సొంత కారు లేకపోతే పిల్లనివ్వరట..చిచ్చు పెట్టిన డీకే

బెంగళూరు నగరంలో ట్రాఫిక్ సమస్యపై జరుగుతున్న చర్చకు కర్ణాటక ఉపముఖ్యమంత్రి డీకే శివకుమార్ చేసిన వ్యాఖ్యలు అనూహ్యంగా కొత్త కోణాన్ని పరిచయం చేశాయి. టన్నెల్ రోడ్ ప్రాజెక్టును సమర్థిస్తూ ఆయన చేసిన వ్యాఖ్యలు కేవలం మౌలిక సదుపాయాల గురించి మాత్రమే కాకుండా నేటి సామాజిక ధోరణులు, ఆర్థిక స్థితి గురించి కూడా చర్చకు దారితీశాయి.

*టన్నెల్ రోడ్ ప్రాజెక్టు వర్సెస్ మాస్ ట్రాన్స్‌పోర్ట్

బెంగళూరు నగరంలో తీవ్రమైన ట్రాఫిక్‌ను తగ్గించడానికి ప్రభుత్వం టన్నెల్ రోడ్ ప్రాజెక్టును ప్రతిపాదించింది. దీని ద్వారా వాహనాల రద్దీ తగ్గి, ప్రయాణం సులభతరం అవుతుందని ప్రభుత్వం నమ్ముతోంది. అయితే బీజేపీ ఎంపీ తేజస్వి సూర్య దీనిని వ్యతిరేకించారు. సొరంగ మార్గాల కంటే ప్రజా రవాణా (మాస్ ట్రాన్స్‌పోర్ట్) వ్యవస్థను బలోపేతం చేయడమే అసలైన పరిష్కారమని ఆయన వాదించారు.

*డీకే శివకుమార్ ఆసక్తికర వ్యాఖ్యలు

ఈ నేపథ్యంలో మీడియాతో మాట్లాడిన డీకే శివకుమార్, ట్రాఫిక్‌కు మూలకారణమైన వ్యక్తిగత వాహనాల వినియోగాన్ని ఉద్దేశిస్తూ కీలక వ్యాఖ్యలు చేశారు. “మీరు సొంత వాహనంలో రాకుండా నేను ఆపగలనా? ప్రజలు తమ కుటుంబాలతో కలిసి సొంత వాహనాల్లో ప్రయాణం చేయడానికే ఇష్టపడుతున్నారు. వారిని కార్లు వాడొద్దని చెప్పగలమా? ఇప్పుడు పరిస్థితి ఏ స్థాయికి చేరిందంటే, సొంత కారు లేని అబ్బాయికి పిల్లను ఇవ్వాలా వద్దా అని కూడా కొందరు ఆలోచిస్తున్నారు.” అని హాట్ కామెంట్స్ చేశారు. ఈ వ్యాఖ్యలు కేవలం ట్రాఫిక్ సమస్య గురించి కాకుండా, నేటి సమాజంలో పెరిగిన వ్యక్తిగత ఆస్తుల ప్రాధాన్యతను, ఆర్థిక స్థితిని అంచనా వేసే ధోరణిని పరోక్షంగా సూచించాయి.

వ్యంగ్యంతో కూడిన తేజస్వి సూర్య కౌంటర్

డీకే శివకుమార్ వ్యాఖ్యలపై తేజస్వి సూర్య వెంటనే వ్యంగ్యంగా స్పందించారు. ఉపముఖ్యమంత్రికి ధన్యవాదాలు చెబుతూ ఒక ట్వీట్ చేశారు. “ఇంతకాలం నేను బెంగళూరు ట్రాఫిక్ సమస్యను పరిష్కరించడానికే టన్నెల్ రోడ్ ప్రాజెక్టు తీసుకువచ్చారని అనుకున్నాను. కానీ ఇది సామాజిక సమస్యను పరిష్కరించడానికే అని ఉపముఖ్యమంత్రి చెప్పి స్పష్టత ఇచ్చారు. నేను ఎంత అమాయకుడిని!” అని ఎద్దేవా చేశారు. ఈ కౌంటర్‌తో ఈ అంశం కర్ణాటక రాజకీయాల్లో మరింత వేడెక్కింది. కొందరు డీకే వ్యాఖ్యలను సరదాగా, వాస్తవానికి దగ్గరగా ఉన్నాయని అంటుంటే, మరికొందరు దీనిని "ప్రజల ఆర్థిక పరిస్థితులను వెక్కిరించే వ్యాఖ్య" అని విమర్శిస్తున్నారు.

బెంగళూరు ట్రాఫిక్ – నేటి వాస్తవం

దేశంలోనే అత్యధిక ట్రాఫిక్ ఉన్న నగరాల్లో బెంగళూరు ఒకటిగా నిలిచింది. దీనికి ప్రధాన కారణాలు వాహనాల సంఖ్య. నగరంలో రోడ్ల పొడవు కంటే వాహనాల సంఖ్య రెట్టింపు అయింది. ఐటీ హబ్‌గా ఉండటం వలన రోజూ లక్షల మంది ఉద్యోగులు నగరంలో ప్రయాణించాల్సి వస్తుంది. ప్రజా రవాణా లోపం కనిపిస్తోంది. మెట్రో, బస్సుల వంటి ప్రజా రవాణా వ్యవస్థలు పెరిగిన జనాభాకు.. అవసరానికి సరిపోకపోవడంతో, ఎక్కువ మంది వ్యక్తిగత వాహనాలపై ఆధారపడుతున్నారు.

డీకే శివకుమార్ వ్యాఖ్యలు ట్రాఫిక్ సమస్యకు చికిత్స గురించి కాకుండా వ్యాధి లక్షణాల గురించి మాట్లాడాయి. నగరంలో పెరుగుతున్న ఆర్థిక అసమానతలు.. జీవనశైలి ప్రభావాలను అవి అద్దం పట్టాయి. ఈ ప్రాజెక్టు ట్రాఫిక్‌ను ఎంతవరకు తగ్గిస్తుందో చూడాలి, కానీ రాజకీయ చర్చలకు మాత్రం ఇది పెద్ద వేదికగా మారిందనడంలో సందేహం లేదు.