బీజేపీకి షాకిచ్చిన నటి సరికొత్త ప్రయాణం ఇటు నుంచే..!
| అవును... బీజేపీకి రాజీనామా చేసినప్పటినుంచీ రాజకీయాలకు దూరంగా ఉన్నట్లే కనిపించిన నటి గౌతమి తాజాగా సరికొత్త నిర్ణయం తీసుకున్నారు.
తెలుగు, తమిళ, కన్నడ, మలయాళంలో ఎన్నో సూపర్ హిట్ సినిమాల్లో నటించి ఒకప్పుడు స్టార్ హీరోయిన్, సీనియర్ నటి గౌతమి... ప్రస్తుతం క్యారెక్టర్ ఆర్టిస్ట్ గా అడపాదడపా సినిమాల్లో కనిపిస్తున్న సంగతి తెలిసిందే. యూనివర్శల్ స్టార్ కమల్ హాసన్ తో కొంతకాలం రిలేషన్ లో ఉన్న ఆమె... సినిమాలతో పాటు రాజకీయాల్లో కూడా ఫుల్ యాక్టివ్ గా ఉంటుంటారు. ఈ క్రమంలో సుమారు 25 ఏళ్లుగా ఆమె బీజేపీలో ఉన్నారు.
ఈ క్రమంలో ఎల్.కే. అద్వానీ రథయాత్ర సమయంలో కూడా ఆమె చురుగ్గా రాజకీయాల్లో పాల్గొన్నారు. అయితే గత ఏడాదిలో ఆమె బీజేపీ పై తీవ్ర విమర్శలు చేశారు! ఇందులో భాగంగా... డబ్బు, ఆస్తి విషయంలో తనను భారీగా మోసం చేసిన ఓ వ్యక్తికి భారతీయ జనతాపార్టీలోని కొందరు సీనియర్లు సపోర్టుగా నిలిచారని ఆమె ఆవేదన వ్యక్తం చేశారు. ఇది ఏమాత్రం సరైన చర్య కాదంటూ ఆమె ఫైరయ్యారు.
ఈ క్రమంలో సుమారు రెండున్నర దశాబ్దాలకు పైగా బీజేపీతో ఉన్న అనుబంధాన్ని ఆమె గత ఏడాది అక్టోబర్ లో తెంచుకున్నారు.. ఈ మేరకు ఆ నెల 23న రాజీనామా లేఖ రాశారు. తనకు వ్యక్తిగతంగా సమస్యలు వచ్చినప్పుడు పార్టీ నుంచి ఎటువంటి మద్దతూ లేకపోవడం వల్లే రాజీనామా చేస్తున్నట్లు లేఖలో పేర్కొన్నారు. అనంతరం కొన్ని మూడు నెలలకు పైగా గ్యాప్ తీసుకున్న గౌతమి... తాజాగా సరికొత్త నిర్ణయం తీసుకున్నారు.
అవును... బీజేపీకి రాజీనామా చేసినప్పటినుంచీ రాజకీయాలకు దూరంగా ఉన్నట్లే కనిపించిన నటి గౌతమి తాజాగా సరికొత్త నిర్ణయం తీసుకున్నారు. ఇందులో భాగంగా... తాజాగా ఆల్ ఇండియా అన్నా ద్రవిడ మున్నేట్ర కళగం (ఏఐఏడీఎంకే) పార్టీలో చేరారు. ఈ మేరకు అన్నాడీఎంకే పార్టీ జనరల్ సెక్రటరీ, మాజీ సీఎం పళనిస్వామిని కలిసి ఆయన ఆధ్వర్యంలో గౌతమి ఆ పార్టీలో చేరారు.
ఈ విషయాన్ని, అందుకు సంబంధించిన ఫోటోను నెట్టింట పోస్ట్ చేసిన ఏఐఏడీఎంకే... గౌరవనీయులైన జనరల్ సెక్రటరీ పళనస్వామిని నటి గౌతమి కలిశారని.. ఈ సందర్భంగా ఆమె పార్టీలో జాయిన్ అయ్యారని రాసుకొచ్చారు. ఇప్పుడు ఈ విషయం తమిళనాడు రాజకీయాల్లో హాట్ టాపిక్ గా మారింది.