కోకాపేట -టమాటా తోటా... మీమ్స్ వైరల్!

గత రెండు మూడు రోజులుగా ఎక్కడ చూసినా కోకాపేట భూములకు సంబధించిన చర్చే సాగుతోన్న సంగతి తెలిసిందే. ఏ ఇద్దరు వ్యక్తులు మాట్లాడుకున్నా మధ్యలో కోకాపేట భూముల టాపిక్ ఉండకుండా ఉండే ఛాన్స్ లేదన్నా అతిశయోక్తి కాదేమో. ఈ సమయంలో కోకాపేట భూముల ధరల విషయంలో క్రియేటివిటీకి పనిచేప్పారు మీమర్స్!

అవును... కోకాపేట భూముల వేలంలో ఎకరానికి అత్యధికంగా రూ.100 కోట్ల రేటు పలికిన విషయం తెలిసిందే. అలాగే, మరికొన్ని ప్లాట్లు కూడా అతి భారీ ధరకు అమ్ముడుపోయాయి. ఇలా హైదరాబాద్ శివారులోని కోకాపేట భూములు అంచనాలకు మించి ధర పలుకుతున్న వేళ సామాజిక మాధ్యమాల్లో దీనిపై మీమ్స్ వెల్లువెత్తుతున్నాయి.

కోకాపేటలో ఒక్క అడుగు భూమున్నా చాలు అంటూ సామాజిక మాధ్యమాల్లో జోకులు పేలుతున్నాయి. ఇదే సమయంలో పెళ్లి చేసుకుంటే అక్కడ భూములు ఉన్న అబ్బాయిలను పెళ్లి చేసుకోవాలని కొందరు మీమ్స్ సృష్టిస్తుంటే.. మా తాతకు అక్కడ భూములు ఉన్నట్లు రాత్రి కల వచ్చిందంటూ మరికొందరు వాట్సప్ స్టేటస్ లు పెట్టుకుంటున్నారు.

ఇదే సమయంలో... దేశంలో ఇప్పుడు రిచ్చెస్ట్ ప్లేస్ లు రెండే రెండు... వాటిలో ఒకటి కోకాపేట - రెండోది టమాటా తోట అంటూ యతిప్రాసలతో కూడిన మీమ్స్ ఆన్ లైన్ వేదికగా వైరల్ అవుతున్నాయి. ప్రస్తుతం దేశవ్యాప్తంగా టమాటా రేట్లు కోండెక్కు కూర్చోగా.. కోకాపేట రేట్లు పర్వతాలెక్కాయని అంటున్నారు.

మరోపక్క #Kokapet అనే హ్యాష్‌ ట్యాగ్‌ తో పాటు.. నటి ఝాన్సీ, #KokapetAunty పేర్లు సోషల్ మీడియాలో ట్రెండింగ్‌ లో ఉన్నాయి. 2007లో వెంకటేష్ నటించిన "తులసి" చిత్రంలో ఝాన్సీ "కోకాపేట్ ఆంటీ"గా నటించిన సంగతి తెలిసిందే. తమ కోకాపేట్ భూములను అమ్మి ధనవంతురాలిగా మారినట్లు సినిమాలో ఆ పాత్ర ఉంటుంది.

తాజాగా కోకాపేట ల్యాండ్స్ ఎకరం 100 కోట్ల రూపాయలు పలగడంతో... కోకాపేట్ భూముల విలువ కోట్లాది రూపాయలని ఝాన్సీ చాలా కాలం క్రితమే పేర్కొన్నారని చెబుతూ... ఈ వీడియో క్లిప్‌ ను షేర్ చేయడం ప్రారంభించారు నెటిజన్లు. ఇప్పుడు ఈ వీడియో వైరల్ అవుతోంది.