ఓవైసీ కుటుంబానికి చెందిన ఫాతిమా కాలేజ్ పై లీగల్ టీమ్ ఏర్పాటు చేయండి’’ అంటూ పరోక్షంగా బలమైన మార్గదర్శకత ఇచ్చారు.

రాజాసింగ్ ఢిల్లీలో మకాం వేసి, రాజకీయంగా కీలక నేతలతో చర్చలు జరపడం, ఒకవైపు పార్టీ రాజీనామా, మరోవైపు ఎమ్మెల్యే పదవి భవితవ్యం అనే సంక్లిష్ట పరిస్థితులు తెలంగాణ బీజేపీని అయోమయంలోకి నెట్టాయి. ఇకపై రాజాసింగ్ పాత్ర పార్టీ రాజకీయాల్లో కొనసాగుతుందా? లేక కొత్త పార్టీ వైపు అడుగులు వేస్తారా? అన్నది రాజకీయ పరిశీలకుల్లో ఆసక్తికరంగా మారింది. ఒక విషయం మాత్రం స్పష్టం బీజేపీలో వర్గ పోరు ఇంకా ముదురుతోంది. ఈ పరిణామాలు తెలంగాణ బీజేపీ భవిష్యత్తును ఎలా ప్రభావితం చేస్తాయో వేచి చూడాలి.