చంద్రబాబుతో పూనమ్ కౌర్.. వైరల్

టాలీవుడ్ నటి పూనమ్ కౌర్ ఎప్పుడూ ఏదో ఒక వివాదంతో.. సంచలన వ్యాఖ్యలతో వార్తల్లో నిలుస్తూ ఉంటారు. ముఖ్యంగా సినీ పరిశ్రమకు చెందిన కొందరు ప్రముఖులపై ఆమె చేసే పరోక్ష విమర్శలు, ట్వీట్లు తరచూ చర్చనీయాంశమవుతాయి. సోషల్ మీడియాలో చాలా యాక్టివ్‌గా ఉండే పూనమ్ కౌర్ తాజాగా ఒక రాజకీయ కార్యక్రమంలో పాల్గొని ఆంధ్రప్రదేశ్ ముఖ్యమంత్రి నారా చంద్రబాబు నాయుడుతో కలిసి వేదికను పంచుకోవడంతో మరోసారి అందరి దృష్టిని ఆకర్షించారు. ఈ భేటీ ప్రస్తుతం సోషల్ మీడియాలో హాట్ టాపిక్‌గా మారింది.

హైదరాబాద్‌లో జరిగిన ఓ డిజిటల్ మీడియా సంస్థ వజ్రోత్సవ వేడుకలకు ముఖ్యమంత్రి చంద్రబాబు నాయుడు ముఖ్య అతిథిగా హాజరయ్యారు. ఈ కార్యక్రమంలో పలువురు సినీ, రాజకీయ ప్రముఖులు పాల్గొన్నారు. ఈ సందర్భంగా పూనమ్ కౌర్ ముఖ్యమంత్రి చంద్రబాబును కలిసి, ఆయనకు ఒక ప్రత్యేక బహుమతిని అందజేశారు. అమరావతి ఆత్మను ప్రతిబింబించేలా చేతితో తయారుచేసిన పటాచిత్ర కళాఖండాన్ని ఆమె బహుకరించారు.

ఈ విషయాన్ని పూనమ్ కౌర్ తన అధికారిక ట్విట్టర్ (ప్రస్తుతం ఎక్స్) ఖాతా ద్వారా పంచుకున్నారు. "గిఫ్ట్ ఇచ్చిన చిత్రం అమరావతి ఆత్మను ప్రతిబింబించేలా ఉంది. ఇలాంటి ఒక అరుదైన కళాఖండాన్ని సీఎం నారా చంద్రబాబు నాయుడు గారికి అందజేయడం గర్వంగా ఉంది" అని ఆమె ట్వీట్ చేశారు. ఈ కార్యక్రమంలో చంద్రబాబు ప్రసంగిస్తున్నప్పుడు పూనమ్ కౌర్ ఎంతో ఆసక్తిగా, సంతోషంగా కనిపించారు. ముఖ్యమంత్రి ప్రసంగాన్ని శ్రద్ధగా వింటూ ఆమె చూపించిన ఉత్సాహం, గౌరవం చూస్తుంటే ఆమె చంద్రబాబుకు వీరాభిమానిగా ఉన్నారని స్పష్టమైంది.

ఈ సందర్భగా తన గత స్మృతులను గుర్తు చేసుకుంటూ పూనమ్ కౌర్ చేసిన మరో ట్వీట్ మరింత ఆసక్తికరంగా మారింది. "అప్పట్లో ఆయన అమెరికా మాజీ అధ్యక్షుడు బిల్ క్లింటన్‌ను హైదరాబాద్‌కు రప్పించారు. అదే సమయంలోనే నేను నిర్ణయించుకున్నాను. ఒక రోజు నేను కూడా అమెరికా ప్రెసిడెంట్‌ను కలుస్తాను అని. ఏడవ తరగతిలో స్కూల్ టాపర్ అయినప్పుడు ఆయనే నాకు తొలి గోల్డ్ మెడల్ ఇచ్చారు. నాయకులు పార్టీకి మాత్రమే కాదు, ప్రజలకే చెందినవారు. దేవుడే ఇలా మలిచాడు" అని ఆమె పేర్కొన్నారు.

తెలుగు చిత్ర పరిశ్రమలో తరచూ వివాదాల్లో చిక్కుకునే వ్యక్తిగా పేరున్న పూనమ్ కౌర్, తాజాగా ముఖ్యమంత్రితో ఒకే వేదికపై కనిపించడం, ఆయనపై ప్రశంసలు కురిపిస్తూ ట్వీట్లు చేయడం ఇప్పుడు సోషల్ మీడియాలో తీవ్ర చర్చకు దారితీసింది. నెటిజన్లు ఈ సంఘటనపై తమదైన శైలిలో స్పందిస్తూ, భిన్నాభిప్రాయాలను వ్యక్తం చేస్తున్నారు. ఈ భేటీ వెనుక రాజకీయ ఉద్దేశాలు ఏమైనా ఉన్నాయా అనే కోణంలో కూడా కొందరు నెటిజన్లు చర్చించుకుంటున్నారు. మొత్తానికి, పూనమ్ కౌర్ - చంద్రబాబు భేటీ ప్రస్తుతం వార్తల్లో ప్రముఖంగా నిలిచింది.