ఫ్రాన్స్‌ అందుకే అంటుకుంది.. ఆ దేశాలపై జేడీ వాన్స్ దురంహకారం..

తరతరాల చరిత్రకు నిలువెత్తు సాక్ష్యాలుగా నిలిచిన కట్టడాలు.. శతాబ్దాల సంస్కృతిని గుండెల్లో దాచుకున్న నగరాలు.. నేడు అగ్నికీలల్లో కాలిపోతుంటే ఏ మనసు మాత్రం విలపించదు? అద్భుతమైన సంస్కృతితో జగజ్జేగీయమానంగా వెలిగిన ఫ్రాన్స్ గడ్డపై నేడు వ్యక్తమవుతున్న అశాంతి, హింస ప్రపంచాన్ని తీవ్ర వేదనకు గురిచేస్తోంది. 'మరిన్ని చారిత్రక కట్టడాలు ధ్వంసమై ఆ అందమైన దేశపు గుర్తులు బూడిదపాలు కాకముందే ఈ ఉన్మాదం ఆగాలి' అంటూ అమెరికా ఉపాధ్యక్షుడు జేడీ వాన్స్ చేసిన ఆవేదన నిండిన వ్యాఖ్యలు.. నేడు వలసల విధానాలు సృష్టిస్తున్న సామాజిక గాయాలను, మనుషుల మధ్య పెరుగుతున్న దూరాన్ని కళ్ళకు కడుతున్నాయి.

ఫ్రాన్స్‌లో అల్లర్లు, సామాజిక ఉద్రిక్తతలపై అమెరికా ఉపాధ్యక్షుడు జేడీ వాన్స్ చేసిన వ్యాఖ్యలు అంతర్జాతీయంగా చర్చనీయాంశంగా మారాయి. పాశ్చాత్య దేశాలు డైవర్సిటీ వైవిధ్యం పేరుతో థర్డ్ వరల్డ్ దేశాల నుంచి పెద్ద సంఖ్యలో ప్రజలను తమ దేశాల్లోకి అనుమతిస్తున్నాయని ఆయన ఆరోపించారు. ఇలాంటి వలస విధానాలే ఫ్రాన్స్ వంటి దేశాల్లో సామాజిక సమస్యలకు, అల్లర్లకు కారణమవుతున్నాయని అభిప్రాయపడ్డారు. వలసల విషయంలో తాము గతంలోనే హెచ్చరికలు చేసినప్పటికీ ఆయా దేశాల నాయకులు వాటిని పట్టించుకోలేదని విమర్శించారు.

వలస విధానాలపై మరోసారి విమర్శలు

యూరప్‌లో వలసలు, శరణార్థుల అంశం కొంతకాలంగా రాజకీయంగా కీలక చర్చగా కొనసాగుతోంది. ముఖ్యంగా ఆఫ్రికా, మధ్యప్రాచ్యం, ఆసియా ప్రాంతాల నుంచి యూరోపియన్ దేశాలకు వలసలు వెళ్లడం.. వాటి ప్రభావం స్థానిక సమాజాలపై ఎలా ఉంటుందనే అంశాలపై ఆందోళనలు వ్యక్తమవుతున్నాయి. వలసల వల్ల కార్మికుల కొరతను అధిగమించవచ్చని.. ఆర్థిక వ్యవస్థకు ప్రయోజనాలు కలగవచ్చని కొందరు వాదిస్తుండగా.. నియంత్రణలేని వలసలు ప్రజా సేవలు, గృహ వసతి, భద్రత, సామాజిక సమన్వయంపై ఒత్తిడి పెంచుతాయని మరికొందరు అభిప్రాయపడుతున్నారు. ఈ నేపథ్యంలో జేడీ వాన్స్ వ్యాఖ్యలు ప్రాధాన్యం సంతరించుకున్నాయి. వైవిధ్యం పేరుతో అమలు చేస్తున్న విధానాలను పాశ్చాత్య దేశాలు పునఃసమీక్షించుకోవాలని ఆయన సూచించినట్లు తెలుస్తోంది.

ఫ్రాన్స్‌ అందమైన దేశం.. అల్లర్లు ఆగాలి

ఫ్రాన్స్‌పై విమర్శలు చేసినప్పటికీ ఆ దేశం పట్ల తనకు ఉన్న అభిప్రాయాన్ని కూడా వాన్స్ వ్యక్తం చేశారు. ‘అద్భుతమైన ప్రజలున్న అందమైన దేశం ఫ్రాన్స్. మరిన్ని చారిత్రక కట్టడాలు తగలబడక ముందే ఈ ఉన్మాదం ఆగాలని ప్రార్థిస్తున్నా’ అని పేర్కొన్నారు. ఈ వ్యాఖ్యలతో ఫ్రాన్స్‌లోని హింసాత్మక ఘటనలపై ఆందోళన వ్యక్తం చేస్తూనే.. వాటికి వలస విధానాలే కారణమనే తన వాదనను ఆయన ముందుకు తెచ్చారు.

ఫ్రాన్స్‌కు ప్రపంచవ్యాప్తంగా గొప్ప సాంస్కృతిక, చారిత్రక గుర్తింపు ఉంది. పారిస్‌తో పాటు అనేక నగరాల్లోని చారిత్రక కట్టడాలు, మ్యూజియంలు, పర్యాటక ప్రాంతాలు ఆ దేశానికి ప్రత్యేక గుర్తింపును తెచ్చాయి. అల్లర్లు, అగ్నిప్రమాదాలు, ఆస్తుల ధ్వంసం వంటి ఘటనలు చోటుచేసుకున్నప్పుడు ప్రజల భద్రతతో పాటు వారసత్వ సంపదను కాపాడుకోవడం కూడా ప్రభుత్వాలకు పెద్ద సవాలుగా మారుతుంది.

యూరప్‌లో వలసలపై పెరుగుతున్న రాజకీయ చర్చ

వలసల నియంత్రణ, సరిహద్దుల భద్రత, శరణార్థుల పునరావాసం, స్థానిక ప్రజలతో వలస వచ్చిన వారి సమన్వయం వంటి అంశాలు యూరప్ రాజకీయాల్లో కీలక స్థానాన్ని ఆక్రమించాయి. కొన్ని రాజకీయ పార్టీలు కఠినమైన వలస విధానాలను కోరుతుండగా.. మరికొన్ని పార్టీలు మానవ హక్కులు, శరణార్థుల రక్షణ, కార్మిక అవసరాలను దృష్టిలో పెట్టుకుని సమతుల్య విధానాలు అవసరమని వాదిస్తున్నాయి.

జేడీ వాన్స్ వ్యాఖ్యలు అమెరికా, యూరప్ దేశాల మధ్య వలస విధానాలపై జరుగుతున్న చర్చకు మరింత ప్రాధాన్యం తీసుకొచ్చాయి. వలసల నియంత్రణ, సామాజిక సమన్వయం, ప్రజల భద్రత మధ్య సమతుల్యత సాధించడం పాశ్చాత్య దేశాల ముందున్న కీలక సవాలుగా కొనసాగుతోంది.