ఎలక్టోరల్ బాండ్స్ తెచ్చింది అందుకే అంటున్న కేంద్రమంత్రి!

లోక్ సభ ఎన్నికలు సమీపిస్తున్న వేళ ఇప్పుడు దేశవ్యాప్తంగా ఎలక్టోరల్ బాండ్ల వ్యవహారం తీవ్ర చర్చనీయాంశం అయిన సంగతి తెలిసిందే. ఈ పథకాన్ని సుప్రీంకోర్టు రద్దు చేసిన నేపథ్యంలో కేంద్రంపై విపక్షాలు విరుచుకుపడుతున్నాయి. పైగా.. ఈ పథకం వల్ల క్విడ్ ప్రోకో రూపం మార్చుకుందని, ఫలితంగా అధికారపార్టీ ఖజానా నిండిందని రకరకాల కామెంట్లు వినిపిస్తున్నాయి. ఈ నేపథ్యంలో కేంద్రమంత్రి నితిన్ గడ్కరీ స్పందించారు. ఇందులో భాగంగా ఆసక్తికర వ్యాఖ్యలు చేశారు.

అవును... ఇప్పుడు దేశవ్యాప్తంగా ఎలక్టోరల్ బాండ్లు తీవ్ర చర్చనీయాంశం అయిన వేళ జరుగుతున్న పరిణామాలపై కేంద్రమంత్రి నితిన్ గడ్కరీ స్పందించారు. ఇందులో భాగంగా... మంచి ఉద్దేశ్యంతోనే కేంద్రం ఈ పథకాన్ని ప్రవేశపెట్టిందని తెలిపారు. ఇదే క్రమంలో.. విరాళాలు లేకుండా ఒక రాజకీయ పార్టీని నడపడం సాధ్యంకాదని కుండబద్దలు కొట్టారు! గుజరాత్ లో జరిగిన ఒక కార్యక్రమంలో పాల్గొన్న సందర్భంగా గడ్కరీ ఈ వ్యాఖ్యలు చేశారు.

ఇదే క్రమంలో... అరుణ్ జైట్లీ ఆర్థిక మంత్రిగా ఉన్న సమయంలో ఈ పథకం గురించిన చర్చలు జరిగాయని, నాడు జరిగిన ఆ చర్చల్లో తానుకూడా ఉన్నట్లు తెలిపిన గడ్కరీ... ఆర్థిక వనరులు లేకుండా ఏ పార్టీ మనుగడ సాధించలేదని తెలిపారు. అసలు కొన్ని దేశాల్లో ప్రభుత్వాలే ఆయా రాజకీయ పార్టీలకు నిధులు సమకూర్తుస్తాయని.. ఐతే... మన దేశంలో అలాంటి అవకాశం లేకపోవడం వల్లే ఇలాంటి స్కీం తీస్సుకొచ్చినట్లు వెల్లడించారు.

అసలు ఈ స్కీం తీసుకొచ్చిన ప్రధాన ఉద్దేశ్యమే.. పార్టీలకు నేరుగా నిధులు పొందేందుకే అని.. అధికారంలో ఉన్న పార్టీ మారితే విరాళాలు ఇచ్చేవారికి సమస్యలు తలెత్తుతాయనే కారణంతోనే దాతల పేర్లు రహస్యంగా ఉంచడం జరిగిందని అన్నారు. విరాళాల విషయంలో పారదర్శకత ఉండాలన్న సదుద్దేశంతోనే ఈ బాండ్ల పథకాన్ని ప్రవేశపెట్టినట్లు చెప్పుకొచ్చారు! దీనిలో ఏవైనా లోటుపాట్లు ఉన్నట్లు సుప్రీంకోర్టు గుర్తిస్తే.. సరిదిద్దమని పార్టీలను కోరాల్సిందని అభిప్రాయపడ్డారు.

కాగా... ఎన్నికల బాండ్ల పథకాన్ని రద్దుచేస్తూ ఈ ఏడాది ఫిబ్రవరిలో సుప్రీంకోర్టు సంచలన తీర్పు వెలువరించిన సంగతి తెలిసిందే. ఇందులో భాగంగా... దీనికి సంబంధించిన బాండ్ల వివరాలన్నీ సమర్పించాలని స్టేట్ బ్యాంక్ కు సూచించింది. ఈ సమయంలో కేంద్ర ఎన్నికల సంఘం తన వెబ్ సైట్ లో ఉంచింది. ఈ నేపథ్యంలో ఫైనల్ లిస్ట్ కూడా వెలువడటంతో సంచలన విషయాలు తెరపైకి వస్తున్నాయి!!