రేవంత్ vs కౌశిక్ : తెలంగాణలో ‘గలీజు’ రాజకీయం

తెలంగాణ రాజకీయాలు మరోసారి ఫోన్ ట్యాపింగ్ వివాదంతో వేడెక్కాయి. ముఖ్యమంత్రి రేవంత్ రెడ్డిపై బీఆర్ఎస్ ఎమ్మెల్యే పాడి కౌశిక్ రెడ్డి చేసిన దారుణ ఆరోపణలు రాష్ట్రంలో తీవ్ర ప్రకంపనలు సృష్టిస్తున్నాయి. హీరోయిన్లు, మంత్రుల ఫోన్‌లు ట్యాప్ చేయబడుతున్నాయని కౌశిక్ రెడ్డి చేసిన వ్యాఖ్యలు రాజకీయ వర్గాల్లోనే కాకుండా ప్రజల్లోనూ ఆందోళన కలిగిస్తున్నాయి. ఒక ముఖ్యమంత్రిని టార్గెట్ చేస్తూ బీఆర్ఎస్ ఎమ్మెల్యే ఈ స్థాయిలో వ్యక్తిగత విమర్శలకు దిగడంపై విశ్లేషకులు తీవ్ర అభ్యంతరం వ్యక్తం చేస్తున్నారు.

-కౌశిక్ రెడ్డి ఆరోపణల పరంపర

కౌశిక్ రెడ్డి ఆరోపణల సారాంశం చూస్తే, రేవంత్ రెడ్డి "ఇష్టానుసారం మాట్లాడితే, ఆయన ఎవరెవరితో తిరిగారో ఆ 16 మంది పేర్లు బయటపెడతానని" హెచ్చరించారు. అంతేకాకుండా రేవంత్ రెడ్డి జూబ్లీహిల్స్, దుబాయ్, ఢిల్లీలలో ఎక్కడెక్కడ బస చేశారో తనకు అన్నీ తెలుసని సంచలన వ్యాఖ్యలు చేశారు. ఈ ఆరోపణలు వ్యక్తిగత దూషణల స్థాయికి దిగజారాయని విశ్లేషకులు అభిప్రాయపడుతున్నారు. కౌశిక్ రెడ్డి ఆరోపణల్లో అత్యంత సంచలనాత్మకమైనది మిస్ వరల్డ్ పోటీదారుల ఫోన్లను కూడా రేవంత్ రెడ్డి ట్యాప్ చేశారనడం. ఈ ఆరోపణలు కేవలం ఊహాగానాలు కావని, వాస్తవాలని ఆయన గట్టిగా కాంగ్రెస్ వాదులు నొక్కి చెప్పారు. అంతేకాకుండా ఇద్దరు మంత్రులు రేవంత్ రెడ్డి గురించి ఫోన్‌లో మాట్లాడుకున్న మాటలను ఆయన ట్యాప్ చేసి విన్నారని.. ఆ తర్వాత వారిలో ఒకరిని పిలిపించుకొని ఎందుకు అలా అనుకుంటున్నారని ప్రశ్నించారని కౌశిక్ రెడ్డి వెల్లడించారు.

ఈ ఫోన్ ట్యాపింగ్ వ్యవహారంపై మంత్రులు తీవ్ర అసంతృప్తితో ఉన్నారని, అందుకే కేబినెట్ మీటింగ్‌కు హాజరవ్వకుండా ఢిల్లీలో కూర్చున్నారని కౌశిక్ రెడ్డి ఆరోపించారు. ప్రభుత్వంలో ఉన్న తమ ఫోన్‌లు కూడా రేవంత్ రెడ్డి ట్యాప్ చేస్తున్నాడని మంత్రులు ఢిల్లీలో "పెద్ద గొడవ" చేస్తున్నారని ఆయన పేర్కొన్నారు. ఈ విషయం సోనియా గాంధీ, రాహుల్ గాంధీకి తెలిసి రేవంత్ రెడ్డిపై సీరియస్‌గా ఉన్నారని కౌశిక్ రెడ్డి చేసిన వ్యాఖ్యలు ఈ వివాదానికి జాతీయ స్థాయి ఆపాదించాయి.

-హద్దులు దాటుతున్న ఆరోపణలు.. వ్యక్తిగత దూషణల స్థాయికి రాజకీయం

కౌశిక్ రెడ్డి ఆరోపణలు రాజకీయాన్ని వ్యక్తిగత దూషణల స్థాయికి తీసుకువెళ్లాయి. ముఖ్యమంత్రిని పట్టుకొని ఈ విధంగా మాట్లాడటం రాజకీయాల్లో ఆమోదయోగ్యం కాదని అనేక మంది విశ్లేషకులు అభిప్రాయపడుతున్నారు. ఇది ఆరోగ్యకరమైన ప్రజాస్వామ్యానికి మంచి సంకేతం కాదని వారు అంటున్నారు. ఫోన్ ట్యాపింగ్ ఆరోపణలు తీవ్రమైనవి. కానీ వాటిని కౌశిక్ రెడ్డి ఏ ఆధారాలతో చేస్తున్నారు అనేది స్పష్టంగా లేదు. ఈ ఆరోపణలు కేవలం రాజకీయ లబ్ధి కోసమే చేస్తున్నారా, లేక వాటికి బలమైన ఆధారాలు ఉన్నాయా అనేది తేలాల్సి ఉంది. ఒకవేళ ఆరోపణలు నిజమైతే, అది ప్రభుత్వానికి తీవ్ర ఇబ్బందులను కలిగిస్తుంది.

బీఆర్ఎస్ పార్టీ ముఖ్యమంత్రి రేవంత్ రెడ్డిని టార్గెట్ చేసి, ప్రభుత్వాన్ని అప్రతిష్టపాలు చేయడానికి ఈ ఆరోపణలను ఒక అస్త్రంగా వాడుకుంటున్నట్లు స్పష్టంగా కనిపిస్తుంది. గతంలో జరిగిన ఫోన్ ట్యాపింగ్ వ్యవహారాలను తిరిగి తెరపైకి తెచ్చి, అధికార పక్షాన్ని ఇరుకున పెట్టే ప్రయత్నం జరుగుతోంది.

ఈ ఆరోపణలపై కాంగ్రెస్ పార్టీ, ముఖ్యమంత్రి రేవంత్ రెడ్డి ఏ విధంగా స్పందిస్తారో చూడాలి. ఈ ఆరోపణలను ఖండించి, కౌశిక్ రెడ్డిపై చట్టపరమైన చర్యలకు పూనుకుంటారా లేదా అనేది ఆసక్తికరంగా మారింది. మంత్రుల అసంతృప్తి, ఢిల్లీలో జరుగుతున్న చర్చల వెనుక వాస్తవాలు ఎంతవరకు ఉన్నాయో కూడా తేలాల్సి ఉంది.

మొత్తం మీద కౌశిక్ రెడ్డి చేసిన ఈ ఆరోపణలు తెలంగాణ రాజకీయాలను మరింత రచ్చకు దారి తీసే అవకాశం ఉంది. ఈ వ్యవహారం రాబోయే రోజుల్లో ఎలాంటి మలుపులు తిరుగుతుందో వేచి చూడాలి.