భారత్ స్థానం మారింది: ప్రధాని మోడీ!.. దశాబ్ద కాలంలో మారిన దేశ జాతకం ఏమిటి?

ఒకప్పుడు సాంకేతికత కోసం ఇతర దేశాల వైపు ఆశగా చూసిన భారత్, ఇప్పుడు అదే దేశాలకు సాంకేతికతను ఎగుమతి చేసే స్థాయికి ఎదగడం ప్రతి భారతీయుడు గర్వించదగ్గ విషయం. ఢిల్లీ వేదికగా జరిగిన 'What India Thinks Today' సదస్సులో ప్రధాని మోదీ చెప్పినట్లుగా.. భారత్ ఇప్పుడు కేవలం ఒక మార్కెట్ మాత్రమే కాదు, అది ప్రపంచానికి ఒక ‘ఇన్నోవేషన్ హబ్’. ‘అప్పుడు వేరు.. ఇప్పుడు వేరు’ అన్న ఆయన మాటలు దేశం సాధించిన దశాబ్ద కాలపు ప్రగతికి అద్దం పడుతున్నాయి.

వినియోగదారుడి నుంచి ఉత్పత్తిదారుగా

ప్రధాని మోదీ తన ప్రసంగంలో ప్రధానంగా నొక్కి చెప్పిన అంశం.. భారత్ మారిన తీరు. ఒకప్పుడు మనం విదేశీ టెక్నాలజీని స్వీకరించే (Consumer) స్థితిలో ఉండగా, ఇప్పుడు ఉత్పత్తి చేసే (Producer) స్థాయికి చేరుకున్నాం. మొబైల్ తయారీ నుంచి సాఫ్ట్‌వేర్ సొల్యూషన్స్ వరకు భారత్ ఇప్పుడు ప్రపంచానికి దిక్సూచిగా మారుతోంది. ముఖ్యంగా మన దేశపు ‘డిజిటల్ పబ్లిక్ ఇన్‌ఫ్రాస్ట్రక్చర్’ ఇప్పుడు అనేక అభివృద్ధి చెందిన దేశాలకు ఆదర్శంగా నిలుస్తోంది.

డిజిటల్ చెల్లింపులతో ప్రపంచానికే పాఠం!

భారతదేశంలో జరిగిన అతిపెద్ద మార్పు డిజిటల్ చెల్లింపుల వ్యవస్థ. పల్లెటూరి చిరు వ్యాపారి నుంచి నగరాల్లోని మాల్స్ వరకు ప్రతిచోటా ఆన్‌లైన్ లావాదేవీలు పెరగడం అంతర్జాతీయ సమాజం దృష్టిని ఆకర్షించింది. ఈ యూపీఐ (UPI) వంటి వ్యవస్థలు ఇతర దేశాల్లో కూడా అమలు కావడం భారత్ యొక్క సాంకేతిక ఆధిపత్యాన్ని చాటిచెబుతోంది. స్టార్టప్‌ల వృద్ధిలో భారత్ ఇప్పుడు ప్రపంచంలోనే మూడో అతిపెద్ద వ్యవస్థగా ఎదగడం మన యువత ప్రతిభకు నిదర్శనం.

గ్లోబల్ టాలెంట్ హబ్

భారతదేశానికి ఉన్న అతిపెద్ద బలం ఇక్కడి ‘యువ జనాభా’ అని జూపల్లి రామారావు అభిప్రాయపడ్డారు. ఇంగ్లిష్ లో ప్రావీణ్యం ఉండడంతో పాటు సైన్స్, టెక్నాలజీ, ఇంజినీరింగ్, మ్యాథ్స్ రంగాల్లో మన యువత చూపిస్తున్న ప్రతిభ ప్రపంచ వ్యాప్తంగా గుర్తింపు పొందుతోంది. ప్రపంచంలోని అగ్రశ్రేణి కంపెనీలకు భారతీయులే సీఈఓ (CEO)లుగా ఉండడం దీనికి ప్రత్యక్ష ఉదాహరణ. విదేశీ పెట్టుబడులు (FDI) ప్రవాహంలా రావడం వెనుక ఈ నైపుణ్యం కలిగిన మానవ వనరులే ప్రధాన కారణం.

అంతర్జాతీయ వేదికపై గళం!

రాజకీయాలు, ఆర్థిక వ్యవస్థ మాత్రమే కాకుండా ఆరోగ్యం, సంస్కృతి వంటి రంగాల్లో కూడా భారత్ ప్రభావం విస్తరిస్తోందని ప్రధాని స్పష్టం చేశారు. కరోనా సమయంలో వ్యాక్సిన్ మైత్రి ద్వారా ప్రపంచాన్ని ఆదుకోవడంలో భారత్ చూపిన చొరవ, అంతర్జాతీయ సంబంధాల్లో మన దేశ స్థానాన్ని మరింత ఎత్తుకు తీసుకెళ్లింది. మౌలిక వసతుల కల్పన (Infrastructure), మేక్ ఇన్ ఇండియా వంటి పథకాలు దేశాన్ని స్వయం సమృద్ధి దిశగా నడిపిస్తున్నాయి.

ప్రధాని మోదీ ప్రసంగం సారాంశం ఒక్కటే.. భారత్ ఇప్పుడు ప్రపంచ వేదికపై ఒక శక్తివంతమైన భాగస్వామి. మనం అనుసరిస్తున్న టెక్నాలజీ, మనం సాగిస్తున్న ప్రగతి ఇప్పుడు కేవలం మనకే కాదు, యావత్ ప్రపంచానికి ఉపయోగపడుతోంది. 2047 నాటికి అభివృద్ధి చెందిన దేశంగా ఎదగాలన్న లక్ష్యానికి ఈ సాంకేతిక, ఆర్థిక పునాదులే కీలకమైనవి. యువత తమ ప్రతిభను మరింతగా మెరుగుపరుచుకుంటే, భవిష్యత్తులో భారత్ అగ్రగామిగా నిలవడం ఖాయం.