హైదరాబాద్లో 'డొనాల్డ్ ట్రంప్ అవెన్యూ'.. భట్టి విక్రమార్క ఫొటోను షేర్ చేసిన ట్రంప్
అంతర్జాతీయ స్థాయిలో తెలంగాణ రాజధాని హైదరాబాద్ మరోసారి వార్తల్లో నిలిచింది. అమెరికా అధ్యక్షుడు డొనాల్డ్ ట్రంప్ భారత్కు సంబంధించిన ఒక ఆసక్తికరమైన అంశంతో సోషల్ మీడియా వేదికగా స్పందించారు.
అంతర్జాతీయ స్థాయిలో తెలంగాణ రాజధాని హైదరాబాద్ మరోసారి వార్తల్లో నిలిచింది. అమెరికా అధ్యక్షుడు డొనాల్డ్ ట్రంప్ భారత్కు సంబంధించిన ఒక ఆసక్తికరమైన అంశంతో సోషల్ మీడియా వేదికగా స్పందించారు. హైదరాబాద్లోని అమెరికన్ కాన్సులేట్కు వెళ్లే ప్రధాన రహదారికి తెలంగాణ ప్రభుత్వం ఇటీవల ‘డొనాల్డ్ ట్రంప్ అవెన్యూ’గా నామకరణం చేసిన విషయం తెలిసిందే. ఈ ప్రతిష్టాత్మక నిర్ణయంపై తాజాగా డొనాల్డ్ ట్రంప్ స్వయంగా స్పందిస్తూ తన అధికారిక సోషల్ మీడియా ప్లాట్ఫామ్ 'ట్రూత్ సోషల్' లో ఒక ప్రత్యేక పోస్ట్ చేశారు.
ట్రూత్ సోషల్లో ట్రంప్ భావోద్వేగ పోస్ట్
తన పోస్టులో ట్రంప్ ఈ గౌరవం పట్ల హర్షం వ్యక్తం చేశారు. "ఇండియాలోని హైదరాబాద్లో ‘ది న్యూ డొనాల్డ్ ట్రంప్ అవెన్యూ’... ఇంతటి అరుదైన గౌరవం పొందిన తొలి అమెరికా అధ్యక్షుడు నేనే కావడం ఎంతో సంతోషంగా ఉంది. ఈ గొప్ప గౌరవానికి ధన్యవాదాలు" అంటూ ఆయన పేర్కొన్నారు. ఈ వ్యాఖ్యలతో పాటు తెలంగాణ ఉప ముఖ్యమంత్రి భట్టి విక్రమార్క, అమెరికా రాయబారి సెర్గియో స్పానియర్ కలిసి ‘డొనాల్డ్ ట్రంప్ అవెన్యూ’ శిలాఫలకాన్ని ఆవిష్కరిస్తున్న అధికారిక ఫొటోను కూడా ట్రంప్ తన పోస్టులో షేర్ చేయడం విశేషం.
భారత్-అమెరికా బంధానికి ప్రతీక
ఈ రహదారి హైదరాబాద్లోని గచ్చిబౌలి/నానక్రామ్గూడ ప్రాంతంలో ఉన్న అమెరికన్ కాన్సులేట్కు అనుసంధానమై ఉంది. ఇది కేవలం ఒక వీధి పేరు మాత్రమే కాదని, భారత్-అమెరికా దేశాల మధ్య ఉన్న దృఢమైన ద్వైపాక్షిక సంబంధాలకు ప్రతీకగా నిలుస్తుందని తెలంగాణ ప్రభుత్వం పేర్కొంది. రెండు దేశాల మధ్య వ్యూహాత్మక భాగస్వామ్యం బలోపేతం కావడం.. అంతర్జాతీయ పెట్టుబడులను ఆకర్షించడం.. సాంకేతిక సహకారం, ఐటీ రంగ విస్తరణను మరింత ముందుకు తీసుకెళ్లడం లాంటి బహుముఖ ప్రయోజనాలను ఆశించి, అంతర్జాతీయ దౌత్య సంబంధాలలో భాగంగానే తెలంగాణ ప్రభుత్వం ఈ నిర్ణయం తీసుకున్నట్లు ప్రభుత్వ వర్గాలు వెల్లడించాయి.
సోషల్ మీడియాలో వైరల్.. రాజకీయంగా ఆసక్తికర చర్చ!
డొనాల్డ్ ట్రంప్ స్వయంగా ఈ ఫొటోను పోస్ట్ చేయడంతో ప్రపంచవ్యాప్తంగా నెటిజన్లు దీనిపై పెద్ద ఎత్తున చర్చలు మొదలుపెట్టారు. ముఖ్యంగా అమెరికా అధ్యక్షుడు, తెలంగాణ డిప్యూటీ సీఎం భట్టి విక్రమార్క ఫొటోను షేర్ చేయడం స్థానిక రాజకీయాల్లోనూ సోషల్ మీడియాలోనూ హాట్ టాపిక్గా మారింది.
ప్రస్తుతం ఈ పోస్ట్ నెట్టింట విపరీతంగా వైరల్గా మారింది. ట్రంప్ అభిమానులు దీనిని ఒక చారిత్రాత్మక గౌరవంగా అభివర్ణిస్తుండగా, భారతీయ నెటిజన్లు, తెలంగాణ ఐటీ వర్గాలు ఈ పరిణామాన్ని గ్లోబల్ స్టేజీపై హైదరాబాద్ క్రేజ్కు నిదర్శనంగా పేర్కొంటున్నారు. హైదరాబాద్లోని ఒక ప్రధాన రహదారికి అమెరికా అధ్యక్షుడి పేరు పెట్టడం, దానికి అంతర్జాతీయంగా ఇంతటి ప్రాధాన్యత లభించడం భవిష్యత్తులో భారత్-అమెరికా సంబంధాల నేపథ్యంలో మరింత చర్చనీయాంశంగా మారే అవకాశం ఉందని రాజకీయ, దౌత్య విశ్లేషకులు అభిప్రాయపడుతున్నారు.