100 బిలియన్లకు పైగా ఫ్రాడ్ జరిగిందన్న మస్క్ ట్వీట్.. ప్రభుత్వ పెద్దల కామెంట్ ఇదే..

అమెరికాలో జరుగుతున్న ఫ్రాడ్‌పై టెక్ దిగ్గజం ఎలాన్ మస్క్ చేసిన వ్యాఖ్యలు సంచలనంగా మారాయి. మిన్నెసోటా రాష్ట్రంలో ‘డే కేర్ సెంటర్ల’ పేరుతో భారీ స్థాయిలో మోసాలు జరిగాయన్న వార్తల నేపథ్యంలో స్పందించిన మస్క్, అమెరికా వ్యాప్తంగా ఏటా సుమారు 700 బిలియన్ డాలర్లు (భారత కరెన్సీలో దాదాపు రూ.63 లక్షల కోట్ల వరకు) ఫ్రాడ్ జరుగుతుందన్నది తన అంచనా అని ట్వీట్ చేశారు. ఈ వ్యాఖ్యలు ఇప్పుడు అమెరికా రాజకీయ, ఆర్థిక వర్గాల్లో చర్చకు దారి తీస్తున్నాయి.

ఎలన్ మస్క్ ట్వీట్ ఇదే..

ఇటీవల మిన్నెసోటాలో ‘డే కేర్ సెంటర్ల’ పేరిట ప్రభుత్వ నిధులను దోచుకున్న పెద్ద స్కామ్ వెలుగులోకి వచ్చింది. ఈ కేసులోనే దాదాపు 100 బిలియన్ డాలర్ల వరకు మోసం జరిగి ఉండొచ్చన్న అనుమానాలు వ్యక్తం అవుతున్నాయి. ఈ నేపథ్యంలోనే ఎలాన్ మస్క్ స్పందిస్తూ, మిన్నెసోటా ఒక్కటే కాదని, అసలు పెద్ద మోసాలు కాలిఫోర్నియా, న్యూయార్క్, ఇల్లినాయిస్ వంటి రాష్ట్రాల్లో జరుగుతున్నాయని వ్యాఖ్యానించారు. అక్కడ జరుగుతున్న ఫ్రాడ్ స్థాయి మరింత భారీగా ఉందని ఆయన పేర్కొన్నారు.

లోపాలను ఎత్తి చూపుతుందా?

మస్క్ చేసిన వ్యాఖ్యలు సాధారణ విమర్శలా కాకుండా, అమెరికా పాలనా వ్యవస్థలోని లోపాలపై ప్రత్యక్ష ప్రశ్నగా మారాయి. సంక్షేమ పథకాలు, ప్రభుత్వ సబ్సిడీలు, కాంట్రాక్టులు, ఫెడరల్ ఫండింగ్ వంటి వ్యవస్థల్లో పర్యవేక్షణ లోపించడం వల్లే ఇలాంటి మోసాలు పెరుగుతున్నాయని ఆయన అభిప్రాయానికి మద్దతుగా పలువురు నిపుణులు మాట్లాడుతున్నారు. ముఖ్యంగా పిల్లల సంరక్షణ కేంద్రాలు, ఆరోగ్య సేవలు, హౌసింగ్ సబ్సిడీల్లో పేరుకే నిబంధనలు ఉండి, వాస్తవ అమలు బలహీనంగా ఉండటమే స్కామర్లకు అవకాశంగా మారుతోందని విశ్లేషకులు చెబుతున్నారు.

ఏటా 700 బిలియన్ డాలర్ల ఫ్రాడ్ అన్నది నిజమైతే, అది కేవలం ఆర్థిక నష్టం మాత్రమే కాదు.., ప్రజల నమ్మకానికి పెద్ద దెబ్బగా మారుతుందని వ్యాఖ్యాతలు అంటున్నారు. పన్ను చెల్లింపుదారుల డబ్బు సంక్షేమం కోసం వినియోగించాల్సిన నగదు మోసగాళ్ల చేతుల్లోకి వెళ్తే ప్రభుత్వంపై విశ్వాసం దెబ్బతింటుందని హెచ్చరిస్తున్నారు. ముఖ్యంగా సామాన్య ప్రజల కోసం రూపొందించిన పథకాలను అక్రమంగా వాడుకోవడం సామాజిక అసమానతలను మరింత పెంచుతుందన్న ఆందోళన కూడా వ్యక్తం అవుతోంది.

స్పందించిన ట్రంప్ సర్కార్ పెద్దలు..

ఇదిలా ఉండగా, మస్క్ వ్యాఖ్యలపై కొందరు రాజకీయ నేతలు స్పందించారు. ఫ్రాడ్‌ను పూర్తిగా నియంత్రించడం అసాధ్యమన్న వాదన ఒకవైపు ఉండగా, సరైన ఆడిట్లు, డిజిటల్ ట్రాకింగ్, కఠిన చర్యలతో దీనిని గణనీయంగా తగ్గించవచ్చన్న అభిప్రాయం మరోవైపు వినిపిస్తోంది. ముఖ్యంగా ఏఐ ఆధారిత మానిటరింగ్ వ్యవస్థలు, రియల్ టైమ్ డేటా విశ్లేషణలు అమలు చేస్తే ఇలాంటి స్కామ్స్‌ను ముందుగానే గుర్తించే అవకాశం ఉంటుందని నిపుణులు సూచిస్తున్నారు.

మొత్తానికి, ఎలాన్ మస్క్ చేసిన ఈ ట్వీట్ అమెరికాలో జరుగుతున్న ఆర్థిక మోసాలపై మరోసారి స్పాట్‌లైట్ వేసింది. ఇది కేవలం ఒక రాష్ట్రానికి పరిమితమైన సమస్య కాదని, దేశవ్యాప్తంగా వ్యవస్థాపరమైన సంస్కరణలు అవసరమన్న సందేశాన్ని ఆయన వ్యాఖ్యలు స్పష్టం చేస్తున్నాయి. రాబోయే రోజుల్లో ఈ అంశంపై అమెరికా ప్రభుత్వం ఎలాంటి చర్యలు తీసుకుంటుందన్నది ఇప్పుడు ఆసక్తికరంగా మారింది.