బాలకృష్ణ వ్యాఖ్యలపై మరోసారి స్పందించిన చిరంజీవి

నందమూరి బాలకృష్ణ మధ్య నెలకొన్న వివాదంపై మరోసారి తన మార్క్ స్టైల్‌లో స్పష్టత ఇచ్చి చర్చకు తెరదించారు మెగాస్టార్ చిరంజీవి.. విదేశాల నుంచి వెకేషన్ పూర్తి చేసుకుని తిరిగి హైదరాబాద్ చేరుకున్న చిరంజీవిని ఎయిర్‌పోర్ట్‌లో మీడియా ప్రతినిధులు చుట్టుముట్టారు. బాలకృష్ణ అసెంబ్లీలో చేసిన వివాదాస్పద వ్యాఖ్యలపై ఆయన స్పందన కోరగా.. మెగాస్టార్ తన సింపుల్ స్టైల్‌లో "నేను చెప్పాల్సింది చెప్పాను" అంటూ ముందుకు వెళ్లిపోయారు. ఈ ఒక్క మాటతో, ఈ అంశంపై ఇంక మాట్లాడదలుచుకోలేదనే సంకేతాన్ని చిరంజీవి పరోక్షంగా ఇచ్చారు.

* ఆ లేఖే తుది సమాధానమా?

కొద్ది రోజుల క్రితం.. బాలకృష్ణ అసెంబ్లీ వేదికగా చేసిన వ్యంగ్య వ్యాఖ్యలు టాలీవుడ్‌లో పెను దుమారం రేపిన విషయం తెలిసిందే. ఆ సమయంలో చిరంజీవి ఒక బహిరంగ లేఖ విడుదల చేసి, తన అభిప్రాయాన్ని, ఆవేదనను చాలా స్పష్టంగా తెలియజేశారు. ఆ లేఖలో సినీ పరిశ్రమ పట్ల గౌరవం, పెద్దరికం గురించి ఆయన చేసిన వ్యాఖ్యలు అప్పట్లో హాట్ టాపిక్‌గా మారాయి.

తాజాగా మీడియా మళ్లీ అదే అంశాన్ని ప్రస్తావించినప్పుడు, చిరంజీవి కొత్తగా ఎలాంటి వ్యాఖ్య చేయకపోవడం, కేవలం "చెప్పాల్సింది చెప్పాను" అని మాత్రమే పేర్కొనడం గమనిస్తే, తన పాత లేఖనే ఈ వివాదానికి తన తరపున తుది సమాధానంగా మెగాస్టార్ భావిస్తున్నట్లు స్పష్టమవుతోంది. అంటే, ఈ అంశంపై మరింత చర్చకు, వివాదానికి ఆయన తావివ్వదలుచుకోలేదని తెలుస్తోంది.

* ఫ్యాన్స్ డిమాండ్: క్షమాపణ చెప్పాల్సిందే

చిరంజీవి లేఖ విడుదలైన తర్వాత మెగా అభిమానులు, సినీ ప్రేమికులు పెద్ద ఎత్తున మెగాస్టార్‌కు మద్దతు ప్రకటించారు. బాలకృష్ణ తన వ్యాఖ్యలకు బహిరంగంగా క్షమాపణ చెప్పాలని డిమాండ్ చేస్తూ సోషల్ మీడియా వేదికగా నిరసన కూడా వ్యక్తం చేశారు. అయితే బాలకృష్ణ నుంచి ఇప్పటివరకు ఎలాంటి స్పందన రాలేదు.

సినీ వర్గాల్లో మౌనం వెనుక మతలబు?

చిరంజీవి తాజా ప్రకటనతో ఈ వివాదంపై చర్చ మరింత ముదిరింది. మెగాస్టార్ "చెప్పాల్సింది చెప్పాను" అంటూ ఈ అంశాన్ని ముగించే ప్రయత్నం చేసినా, బాలకృష్ణ నుంచి తదుపరి ఎలాంటి నిర్ణయం ఉంటుందనే ఉత్కంఠ సినీ వర్గాల్లో నెలకొంది. అభిమానులు డిమాండ్ చేస్తున్నట్టుగా బాలకృష్ణ క్షమాపణ చెబుతారా, లేక ఈ అంశంపై మౌనం పాటిస్తారా అన్నది వేచి చూడాలి.

ఏదేమైనా, చిరంజీవి తన కూల్‌ అండ్ సింపుల్ స్టైల్‌తో ఈ వివాదాన్ని మళ్లీ రగల్చకుండా చాకచక్యంగా ముగించారనే అభిప్రాయం వ్యక్తమవుతోంది.