అమెరికా వీసాలపై ఆందోళన వద్దు

అమెరికా వీసా దరఖాస్తుదారులపై ఇటీవల జారీ చేసిన కొత్త మార్గదర్శకాల నేపథ్యంలో భారత విదేశాంగ మంత్రిత్వ శాఖ (MEA) కీలక వివరణ ఇచ్చింది. ఈ మార్గదర్శకాలు భారత-అమెరికా సంబంధాలను దెబ్బతీస్తాయనే ఊహాగానాలను తిప్పికొట్టింది. భారత పౌరుల వీసా దరఖాస్తులను న్యాయమైన, నిష్పాక్షిక పద్ధతిలో పరిశీలించాలని భారత్ విజ్ఞప్తి చేసింది.

విదేశాంగ శాఖ ప్రతినిధి రంధీర్ జైస్వాల్ మాట్లాడుతూ "వీసా, వలస విధానాలు ప్రతి దేశ సార్వభౌమాధికారంలో అంతర్భాగం. అయితే అమెరికా ఎంబసీ జారీ చేసిన కొత్త మార్గదర్శకాల్లో దరఖాస్తుదారులు తమ సోషల్ మీడియా ఖాతాల వివరాలను అందించాలని కోరిన విషయం మా దృష్టికి వచ్చింది. అయితే భారత పౌరుల వీసా దరఖాస్తులను పూర్తిగా మెరిట్ ప్రాతిపదికన పరిశీలించాలి" అని స్పష్టం చేశారు.

భారత్-అమెరికా సంబంధాలపై ఆయన మాట్లాడుతూ "ఇరు దేశాల మధ్య దౌత్య సంబంధాలు బలంగా కొనసాగుతున్నాయి. వీసా, కాన్సులర్ అంశాలపై భారత్-అమెరికా ప్రభుత్వాల మధ్య చర్చలు కొనసాగుతున్నాయి. భారత పౌరుల న్యాయమైన ప్రయోజనాలను పరిరక్షించడానికి భారత్ కట్టుబడి ఉంది" అని జైస్వాల్ నొక్కి చెప్పారు.

అమెరికా భారత్‌పై జారీ చేసిన ట్రావెల్ అడ్వైజరీ స్థాయి ఇప్పటికీ లెవల్ 2 లోనే ఉందని, ఇది యథాతథంగా కొనసాగుతోందని, జూన్ 16న తాజా మార్పులు చేశారని ఆయన తెలిపారు.

భారత పౌరులు భయపడాల్సిన అవసరం లేదని, అమెరికా భారత్‌ను అనుమానించడం లేదని జైస్వాల్ స్పష్టం చేశారు. "భారత్-అమెరికా భాగస్వామ్యం ప్రజాస్వామ్య విలువలు , వ్యూహాత్మక సారూప్యతపై ఆధారపడినది. ఇది 21వ శతాబ్దంలో అత్యంత ప్రాధాన్యత గల భాగస్వామ్యంగా మారింది" అని ఆయన వివరించారు.

వీసా దరఖాస్తుదారులకు భరోసా కల్పిస్తూ, "భారత్-అమెరికా సంబంధాల్లో ఎటువంటి అభ్యంతరాలు లేవు, అన్ని దరఖాస్తులను నిష్పాక్షికంగా పరిశీలిస్తారు. అటువంటి మార్గదర్శకాలు భద్రతా పరంగా సాధారణమే. కానీ భారత పౌరుల ప్రయోజనాలపై ప్రభావం పడకుండా చూస్తాం" అని జైస్వాల్ వెల్లడించారు. ఈ ప్రకటన భారత పౌరులకు అమెరికా వీసా దరఖాస్తు ప్రక్రియపై ఉన్న ఆందోళనలను తగ్గించడానికి దోహదపడుతుందని భావిస్తున్నారు.