భారత్ లో చిక్కుకున్న విదేశీయులకు 30 రోజుల గడువు!

పశ్చిమాసియా యుద్ధ రంగంలో క్షిపణులు గర్జిస్తుంటే, అంతర్జాతీయ విమాన మార్గాలు మూతపడి వేలాది మంది ప్రయాణికులు దిక్కుతోచని స్థితిలో పడిపోయారు. ఇరాన్-ఇజ్రాయెల్ మధ్య మొదలైన ఈ యుద్ధం 15వ రోజుకు చేరుకోగా, గల్ఫ్ దేశాలన్నీ యుద్ధ ముఖద్వారం వద్ద నిలిచాయి. విమాన సర్వీసులు నిలిచిపోవడంతో భారత్ మీదుగా ప్రయాణించాల్సిన వారు, చిక్కుకుపోయిన విదేశీయులు తమ వీసా గడువు ముగిసిపోతుండడంతో ఆందోళన చెందుతున్నారు. ఈ క్లిష్ట సమయంలో భారత ప్రభుత్వం చారిత్రాత్మక నిర్ణయం తీసుకుంది. గడువు ముగిసినా, మరో 30 రోజుల పాటు అదనపు ఫీజు, ఎటువంటి జరిమానా లేకుండా భారత్ లో ఉండేందుకు విదేశీయులకు అనుమతిస్తూ వెసులుబాటు కల్పించింది. మానవతా దృక్పథంతో కేంద్రం తీసుకున్న ఈ నిర్ణయం ఇప్పుడు వేలాది మంది విదేశీ పౌరుల కళ్లల్లో ఆనందాన్ని నింపుతోంది.

విమానయాన రంగానికి పెద్ద దెబ్బ!

గల్ఫ్ ప్రాంతంలో అనిశ్చిత పరిస్థితుల వల్ల అంతర్జాతీయ విమాన సర్వీసులు పూర్తిగా దెబ్బతిన్నాయి. ఇరాన్, లెబనాన్, ఇతర గల్ఫ్ దేశాల్లో ఇప్పటి వరకు 2,000 మందికి పైగా ప్రాణాలు కోల్పోయారు. భద్రతా కారణాల దృష్ట్యా విమాన సంస్థలు తమ సర్వీసులను నిలిపివేయడం లేదా దారి మళ్లించడం చేస్తున్నాయి. దీనివల్ల భారత్ ను వీడలేక, స్వదేశాలకు వెళ్లలేక ప్రయాణికులు ఇబ్బందులు పడుతున్నారు. దుబాయ్ లోని భారత కాన్సులేట్ జనరల్ ఈ పరిస్థితులను గమనించి, ప్రయాణికులకు ఉపశమనం కలిగించేలా ఈ వీసా పొడిగింపు వివరాలను వెల్లడించింది.

జరిమానాల రద్దు!

సాధారణంగా వీసా గడువు ముగిసిన తర్వాత భారత్ లో నివసించడం నేరం, దానికి భారీగా జరిమానాలు చెల్లించాల్సి ఉంటుంది. కానీ ప్రస్తుత యుద్ధ పరిస్థితుల దృష్ట్యా కేంద్రం ఈ నియమాలను సడలించింది:

30 రోజుల వెసులుబాటు: గడువు ముగిసిన లేదంటే ముగియనున్న అన్ని రకాల వీసాలు/ఇ-వీసాలను ఫారినర్స్ రీజినల్ రిజిస్ట్రేషన్ కార్యాలయాల ద్వారా నెల పాటు ఉచితంగా పొడిగించుకోవచ్చు.

జరిమానాలు ఉండవు: గడువు తీరిన తర్వాత కూడా ఇక్కడ నివసించే విదేశీయులపై ఎటువంటి జరిమానాలు విధించకూడదని ప్రభుత్వం నిర్ణయించింది.

టెంపరరీ ల్యాండింగ్ పర్మిట్లు: భారత్ కు మళ్లించిన విమానాల ప్రయాణికులకు తాత్కాలిక ల్యాండింగ్ పర్మిట్లను సైతం ఉచితంగా అందిస్తున్నారు.

వ్యాపార, పర్యాటక రంగాలపై ప్రభావం!

భారత్ లో చిక్కుకుపోయిన వారిలో కేవలం పర్యాటకులు మాత్రమే కాదు, వ్యాపార నిమిత్తం వచ్చిన కూడా ఉన్నారు. దీన్ని వలస చట్టాల ఉల్లంఘనగా పరిగణించబోమని ప్రభుత్వం భరోసా ఇవ్వడంతో వీరికి ఊరట లభించింది. 30 రోజుల తర్వాత పరిస్థితులను బట్టి గడువును పొడిగించాలా? వద్దా? అనే దానిపై కేంద్రం నిర్ణయం తీసుకోనుంది. ఈ చర్య వల్ల అంతర్జాతీయ వేదికపై భారత్ ప్రతిష్ట పెరిగింది. పొరుగు దేశాల్లో యుద్ధం జరుగుతున్నా, బాధ్యతాయుతమైన దేశంగా భారత్ వ్యవహరిస్తున్న తీరును విదేశీ రాయబార కార్యాలయాలు ప్రశంసిస్తున్నాయి.

ఎగ్జిట్ పర్మిట్లు

యుద్ధ పరిస్థితులు చక్కబడిన తర్వాత స్వదేశాలకు వెళ్లాలనుకునే విదేశీయులకు ఎగ్జిట్ పర్మిట్లు సులభంగా మంజూరు చేస్తామని కాన్సులేట్ తెలిపింది. ఈ సమయంలో వీసా పొడిగింపును కోరకపోవడం లేదా దరఖాస్తు చేయకపోవడం వంటి వాటిని నేరంగా పరిగణించబోరు. గల్ఫ్ సంక్షోభం వల్ల విమాన సర్వీసులు నిలిచిపోవడంతో భారత్ ను వీడలేని ప్రయాణికులకు ఇది ఒక వరమనే చెప్పాలి.

యుద్ధం అనేది కేవలం విధ్వంసాన్ని మాత్రమే కాదు, మానవత్వానికి పరీక్షను కూడా పెడుతుంది. పశ్చిమాసియాలో జరుగుతున్న ఈ భీకర పోరులో భారత్ తటస్థంగా ఉంటూనే, బాధితులకు అండగా నిలుస్తోంది. విదేశీయులకు కల్పించిన ఈ వీసా మినహాయింపులు భారత్ 'అతిథి దేవో భవ' సంస్కృతికి అద్దం పడుతుంది. ఈ 30 రోజుల గడువులోపు యుద్ధం ఆగిపోయి, విమాన సర్వీసులు పునఃప్రారంభం అవుతాయో లేదో వేచి చూడాలి. ఏది ఏమైనా, క్లిష్ట సమయంలో భారత్ తీసుకున్న ఈ స్నేహపూర్వక చర్యను ప్రపంచం ఎప్పటికీ గుర్తుంచుకుంటుంది!