ఎఫ్‌-35: రహస్యాలతో నిండిన యుద్ధవిమానం

అత్యాధునిక యుద్ధ రంగంలో ఎఫ్‌-35 ఫైటర్ జెట్ ఒక ప్రత్యేక స్థానాన్ని సంపాదించుకుంది. ఇటీవల బ్రిటన్ రాయల్ నేవీకి చెందిన ఒక ఎఫ్‌-35బి యుద్ధ విమానం కేరళలోని తిరువనంతపురం విమానాశ్రయంలో సాంకేతిక సమస్యలతో నిలిచిపోవడం ఆసక్తికర చర్చకు దారితీసింది. ఈ ఘటనపై సోషల్ మీడియాలో మీమ్స్, జోక్స్ వైరల్ అయినప్పటికీ, ఈ జెట్ వెనుక ఉన్న సాంకేతిక లోతు, దాని రహస్య స్వభావం చాలా తీవ్రమైనవి.

రహస్యాలతో నిండిన విమానం

ఎఫ్‌-35 నిర్మాణంలో ప్రతి భాగం అత్యంత జాగ్రత్తగా రూపొందించబడింది. ప్రతీ స్క్రూ, బోల్ట్‌కు ఒక ప్రత్యేక సెక్యూరిటీ కోడ్ ఉంటుంది. దీని డిజైన్, అంతర్గత వ్యవస్థలు పూర్తిగా రహస్యంగా ఉంటాయి. ఈ జెట్‌లో ఉపయోగించే స్టెల్త్ టెక్నాలజీ, సెన్సర్లు, ఎన్‌క్రిప్టెడ్ సాఫ్ట్‌వేర్, డేటా ఫ్యూజన్ వ్యవస్థలు అన్నీ కలిపి దీన్ని ఒక "ఎగిరే రహస్య కోట"గా మార్చాయి.

ఈ విమానం తక్కువ ఎత్తులో శత్రు రాడార్‌లకు కనిపించకుండా సంచరిస్తుంది. అంతేకాదు, అవసరమైతే అణ్వాయుధాలను కూడా మోసుకెళ్లగలదు. ఈ స్థాయిలో ఉన్న సాంకేతికత బయటపడితే, అది బ్రిటన్‌కు మాత్రమే కాకుండా, నాటో దేశాల రక్షణ వ్యవస్థకు తీవ్రమైన సమస్యలను కలిగిస్తుంది.

- మరమ్మత్తులకు ప్రత్యేక చర్యలు

తిరువనంతపురం ఎయిర్‌పోర్టులో నిలిచిపోయిన ఎఫ్‌-35బి‌ను విడదీసి, అమెరికా వాయుసేనకు చెందిన భారీ సీ-17 గ్లోబ్‌మాస్టర్ విమానంలో పెట్టి మరమ్మత్తుల నిమిత్తం తరలించనున్నారు. ఈ ప్రక్రియలో లాక్‌హీడ్ మార్టిన్ ఇంజినీర్లు మాత్రమే పాల్గొంటారు. ఎందుకంటే వీటిని విడగొట్టడం, తిరిగి అమర్చడం సాధారణ ఇంజినీర్ల పని కాదు.

విమానాన్ని విడదీయడం మొదలుపెట్టి, ప్రతి భాగాన్ని రికార్డ్ చేయడం, సెక్యూరిటీ కోడ్‌లతో లాగ్ చేయడం వంటి కఠినమైన భద్రతా చర్యలు తీసుకుంటారు. బ్రిటన్ అధికారులు ఎలాంటి గోప్యతా ఉల్లంఘన జరగకుండా అత్యంత అప్రమత్తంగా వ్యవహరిస్తున్నారు.

గతంలోనూ ఇలాంటి సంఘటనలు

ఇది ఎఫ్‌-35లకు సంబంధించి మొదటి సంఘటన కాదు. మే 2019లో అమెరికాలోని ఫ్లోరిడాలో ఇగ్లిన్ ఎయిర్‌బేస్‌లో ఒక ఎఫ్‌-35ను ఇదే విధంగా విడగొట్టి, సీ-17 గ్లోబ్‌మాస్టర్ ద్వారా తరలించారు. ఆ ప్రాజెక్ట్ నాలుగేళ్లలో పూర్తయింది. అప్పట్లో దీని వ్యయం సుమారు $2 లక్షల డాలర్లు కాగా, గోప్యతకు సంబంధించిన చర్యలు కీలక పాత్ర పోషించాయి.

మరో ఉదాహరణగా మధ్యధరా సముద్రంలో బ్రిటన్‌కు చెందిన ‘క్వీన్ ఎలిజబెత్’ నౌక నుంచి ఒక ఎఫ్‌-35బి విమానం సముద్రంలో పడిపోయింది. పైలట్ సురక్షితంగా బయటపడినప్పటికీ, విమాన శకలాలను శత్రుదేశాలు చైనా, రష్యా స్వాధీనం చేసుకుంటే ఎలానోనన్న భయంతో విస్తృతంగా గాలింపు చేపట్టాల్సి వచ్చింది. ఎందుకంటే స్టెల్త్ టెక్నాలజీ ఆ మునిగిన శకలాల ద్వారా వెలుగులోకి వచ్చే అవకాశం ఉంది.

- ఖర్చు, కాలం... అన్నీ భారీగానే

ఎఫ్‌-35 జెట్ రూపకల్పనకు దాదాపు $1.7 ట్రిలియన్ డాలర్లు ఖర్చయ్యింది. దీనిని అభివృద్ధి చేయడానికి సుమారు 20 ఏళ్లు పట్టింది. ఈ విషయంలో అమెరికా రక్షణ రంగానికి చెందిన ప్రముఖ సంస్థ లాక్‌హీడ్ మార్టిన్ కీలక పాత్ర పోషించింది.

ఎఫ్‌-35బి విమానం కేరళలో నిలిచిపోయిన సంఘటనపై వచ్చిన చమత్కారాలు ఎలా ఉన్నా, ఈ యుద్ధవిమానాన్ని నిర్మించడంలో ఉన్న సాంకేతిక లోతులు, రహస్య వ్యవస్థలు, కఠినమైన భద్రతా చర్యలు చూస్తే ఇది ఒక సాధారణ యంత్రం కాదని స్పష్టమవుతుంది. ప్రతి స్క్రూకు కోడ్ పెట్టే స్థాయిలో దాని గోప్యతను కాపాడుతున్న దేశాలు, దీని వెనుక ఉన్న అపారమైన సైనిక ప్రాధాన్యతను స్పష్టంగా తెలియజేస్తున్నాయి.

ఈ సంఘటనలన్నీ ఆధునిక యుద్ధ విమానాల సాంకేతికత, వాటి భద్రతా ప్రాముఖ్యత ఎంత ఉన్నతంగా ఉందో తెలియజేస్తున్నాయి.