ఘటనా స్థలాన్ని పరిశీలించిన ప్రధాని... మృత్యుంజయుడికి పరామర్శ!

అహ్మదాబాద్ నుంచి లండన్ కు బయలుదేరిన ఎయిరిండియా విమానం గురువారం మధ్యాహం ఘోర ప్రమాదానికి గురైన సంగతి తెలిసిందే. సర్దార్ వల్లభాయ్ పటేల్ అంతర్జాతీయ విమానాశ్రయం నుంచి టేకాఫ్ అయిన కొన్ని క్షణాలకే కుప్పకూలిపోయింది. ఈ ఘటనలో మొత్తం 265 మంది మృతి చెందారు. ఈ క్రమంలో ప్రధాని మోడీ అహ్మదాబాద్ చేరుకున్నారు.

అవును... విమాన ప్రమాదంపై తీవ్ర దిగ్భ్రాంతి వ్యక్తం చేసిన ప్రధానమంత్రి మోడీ.. శుక్రవారం ఉదయం అహ్మదాబాద్ చేరుకున్నారు. ఈ సందర్భంగా ఘటనాస్థలానికి వెళ్లిన ప్రధాని నరేంద్ర మోడీ.. అక్కడి పరిస్థితిని పరిశీలించారు. ప్రమాద వివరాలను అధికారుల నుంచి అడిగి తెలుసుకున్నారు. ఈ సమయంలో ప్రధానితోపాటు మంత్రి రామ్మోహన్ నాయుడు ఉన్నారు.

ఘటనాస్థలాన్ని పరిశీలించిన అనంతరం నేరుగా అహ్మదాబాద్ సివిల్ ఆస్పత్రికి చేరుకున్నారు ప్రధాని. ఈ సందర్భంగా ప్రమాదం నుంచి ప్రాణాలతో బయటపడిన ఏకైన విమాన ప్రయాణికుడు విశ్వాస్ కుమార్ ను ఆయన పరామర్శించారు. ఇదే సమయంలో ఈ విమాన ప్రమాదంలో గాయపడిన ఇతర మెడికోలతోనూ మోడీ మాట్లాడి ధైర్యం చెప్పారు.

కాగా... గుజరాత్ ముఖ్యమంత్రిగా 12 సంవత్సరాలు పనిచేసిన ప్రధాని నరేంద్ర మోడీ.. ఈ విషాదం తనను తీవ్ర దిగ్భ్రాంతికి గురిచేసిందని గురువారం ‘ఎక్స్’ వేదికగా వెల్లడించిన సంగతి తెలిసిందే. ఇదే సమయంలో... ఇది మాటల్లో చెప్పలేని హృదయ విదారకం అని.. ఈ విచారకర సమయంలో తన ఆలోచనలు ఈ ప్రకాదం బారిన పడిన ప్రతీ ఒక్కరితోనూ ఉంటాయని తెలిపారు.

మరోవైపు ఎయిరిండియా ఎండీ, సీఈఓ క్యాంప్ బెల్ విల్సన్ కూడా ప్రమదం జరిగిన స్థలాన్ని పరిశీలించారు. అనంతరం.. ఆస్పత్రిలో క్షతగాత్రులను పరామర్శించారు. ప్రస్తుతం ప్రమాద స్థలంలో సహాయక చర్యలు కొనసాగుతున్నాయి.