'ఆపరేషన్ సింధూర్' టైటిల్ కోసం ఎగబడుతున్న బాలీవుడ్

భారత సైన్యం పాక్ ఆక్రమిత కాశ్మీర్.. పాకిస్తాన్‌లోని ఉగ్రవాద శిబిరాలపై మెరుపుదాడి చేసి 'ఆపరేషన్ సింధూర్'ను విజయవంతంగా పూర్తి చేసిన నేపథ్యంలో, ఈ సంఘటన ఆధారంగా సినిమా తీయడానికి బాలీవుడ్ నిర్మాతలు ఆసక్తి చూపుతున్నారు. ఈ 'ఆపరేషన్ సింధూర్' టైటిల్‌ను తమ సినిమాల కోసం నమోదు చేసుకోవడానికి సినీ వర్గాల్లో తీవ్ర పోటీ నెలకొంది.

తాజా సమాచారం ప్రకారం.., పలువురు ప్రముఖ నిర్మాతలు ఈ టైటిల్ కోసం ప్రయత్నిస్తున్నారు. మహవీర్ జైన్ ఫిల్మ్స్ ఈ రేసులో ముందున్నట్లు సమాచారం. ఈ బ్యానర్ 'ఆపరేషన్ సింధూర్' టైటిల్‌ను మొదటగా నమోదు చేసుకున్నట్లు తెలుస్తోంది. ప్రముఖ దర్శకుడు మధుర్ బండార్కర్ కూడా ఈ టైటిల్‌ను రిజిస్టర్ చేయించుకున్నారు.

వీరితో పాటు, ప్రముఖ నిర్మాణ సంస్థలు జీ స్టూడియోస్ , టీ-సిరీస్ కూడా ఈ టైటిల్ కోసం దరఖాస్తు చేసుకున్నాయి. ఇవి వరుసగా మూడు, నాలుగు స్థానాల్లో ఉన్నాయి. ఇటీవలే పహల్గాంలో జరిగిన ఉగ్రవాద దాడిలో 26 మంది అమాయక పర్యాటకులు మరణించిన ఘటనకు ప్రతీకారంగా భారత సైన్యం ఈ ఆపరేషన్‌ను చేపట్టింది. ఈ నేపథ్యంలో ఈ ఆపరేషన్ , పహల్గాం దాడి నేపథ్యంలో సినిమా తీయాలని ఈ బ్యానర్లు యోచిస్తున్నట్లు సమాచారం.

'ఆపరేషన్ సింధూర్' అనేది చాలా శక్తివంతమైన టైటిల్ అని, ఇది భారత సైన్యం యొక్క పరాక్రమాన్ని తక్షణమే గుర్తు చేస్తుందని సినీ వర్గాలు అభిప్రాయపడుతున్నాయి. ఇది ఉగ్రవాద దాడిలో తమ భర్తలను, కుటుంబ సభ్యులను కోల్పోయిన మహిళలకు నివాళిగా కూడా నిలుస్తుందని అంటున్నారు.

అయితే, ఈ టైటిల్ కోసం ఇంత పోటీ ఉండటం పరిశ్రమ వర్గాలను ఆశ్చర్యపరుస్తోంది. చివరికి ఈ టైటిల్ ఎవరికి దక్కుతుందో చూడాలని అందరూ ఆసక్తిగా ఎదురుచూస్తున్నారు. నియమాల ప్రకారం, టైటిల్‌ను మొదట ఎవరు నమోదు చేసుకుంటే వారికే దక్కుతుంది. కానీ ఏ బ్యానర్ ఈ టైటిల్‌తో సినిమాను అధికారికంగా ప్రకటిస్తుందో తెలియడానికి మరికొన్ని రోజులు వేచి చూడాల్సిందే.

సైనిక కార్యకలాపాల ఆధారంగా రూపొందించిన సినిమాలు ఎల్లప్పుడూ ప్రేక్షకులను ఆకట్టుకుంటాయి. 'బోర్డర్', 'యూరి', 'రాజీ', 'అమరన్' వంటి చిత్రాలు ప్రేక్షకుల ఆదరణ పొందాయి. బహుశా ఇదే కారణంతో బాలీవుడ్ నిర్మాతలు 'ఆపరేషన్ సింధూర్' టైటిల్ కోసం ఇంతగా పోటీ పడుతున్నారని విశ్లేషకులు భావిస్తున్నారు.