యూఎస్ లో భారత వలసదారులకు సంకెళ్లు... కేంద్రం క్లారిటీ ఇదే!

అమెరికాలో అక్రమంగా నివస్తిస్తున్న విదేశీయులపై ట్రంప్ ఉక్కుపాదం మోపుతున్న సంగతి తెలిసిందే. తన ప్రమాణస్వీకారం అనంతరం అక్రమ వలసదారులకు అమెరికాలో అవకాశం లేకుండా చేస్తున్నారు! ఈ సమయంలో.. భారతీయులను వెనక్కి పంపినప్పుడు వారికి సంకెళ్లు వేశారంటూ కొన్ని ఫోటోలు వైరల్ అయ్యాయి. దీనిపై తాజాగా కేంద్రం క్లారిటీ ఇచ్చింది.

అవును.. అమెరికాలో అక్రమంగా నివసిస్తున్న భారతీయులను ట్రంప్ సర్కార్ మిలటరీ విమానంలో బుధవారం వెనక్కి పంపిన సంగతి తెలిసిందే. ఈ క్రమంలో తొలివిడతలో భాగంగా... 104 మంది భారతీయులను అమృత్ సర్ కు పంపించింది. ఈ సమయంలో వారి కాళ్లకు, చేతులకు సంకెళ్లు వేసి ఉన్నట్లు పలు ఫోటోలు నెట్టింట హల్ చల్ చేశాయి!

దీంతో... ఈ ఫోటోలు వైరల్ కావడంతో పాటు, పెను రాజకీయ దుమారాన్ని లేపాయి. భారతీయుల కాళ్లకు గొలుసులు, చేతికి సంకెళ్లు ఉన్న ఫోటోలు షేర్ చేస్తూ తీవ్రంగా ఖండించారు కాంగ్రెస్ నేతలు! ఈ సందర్భంగా.. వారిని నేరస్థులుగా ట్రీట్ చేస్తూ పంపించడం అవమానకారమని, ఓ భారతీయుడిగా తాను ఇవి చూడలేకపోతున్నానని పవర్ ఖేడా ఆవేదన వ్యక్తం చేశారు.

ఆ ఫోటోలు పెను దుమారం రేపడంతో ప్రభుత్వానికి చెందిన పీఐబీ ఫ్యాక్ట్ చెక్ డిపార్ట్ మెంట్ ఆ ఫోటోలపై నిజ నిర్ధారణ ప్రక్రియ చేపట్టింది. ఈ సందర్భంగా... అవి భారతీయుల ఫోటోలు అనే ప్రచారం ఫేక్ అని తేలినట్లు వెల్లడించింది. ఈ మేరకు ఎక్స్ లో పోస్ట్ పెట్టింది.

ఈ సందర్భంగా... భారత వలసదారులను సంకెళ్లు వేసి స్వదేశానికి పంపించినట్లుగా సోషల్ మీడియాలో వైరల్ అవుతోన్న దృశ్యాలు నకిలీవని.. ఆ ఫోటోల్లో ఉన్నది భారతీయులు కాదని.. వాస్తవానికి అవి అమెరికాలో ఉన్న కొంతమంది అక్రమ వలసదారులను గ్వాటెమాలాకు పంపిస్తున్నప్పటి ఫోటోలని రాసుకొచ్చింది. దీంతో... ఈ దుమారానికి బ్రేక్ పడినట్లే అనే కామెంట్లు వినిపిస్తున్నాయి.

కాగా... 104 మంది అక్రమ వలసదారులతో టెక్సాస్ నుంచి బయలుదేరిన అమెరికా సైనిక విమానం సి-017.. బుధవారం మధ్యాహ్నం 1:55 గంటలకు అమృత్ సర్ అంతర్జాతీయ విమానశ్రయానికి చేరుకున్న సంగతి తెలిసిందే. ఇలా వచ్చినవారిలో 33 మంది హర్యానా, 33 మంది గుజరాత్, 30 మంది పంజాబ్ వాసులతో పాటు ముగ్గురు యూపీ, ముగ్గురు మహారాష్ట్ర, ఇద్దరు చండీగఢ్ వాసులు ఉన్నట్లు చెబుతున్నారు.