సెమికోలన్ ఎక్కడ?.. మాయమవుతున్న వ్యాకరణ చిహ్నం
ముఖ్యంగా ఆంగ్ల భాష వినియోగంలో కొన్ని పదాలు, వ్యాకరణ చిహ్నాలు కనుమరుగవుతున్నాయి. అలాంటి వాటిలో ముందుగా ప్రస్తావించాల్సింది. సెమికోలన్ (;) చిహ్నం.;
ఆధునిక జీవనశైలి అనేక మార్పులకు కారణం అవుతోంది. టెక్నాలజీ అభివృద్ధి, కమ్యూనికేషన్ వేగవంతం, అభిప్రాయాల మార్పు వంటి అంశాలు మానవ జీవన విధానంలోనే కాదు, భాషా పరంగా కూడా ప్రభావం చూపిస్తున్నాయి. ముఖ్యంగా ఆంగ్ల భాష వినియోగంలో కొన్ని పదాలు, వ్యాకరణ చిహ్నాలు కనుమరుగవుతున్నాయి. అలాంటి వాటిలో ముందుగా ప్రస్తావించాల్సింది. సెమికోలన్ (;) చిహ్నం.
సెమికోలన్ అంటే ఏమిటి?
సెమికోలన్ అనేది ఒక విరామ చిహ్నం. ఇది ఒకే వాక్యంలో ఉన్న సారూప్యత కలిగిన రెండు స్వతంత్ర భావాలను వేరు చేయడంలో ఉపయోగిస్తారు. ఉదాహరణకు:“పొద్దున్న ఎనిమిది గంటలకు రైలు బయలుదేరుతుంది; అది 10 గంటలకు గమ్యానికి చేరుతుంది.” ఇక్కడ రెండు వాక్యాలు ప్రత్యేకమైన భావాలను కలిగివున్నప్పటికీ, అవి దగ్గర సంబంధం కలిగి ఉన్నాయి. వాటిని కలిపేందుకు సెమికోలన్ అవసరం. ఇది ఒక పంక్తికి సాఫల్యం చేకూర్చే శైలీ తేడాను సూచిస్తుంది.
కనుమరుగవుతున్న సెమికోలన్
సమకాలీన రచయితలు, విద్యార్థులు, సాహిత్య అభ్యాసకులు సెమికోలన్‌ను విస్మరిస్తున్నారు. దీనికి ప్రధాన కారణం సరళమైన భాషాప్రయోగం పట్ల పెరుగుతున్న ఆసక్తి. సోషల్ మీడియా, టెక్స్టింగ్, ఇమెయిలింగ్ వంటి కమ్యూనికేషన్ ఫార్మాట్స్‌లో వేగవంతమైన, తక్కువ పదాలతో అర్థాన్ని తెలియజేసే పద్ధతి అలవాటైంది. దీని వలన సెమికోలన్ అవసరంలేనిది అనిపించేది అయిపోయింది.
గణాంకాలూ ఇదే చెబుతున్నాయి
‘బాబెల్’ (Babel) అనే సాఫ్ట్‌వేర్‌ సంస్థ ఒక అధ్యయనంలో, గత రెండు దశాబ్దాలలో ఆంగ్ల పుస్తకాలలో సెమికోలన్ వాడకం గణనీయంగా తగ్గినట్లు వెల్లడించింది. 19వ శతాబ్దం, 20వ శతాబ్దపు రచయితలు సెమికోలన్‌ను విరివిగా ఉపయోగించేవారు. ఉదాహరణకు లియో టాల్‌స్టాయ్ రచించిన ‘అన్నా కరెనినా’ మొదటి వాక్యంలోనే సెమికోలన్ కనిపిస్తుంది. కానీ నేడు, పాఠశాలల స్థాయిలోనే దీని ప్రాధాన్యత తగ్గిపోయింది.
తప్పుగా వాడే ప్రమాదం
సెమికోలన్ వాడకాన్ని కొత్తగా నేర్చుకుంటున్నవారు తరచూ తప్పుగా ఉపయోగించే అవకాశం ఉంటుంది. ఇది వాక్యానికి తప్పు అర్థాన్ని కలిగించవచ్చు. ఈ కారణంగా కొందరు రచయితలు దీనిని పూర్తిగా తప్పిస్తున్నారు. వారు బదులుగా సింపుల్ సెంటెన్సులు లేదా ‘డాష్’, ‘కామా’ వంటి ఇతర చిహ్నాలను ఎక్కువగా ఉపయోగిస్తున్నారు.
భవిష్యత్తు ఏమిటి?
అన్నింటికీ మరుగున పడిపోతున్న సెమికోలన్‌ను మళ్లీ ప్రాచుర్యంలోకి తేవాలంటే, విద్యాసంస్థలే ముందుగావ్వాలి. విద్యార్థులకు వ్యాకరణ ప్రాముఖ్యతను తెలియజేసేలా పాఠ్యాంశాల్లో మార్పులు చేయాల్సిన అవసరం ఉంది. రచయితలు, సంపాదకులు కూడా స్పష్టమైన భావవ్యక్తీకరణ కోసం సెమికోలన్ వాడకాన్ని ప్రోత్సహించాలి.
సెమికోలన్ అనేది.. ఇది కేవలం ఒక చిహ్నం కాదు; అది భావాల మధ్య బంధం. భాషలో అందం, స్పష్టత, సరళత. ఈ మూడింటికీ సమతౌల్యం సాధించడంలో దీనికున్న పాత్రను విస్మరించకూడదు. కనుక, భవిష్యత్ తరం ఈ విస్మృత చిహ్నాన్ని మళ్లీ జీవింపజేస్తుందో లేదో చూడాలి.