మోడీ 'సైలెన్స్ వార్'.. ట్రంప్ ను ఆడుకుంటున్నాడుగా..

ట్రంప్ లా ఊరికే వాగే వాగుడుకాయ మోడీ కాదు. ఆయనలా లేనిపోనివి కల్పించి మీడియా ముందర ఫోజులు కొట్టే రకం అంతకన్నా కాదు.. అందుకే ప్రపంచంలోనే అత్యంత ప్రజాదరణ గల నేతల్లో మోడీనే టాప్. మోడీ అంటే ఒక హుందాతనం.. ఒక సంస్కారం.. ఒక పెద్దరికం.. అందుకే మోడీ తనకు వంగకపోయేసరికి ట్రంప్ హర్ట్ అయ్యాడు. పలుమార్లు సంప్రదించినా మోడీ స్పందించకపోవడంతో చిరాకుతో టారిఫ్ లు వేశాడు. మోడీ అన్నింటికీ మౌనమే ఆయుధంగా మార్చాడు. ట్రంప్ కు చుక్కలు చూపిస్తున్నాడు. ఇలా సైలెన్స్ వార్ ఏ లీడర్ ఇప్పటివరకూ చేయలేదు. అగ్రరాజ్యాధిపతిని ఆడుకోలేదు.

ప్రస్తుతం అంతర్జాతీయ రాజకీయాల్లో భారత్-అమెరికా సంబంధాలు ఒక ఆసక్తికరమైన మలుపు తిరిగాయి. గతంలో ఎన్నడూ లేని విధంగా ఒక అగ్రరాజ్య కేబినెట్ మంత్రి.. భారత ప్రధాని వ్యక్తిగత చొరవపై బహిరంగంగా వ్యాఖ్యానించడం ఇప్పుడు చర్చనీయాంశమైంది. "ప్రధాని మోదీ ఫోన్ చేయకపోవడమే ట్రేడ్ డీల్ ఆగడానికి కారణం" అంటూ అమెరికా వాణిజ్య మంత్రి హోవార్డ్ లుట్నిక్ చేసిన వ్యాఖ్యలు దౌత్య వర్గాల్లో ప్రకంపనలు సృష్టిస్తున్నాయి.

మౌనం వెనుక ఉన్న మర్మమేంటి?

సాధారణంగా ఏ దేశంతోనైనా వాణిజ్య ఒప్పందాలు ఆయా దేశాల ప్రతినిధులు, అధికారుల మధ్య జరిగే సుదీర్ఘ చర్చల ఫలితంగా కుదురుతాయి. కానీ ట్రంప్ హయాంలో అమెరికా ధోరణి భిన్నంగా ఉంది. లుట్నిక్ మాటల ప్రకారం.. ఇండోనేషియా, వియత్నాం వంటి దేశాలు అమెరికా దారిలోకి వచ్చాయి. బ్రిటన్ ప్రధాని కియర్ స్టార్మర్ స్వయంగా ట్రంప్‌కు ఫోన్ చేసి తన దేశ ప్రయోజనాలను కాపాడుకున్నారు. కానీ ప్రధాని మోదీ మాత్రం ఈ విషయంలో తనదైన శైలిలో 'మౌనం' వహించారు. ఇది కేవలం మౌనం కాదు, భారత్ తన ఆత్మగౌరవాన్ని, స్వయంప్రతిపత్తిని ఏ దేశం దగ్గరా తాకట్టు పెట్టదు అనే సంకేతమని విశ్లేషకులు భావిస్తున్నారు.

ట్రేడ్ డీల్ రద్దు.. సుంకాల బెదిరింపులు!

భారత్‌తో ఒప్పందం దాదాపు ఖరారైనప్పటికీ మోదీ నుంచి ఆశించిన స్థాయిలో 'వ్యక్తిగత స్పందన' లేకపోవడంతో అమెరికా ఆ డీల్‌ను వెనక్కి తీసుకుంది. అక్కడితో ఆగకుండా రష్యా నుంచి చమురు కొనుగోలు చేసే భారత్ వంటి దేశాలపై ఏకంగా 500 శాతం సుంకాలు విధిస్తామన్న బెదిరింపులకు దిగింది. ఇతర చిన్న దేశాలతో ఒప్పందాలు చేసుకుంటూ భారత్‌ను ఒంటరిని చేసే ప్రయత్నం చేస్తోంది..

ఇది భారత్ గౌరవమా? లేక దౌత్యపరమైన లోపమా?

అమెరికా మంత్రి వ్యాఖ్యలను విశ్లేషిస్తే ట్రంప్ యంత్రాంగం భారత్ నుంచి ఒక రకమైన 'విధేయత'ను ఆశిస్తున్నట్లు కనిపిస్తోంది. అయితే, ప్రపంచంలోనే వేగంగా ఎదుగుతున్న ఆర్థిక వ్యవస్థగా భారత్ తన షరతులపైనే వ్యాపారం చేయాలని మొండిగా ఉంది.

బ్రిటన్ ప్రధాని చేసినట్లుగా మోదీ ఫోన్ చేయకపోవడం వెనుక ఉన్న కారణం.. భారత్ తన ప్రయోజనాల విషయంలో రాజీ పడకపోవడమే. రష్యా నుంచి చమురు కొనుగోలు విషయంలో అమెరికా ఒత్తిడికి తలొగ్గని భారత్ వాణిజ్య ఒప్పందం కోసం ఫోన్ చేసి బతిమలాడుకునే స్థితిలో లేదని ఢిల్లీ వర్గాల సమాచారం.

భవిష్యత్తు ఏంటి?

ప్రస్తుతానికి భారత్-అమెరికా మధ్య సంబంధాలు సున్నిత దశలో ఉన్నాయి. ఒకవైపు గ్రీన్‌లాండ్‌ను కొనుగోలు చేసే దిశగా ట్రంప్ అడుగులు వేస్తుంటే మరోవైపు భారత్‌పై ఆర్థిక ఒత్తిడి పెంచాలని చూస్తున్నారు. అయితే ప్రధాని మోదీ ఇప్పటికైనా ఫోన్ చేసి చర్చలు ప్రారంభిస్తారా? లేక తన 'మౌనం'తోనే అమెరికా దూకుడుకు అడ్డుకట్ట వేస్తారా? అనేది వేచి చూడాలి.

అమెరికా అహంకారానికి.. భారత్ ఆత్మగౌరవానికి మధ్య జరుగుతున్న ఈ పోరులో చివరకు గెలిచేది ఎవరన్నది ప్రపంచ దేశాలు ఆసక్తిగా గమనిస్తున్నాయి. మోదీ మౌనం అమెరికాకు శాపంగా మారుతుందా లేదా అనేది రానున్న రోజుల్లో స్పష్టమవుతుంది.